ಬದಲಾದ ಕಾಲಘಟ್ಟದಲ್ಲಿ, ಜಾಗತೀಕರಣದ ಕಾಲದಲ್ಲಿ ಕೃಷಿ ರಂಗ ಅನೇಕ ಸ್ಥಿತ್ಯಂತರಗಳಿಗೆ ಒಳಗಾಗಿದೆ. ಭೌಗೋಳಿಕ ಮಿತಿಯಿಲ್ಲದ ಹಾಗೆ ಅವಕಾಶಗಳು ತೆರೆದುಕೊಂಡಿವೆ; ಹಾಗೇ ಸಮಸ್ಯೆಗಳೂ ಎದುರಾಗಿವೆ. ಗ್ರಾಮೀಣ ಪ್ರದೇಶಗಳಿಂದ ನಗರಗಳತ್ತ ವಲಸೆ ಇನ್ನೊಂದು ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಇದರಿಂದಾಗಿ ಹಳ್ಳಿಗಳಲ್ಲಿ ಕೃಷಿ ಕೆಲಸಕ್ಕೆ ಜನರಿಲ್ಲದೆ, ಕೃಷಿ ಕಾಯಕವೂ ಹಿಂದೆಬೀಳುವಂತಾಗಿದೆ. ಅತ್ತ, ನಗರಗಳ ಮೇಲಿನ ಒತ್ತಡ ಹೆಚ್ಚಿ, ಮೂಲಸೌಕರ್ಯ ಒದಗಿಸಲೂ ಪರದಾಡುವಂತಾಗಿದೆ. ಈ ಹಿನ್ನೆಲೆಯಲ್ಲಿ ಹಳ್ಳಿಗಳಲ್ಲಿ ನೆಲೆಗೊಂಡಿರುವ ಸಹಕಾರ ಸಂಘಗಳ ಪಾತ್ರ ಪ್ರಮುಖವಾದುದು. ಸ್ಥಳೀಯವಾಗಿ ಕೃಷಿಗೆ ಉತ್ತೇಜನ ನೀಡುವುದಲ್ಲದೆ, ಉದ್ಯೋಗವನ್ನೂ ಸೃಷ್ಟಿಸುವುದರಿಂದ ನಗರವಲಸೆಯನ್ನು ತಡೆಗಟ್ಟುವಲ್ಲಿ ಸ್ವಲ್ಪ ನೆರವಾಗಬಲ್ಲದು. ಆದರೆ ಸಹಕಾರ ಸಂಘಗಳಲ್ಲಿ ರಾಜಕೀಯ ಹಸ್ತಕ್ಷೇಪಕ್ಕೆ ಅವಕಾಶವೀಯದೆ ಅವು ಸ್ವತಂತ್ರವಾಗಿ ಕಾರ್ಯನಿರ್ವಹಿಸುವ ಮುಕ್ತ ವಾತಾವರಣ ಸೃಷ್ಟಿಸಬೇಕಾದುದು ಮುಖ್ಯ. ಇದರೊಂದಿಗೆ, ಸಾವಿರಾರು ಸಂಘಗಳು ನಿಷ್ಕ್ರಿಯವಾಗಿದ್ದು, ಅದಕ್ಕೆ ಕಾರಣ ಪತ್ತೆಹಚ್ಚಿ ಪುನಶ್ಚೇತನಗೊಳಿಸುವತ್ತಲೂ ಗಮನಹರಿಸಬಹುದಾಗಿದೆ. ಕೇಂದ್ರದಲ್ಲಿ ಇದೇ ಮೊದಲ ಬಾರಿಗೆ ಸಹಕಾರ ಖಾತೆಯನ್ನು ಸೃಷ್ಟಿಸಲಾಗಿದ್ದು, ಇದರ ಯೋಜನೆಗಳು ಮತ್ತು ಕಾರ್ಯನಿರ್ವಹಣೆಯ ಬಗ್ಗೆ ಎಲ್ಲರಿಗೂ ಕುತೂಹಲವಿದೆ.
