ಅಷ್ಟಕ್ಕೂ, ಹೊಸ ಸಂಘಗಳನ್ನು ಸ್ಥಾಪಿಸುವ ಮೊದಲು ಈಗಿರುವ ಪ್ಯಾಕ್ಸ್ಗಳನ್ನು ಸದೃಢಗೊಳಿಸುವುದು ಮೊದಲ ಆದ್ಯತೆಯಾಗಬೇಕು. ಅಲ್ಲಿರುವ ಸಮಸ್ಯೆಗಳು ನಿವಾರಣೆಯಾಗಿ, ನೈಜ ರೈತ ಫಲಾನುಭವಿಗಳಿಗೆ ಸೌಲಭ್ಯಗಳು ದೊರೆಯುವಂತಾಗಬೇಕು. ಆದರೆ, ಈ ವಿಷಯದಲ್ಲಿ ನಿರಾಸಕ್ತಿ ಎದ್ದು ಕಾಣುತ್ತಿದ್ದು, ಹೊಸ ಸಂಘಗಳ ಸ್ಥಾಪನೆಗೆ ಅತ್ಯುತ್ಸಾಹ ತೋರಲಾಗುತ್ತಿದೆ. ಇದರ ಹಿಂದೆ ಮತಬ್ಯಾಂಕ್ನ್ನು ಸೃಷ್ಟಿಸಿಕೊಳ್ಳುವ ತಂತ್ರ ಅಡಗಿದೆಯೇ ಎಂಬ ಅನುಮಾನ ಬಾರದಿರದು. ಗ್ರಾ.ಪಂ.ವಾರು ಪ್ಯಾಕ್ಸ್ಗಳ ಸ್ಥಾಪನೆಯಿಂದ ಹೆಚ್ಚೆಚ್ಚು ರೈತರಿಗೆ ಅನುಕೂಲವಾಗುತ್ತದೆ. ಹೊಸಬರಿಗೆ ಸಾಲ ಇನ್ನಿತರ ಸವಲತ್ತುಗಳು ಸಿಗುತ್ತವೆ ಎಂಬುದರಲ್ಲಿ ಅನುಮಾನವಿಲ್ಲ. ಹಾಗಂತ, ನಬಾರ್ಡ್ ಮಾರ್ಗಸೂಚಿ, ಅರ್ಹತೆಗೆ ವಿಧಿಸಿದ ಮಾನದಂಡ, ನಿಬಂಧಕರ ಪೂರ್ವಾನುಮತಿ ಇತ್ಯಾದಿ ಉಲ್ಲಂಘಿಸಿ ಗಡಿಬಿಡಿಯಲ್ಲಿ ಸಂಘ ಸ್ಥಾಪಿಸಿದರೆ, ನೈಜ ಉದ್ದೇಶ ಈಡೇರುವುದಿಲ್ಲ. ಸಹಕಾರಿ ತತ್ತ್ವವೂ ಬಲ ಕಳೆದುಕೊಳ್ಳುತ್ತದೆ. ಹಾಗಾಗುವ ಮುನ್ನ ಸಂಬಂಧಪಟ್ಟವರು ಎಚ್ಚೆತ್ತುಕೊಂಡು, ಸೂಕ್ತ ಕ್ರಮಕ್ಕೆ ಮುಂದಾಗಲಿ.
