ಕರೊನಾದಿಂದ ಎಲ್ಲ ವಲಯಗಳಿಗೂ ಬಲವಾದ ಪೆಟ್ಟು ಬಿದ್ದು, ಆರ್ಥಿಕತೆಗೆ ಹಿನ್ನಡೆಯಾಗಿದೆ ಎಂಬುದು ಗೊತ್ತಿರುವಂಥದ್ದೇ. ಆದರೆ, ಕೆಲ ತಿಂಗಳಿಂದ ನಿಧಾನವಾಗಿ ಒಂದೊಂದೇ ರಂಗಗಳು ಚೇತರಿಕೆಯತ್ತ ಮುಖ ಮಾಡಿವೆ. ಆರ್ಥಿಕ ಚಟುವಟಿಕೆಗಳೂ ವೇಗ ಪಡೆದಿವೆ. ಅನಿರೀಕ್ಷಿತ ಸಂಕಷ್ಟಗಳು ಎರಗಿದಾಗ ಅದನ್ನು ಸೂಕ್ಷ್ಮವಾಗಿ ನಿರ್ವಹಿಸಬೇಕಾಗುತ್ತದೆ. ಉಳಿದ ವಲಯಗಳು ಸಾಮಾನ್ಯ ಸ್ಥಿತಿಗೆ ಮರಳುತ್ತಿದ್ದರೂ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮದ ಸಂಕಷ್ಟ ಮಾತ್ರ ಬಗೆಹರಿದಿಲ್ಲ. ಸಿಬ್ಬಂದಿ ವೇತನಕ್ಕೂ ಹಣವಿಲ್ಲದಂತೆ ಪರದಾಡುವ ಸ್ಥಿತಿ. ನಾಲ್ಕೂ ನಿಗಮಗಳು ತೀವ್ರ ಆರ್ಥಿಕ ನಷ್ಟಕ್ಕೆ ಸಿಲುಕಿವೆ. ‘ಸಿಬ್ಬಂದಿ ವೇತನ ಪಾವತಿಗೆ, ಬಸ್ಗಳಿಗೆ ಇಂಧನ ಹಾಕಿಸಲು ನಮ್ಮ ಬಳಿ ಹಣವಿಲ್ಲ’ ಎಂದು ಸಾರಿಗೆ ಸಚಿವರೇ ಹೇಳಿಕೊಂಡಿರುವುದು ಹದಗೆಟ್ಟಿರುವ ಪರಿಸ್ಥಿತಿಗೆ ಸಾಕ್ಷಿ. ಬಸ್ಗಳ ಸಂಚಾರ ಆರಂಭವಾಗಿದ್ದರೂ, ಪೂರ್ಣ ಪ್ರಮಾಣದಲ್ಲಿ ಆಗಿಲ್ಲ. ಕರೊನಾ ಆತಂಕ ತಗ್ಗಿರುವ ಹಿನ್ನೆಲೆಯಲ್ಲಿ ಎಲ್ಲ ಬಸ್ಗಳ ಸಂಚಾರ ಪುನರಾರಂಭಿಸಬೇಕು. ಪ್ರಯಾಣಿಕರ ಹಾಗೂ ಸಿಬ್ಬಂದಿ ಹಿತವನ್ನು ಮೊದಲ ಆದ್ಯತೆಯಾಗಿ ಪರಿಗಣಿಸಬೇಕು. ಸಕಾಲಕ್ಕೆ ಸಂಬಳ ಸಿಗದೆ ಸಿಬ್ಬಂದಿ ವರ್ಗ ಪರದಾಡುವಂತಾಗಿದ್ದು, ಸಮಸ್ಯೆಯನ್ನು ಆದಷ್ಟು ಬೇಗ ಬಗೆಹರಿಸಿ ಎಂಬ ಬೇಡಿಕೆ ಮುಂದಿಟ್ಟಿದ್ದಾರೆ.
