ಎರಡು ಹಂತದ ಅನ್ಲಾಕ್ ಪ್ರಕ್ರಿಯೆಯಲ್ಲಿ ಹಲವು ವಿನಾಯಿತಿಗಳನ್ನು ಘೋಷಿಸಿದ್ದ ಸರ್ಕಾರ ಇಂದಿನಿಂದ (ಸೋಮವಾರ) ಜಾರಿಯಾಗಲಿರುವ ಮೂರನೇ ಹಂತದ ಅನ್ಲಾಕ್ನಲ್ಲಿ ಮತ್ತಷ್ಟು ವಿನಾಯಿತಿಗಳನ್ನು ನೀಡಿದೆ. ರಾತ್ರಿ 9 ಗಂಟೆವರೆಗೆ ವ್ಯಾಪಾರ ವಹಿವಾಟಿಗೆ ಅವಕಾಶ ನೀಡಲಾಗಿದ್ದು, ವಾರಾಂತ್ಯ ಕರ್ಫ್ಯೂ ರದ್ದುಗೊಳಿಸಲಾಗಿದೆ. ಮಾಲ್ ಮತ್ತು ದೇಗುಲಗಳು ತೆರೆಯಲಿವೆ. ಅಂದರೆ, ಕನಿಷ್ಠ ನಿರ್ಬಂಧಗಳು ಮುಂದುವರಿಯಲಿದ್ದು, ಸಿನಿಮಾ ಥಿಯೇಟರ್ ಮತ್ತು ಶಾಲೆಗಳ ಆರಂಭ ಸದ್ಯಕ್ಕಂತೂ ಇಲ್ಲ. ಆದರೆ, ಇತರ ವ್ಯಾಪಾರ ವಹಿವಾಟಿನ ಸಮಯ ವಿಸ್ತರಣೆ ಆಗಿರುವುದರಿಂದ ಆರ್ಥಿಕ ಚಟುವಟಿಕೆಗಳು ವೇಗ ಪಡೆದುಕೊಳ್ಳಲಿವೆ. ಕರೊನಾ ಸೃಷ್ಟಿಸಿರುವ ಸಂದಿಗ್ಧತೆಯೇ ವಿಚಿತ್ರ. ಇಲ್ಲಿ ಜೀವ ಉಳಿಸಲು ಆದ್ಯತೆ ನೀಡಬೇಕು, ಜೀವನ ಸಾಗಿಸಲೂ ಅನುವು ಮಾಡಿಕೊಡಬೇಕು. ಇದೆರಡರ ಸಮತೋಲನ ಅಗತ್ಯ. ಯಾವುದನ್ನೂ ನಿರ್ಲಕ್ಷಿಸುವಂತಿಲ್ಲ. ದೀರ್ಘಾವಧಿಗೆ ಜನಜೀವನವನ್ನು, ಆರ್ಥಿಕ ಚಟುವಟಿಕೆಗಳನ್ನು ಸ್ತಬ್ಧಗೊಳಿಸುವುದು ಸಾಧ್ಯವಿಲ್ಲ. ಹಂತ-ಹಂತವಾಗಿ ಸ್ಥಿತಿ ಸಾಮಾನ್ಯಕ್ಕೆ ಬರಲೇಬೇಕು. ಹಾಗಾಗಿಯೇ, ತಜ್ಞರ ಅಭಿಪ್ರಾಯ, ಸಲಹೆಯನ್ನು ಪರಿಗಣಿಸಿ ರಾಜ್ಯ ಸರ್ಕಾರ ನಿರ್ಬಂಧಗಳನ್ನು ಕ್ರಮೇಣ ಸಡಿಲಿಸುತ್ತ ಬಂದಿದೆ.
