ತಾಪಮಾನ ಹೆಚ್ಚಳದಿಂದ ಅಕಾಲಿಕ ಮಳೆ ಸೇರಿದಂತೆ ಇತರ ಪ್ರಾಕೃತಿಕ ವಿಕೋಪಗಳು ಹೆಚ್ಚುತ್ತಿದ್ದು, ಮುಂಬರುವ ವರ್ಷಗಳಲ್ಲಿ ಸ್ಥಿತಿ ಮತ್ತಷ್ಟು ಕಳವಳಕಾರಿಯಾಗುವ ಬಗ್ಗೆ ವಿಶ್ವಸಂಸ್ಥೆಯ ವರದಿ ಕೆಲ ದಿನಗಳ ಹಿಂದಷ್ಟೇ ಎಚ್ಚರಿಸಿದೆ. ಪರಿಸರ ಮತ್ತು ಅಭಿವೃದ್ಧಿ ಈ ಎರಡರಲ್ಲಿ ಸಮತೋಲನ ಸಾಧಿಸಬೇಕಿದೆ. ಪರಿಸರವನ್ನು ಶೋಷಿಸಿ ಮಾಡುವ ‘ಅಭಿವೃದ್ಧಿ’ ಎಲ್ಲ ದೃಷ್ಟಿಯಿಂದಲೂ ಮಾರಕವಾಗಿ ಪರಿಣಮಿಸುತ್ತಿದೆ. ಸುಸ್ಥಿರ ಅಭಿವೃದ್ಧಿಯ ಕುರಿತಂತೆ ಚರ್ಚೆಗಳು ಸಾಕಷ್ಟು ನಡೆದಿವೆಯಾದರೂ, ಅಭಿವೃದ್ಧಿ ಹೊಂದಿದ ಮತ್ತು ಹೊಂದುತ್ತಿರುವ ರಾಷ್ಟ್ರಗಳು ಈ ಮಾದರಿಯನ್ನೇ ಆಯ್ದುಕೊಳ್ಳಬೇಕಾಗಿರುವುದು ಅನಿವಾರ್ಯವಾಗಿದೆ. ಅಂತಾರಾಷ್ಟ್ರೀಯ ಸವಾಲುಗಳನ್ನು ಏಕತೆ, ಸಮನ್ವಯ, ಸಹಕಾರದ ಬಲದಿಂದಲೇ ಪರಿಹರಿಸಲು ಸಾಧ್ಯ. ಈ ನಿಟ್ಟಿನಲ್ಲಿ ಜಿ-20 ಶೃಂಗಸಭೆ ಉತ್ತಮ ಸಂದೇಶವಂತೂ ರವಾನಿಸಿದ್ದು, ನಿರ್ಣಯಗಳು ಅನುಷ್ಠಾನದ ರೂಪಕ್ಕೆ ಬರಬೇಕು.
