ಈ ನಡುವೆ ವಿತ್ತ ಸಚಿವರು ತೆರಿಗೆ ಸಂಗ್ರಹದ ಕೊರತೆಯನ್ನು ಹೇಗೆ ನಿಭಾಯಿಸಲಿದ್ದಾರೆ, ಕರೊನಾ ಹೊಡೆತದಿಂದ ಸೊರಗಿರುವ ಹಲವು ವಲಯಗಳಿಗೆ ಹೇಗೆ ಚೈತನ್ಯ ತುಂಬಲಿದ್ದಾರೆ, ಈ ಬಜೆಟ್ ಜನಸಾಮಾನ್ಯರಿಗೆ ಹೊರೆ ಆಗಲಿದೆಯೋ ಅಥವಾ ನಿರಾಳವಾಗಿಸಲಿದೆಯೋ ಹೀಗೆ ಹಲವು ಕುತೂಹಲಭರಿತ ಪ್ರಶ್ನೆಗಳಿಗೆ ಇಂದು ಉತ್ತರ ಸಿಗಲಿದೆ. ಆದರೆ, ನಿರೀಕ್ಷೆಗಳ ಭಾರ ಹೆಚ್ಚಿರುವ ಜಟಿಲ ಬಜೆಟ್ ಇದಾಗಿದೆ ಎಂಬುದಂತೂ ವಾಸ್ತವ. ಪಂಚರಾಜ್ಯಗಳ ಚುನಾವಣೆಯೂ ಸಮೀಪಿಸಿರುವುದರಿಂದ ಸರ್ಕಾರ ಸಮತೋಲಿತ ಮಾರ್ಗ ಅನುಸರಿಸಲಿದೆ ಎಂಬುದು ತಜ್ಞರ ಅನಿಸಿಕೆ. ಪ್ರತಿ ಬಜೆಟ್ ಹೊತ್ತಲ್ಲೂ ಒಂದಷ್ಟು ನಿರೀಕ್ಷೆಗಳು ಇದ್ದೇ ಇರುತ್ತವೆ. ಆದರೆ, ಈ ಬಾರಿ ಪರಿಸ್ಥಿತಿ ಭಿನ್ನವಾಗಿದೆ, ಕ್ಲಿಷ್ಟವಾಗಿದೆ. ಹಾಗಾಗಿ, ಸರ್ಕಾರದ ಘೋಷಣೆಗಳು, ಮುಂದಿನ ಹಾದಿ ಭಾರಿ ಕುತೂಹಲ ಮೂಡಿಸಿರುವುದಂತೂ ಹೌದು. ರಫ್ತುಕೇಂದ್ರಿತ ಆರ್ಥಿಕತೆಗೆ ಉತ್ತೇಜನ, ಆತ್ಮನಿರ್ಭರ ಭಾರತದಂಥ ಸ್ವಾವಲಂಬಿ ಯೋಜನೆಗಳು ಮತ್ತು ಸಾಮಾಜಿಕ ಸುರಕ್ಷತೆ ಒದಗಿಸುವ ಯೋಜನೆಗಳ ಅಗತ್ಯವಿದೆ. ಮೂಲಸೌಕರ್ಯ, ಕೃಷಿ ವಲಯಗಳಲ್ಲಿ ಹೆಚ್ಚಿನ ಹೂಡಿಕೆಗೆ ದಾರಿ ಕಂಡುಕೊಳ್ಳಬೇಕಿದೆ.
