ಪುಟ್ಟ ದ್ವೀಪರಾಷ್ಟ್ರ ಶ್ರೀಲಂಕಾದಲ್ಲಿ ಈಗ ತುರ್ತು ಪರಿಸ್ಥಿತಿ. ಜನಜೀವನ ದುರ್ಭರವಾಗಿದ್ದು, ವಿದೇಶಿ ವಿನಿಮಯ ತೀವ್ರ ಇಳಿದಿದ್ದರಿಂದಾಗಿ ಅಗತ್ಯ ಆಹಾರವಸ್ತುಗಳು ಮತ್ತು ಇಂಧನವನ್ನು ಆಮದು ಮಾಡಿಕೊಳ್ಳಲು ಸಹ ಆಗುತ್ತಿಲ್ಲ. ಪೆಟ್ರೋಲ್, ಡೀಸೆಲ್, ಅಕ್ಕಿ, ಬೇಳೆ, ಹಾಲು ಸೇರಿ ಜೀವನಾವಶ್ಯಕ ವಸ್ತುಗಳ ದರಗಳು ಗಗನಮುಖಿಯಾಗಿವೆ. ಸಾಲದ ದೊಡ್ಡ ಹೊರೆಯೂ ಅದರ ಮೇಲಿದೆ. ಶ್ರೀಲಂಕಾ ನಾಯಕತ್ವಕ್ಕೆ ಈ ಸಮಸ್ಯೆಯ ಅಂದಾಜು ಇದ್ದರೂ, ಪರಿಹಾರ ಹುಡುಕುವಲ್ಲಿ ಅದು ಸೋತಿದೆ. ಇದೇ ಸ್ಥಿತಿ ಮುಂದುವರಿದರೆ ದೊಡ್ಡ ಮಾನವೀಯ ಸಂಕಷ್ಟವನ್ನು ಈ ದ್ವೀಪರಾಷ್ಟ್ರ ಅನುಭವಿಸಬೇಕಾಗುತ್ತದೆ. ಚೀನಾ ತನ್ನ ವಿಸ್ತರಣಾನೀತಿಯ ಭಾಗವಾಗಿ, ಹಲವು ರಾಷ್ಟ್ರಗಳಿಗೆ ಸಹಾಯ ಮಾಡುವ ನೆಪದಲ್ಲಿ ಅವುಗಳನ್ನು ಸಾಲಗಾರ ರಾಷ್ಟ್ರಗಳಾಗಿ ಮಾಡಿರುವುದು ಗೊತ್ತಿರುವಂಥದ್ದೇ. ಅದರಲ್ಲೂ, ಭಾರತದ ನೆರೆಯ ಶ್ರೀಲಂಕಾ, ಬಾಂಗ್ಲಾದೇಶ, ನೇಪಾಳ, ಮ್ಯಾನ್ಮಾರ್ನಲ್ಲಿ ಮೇಲುಗೈ ಸ್ಥಾಪಿಸಲು ಡ್ರಾ್ಯಗನ್ ರಾಷ್ಟ್ರ ಕೈಗೊಂಡ ಕ್ರಮಗಳು ಒಂದೆರಡಲ್ಲ. ನೇಪಾಳ ಮತ್ತು ಬಾಂಗ್ಲಾದೇಶ ರಾಷ್ಟ್ರಗಳು ಈ ಬೆಳವಣಿಗೆಗಳನ್ನು ಸೂಕ್ಷ್ಮವಾಗಿ ಅವಲೋಕಿಸಿ, ಪ್ರಮಾದಗಳನ್ನು ಸರಿಪಡಿಸಿಕೊಳ್ಳಲು ಇದು ಸಕಾಲ. ಮತ್ತೊಂದೆಡೆ, ಜಾಗತಿಕವಾಗಿ ಭಾರತದ ಬಗ್ಗೆ ವಿಶ್ವಾಸ ಹೆಚ್ಚಿದೆ, ಭಾರತ ಭರವಸೆಯಾಗಿ ಕಾಣುತ್ತಿದೆ ಎಂಬುದಕ್ಕೆ ಕಳೆದ 15 ದಿನಗಳಲ್ಲಿ ದೇಶಕ್ಕೆ 10 ರಾಷ್ಟ್ರಗಳ ವಿದೇಶಾಂಗ ಸಚಿವರು ಭೇಟಿ ನೀಡಿರುವುದೇ ಸಾಕ್ಷಿ. ಪ್ರಜಾಪ್ರಭುತ್ವದ ಮೌಲ್ಯಗಳಿಗೆ ಮತ್ತು ಜನರ ಆಶಯಗಳಿಗೆ ಬದ್ಧವಾಗಿ ಆಡಳಿತಗಾರರು ನಡೆದುಕೊಂಡಾಗ, ಯಾವುದೇ ದೇಶ ನೆಮ್ಮದಿಯ ದಿನಗಳನ್ನು ಕಾಣಬಹುದು. ಅಧಿಕಾರಲಾಲಸೆ, ಅರಾಜಕತೆಯೇ ಉಸಿರಾಡುತ್ತಿದ್ದರೆ ಏನಾಗುತ್ತದೆ ಎಂಬುದಕ್ಕೆ ಪಾಕಿಸ್ತಾನ ಮತ್ತು ಶ್ರೀಲಂಕಾದ ಬೆಳವಣಿಗೆಗಳು ನಿದರ್ಶನ.
