ರೀಲ್ಸ್‌ಗೆ ಡಮ್ಮಿ ಗನ್ ಪೂರೈಕೆದಾರನಿಗೂ ಸಂಕಷ್ಟ

ಬೆಂಗಳೂರು: ರೀಲ್ಸ್ ಮಾಡಿ ಫೇಮಸ್ ಆಗುವ ತವಕದಲ್ಲಿ ಡಮ್ಮಿ ಗನ್ ಬಳಸಿದ್ದ ಅರುಣ್ ಕಟಾರೆ ಬಂಧನ ಪ್ರಕರಣದಲ್ಲಿ ಗನ್ ಪೂರೈಸಿದ್ದ ಕಂಪನಿ ಮಾಲೀಕನಿಗೆ ಕೊತ್ತನೂರು ಪೊಲೀಸರು ನೋಟಿಸ್ ಜಾರಿ ಮಾಡಿದ್ದಾರೆ.

ಮೈಸೂರು ನಗರದ ಸಾಹಿಲ್ ಗನ್ ಮಾಸ್ಟರ್ ಅಲೀಂ ಪಾಷಾ ಎಂಬಾತನಿಗೆ ಕೊತ್ತನೂರು ಪೊಲೀಸರು ನೋಟಿಸ್ ಜಾರಿ ಮಾಡಿ ಕೂಡಲೆ ವಿಚಾರಣೆಗೆ ಬರುವಂತೆ ಸೂಚನೆ ನೀಡಿದ್ದಾರೆ.

ಜೂನ್ 9ರಂದು ಅರುಣ್ ಕಟಾರೆ, ಡಮ್ಮಿ ಎಕೆ 47 ಗನ್ ಹಿಡಿದು ಸಾರ್ವಜನಿಕ ಸ್ಥಳದಲ್ಲಿ ರೀಲ್ಸ್ ಮಾಡಿ ಜಾಲತಾಣದಲ್ಲಿ ಅಪ್‌ಲೋಡ್ ಮಾಡಿದ್ದ. ಈ ಬಗ್ಗೆ ಸ್ವಯಂ ಪ್ರೇರಿತ ಪ್ರಕರಣ ದಾಖಲು ಮಾಡಿಕೊಂಡ ಪೊಲೀಸರು, ಅರುಣ್ ವಿರುದ್ಧ ಆರ್ಮ್ಸ್ ಆಕ್ಟ್ ಅನ್ವಯ ಪ್ರಕರಣ ದಾಖಲಿಸಿ ಬಂಧಿಸಿದ್ದರು. ವಿಚಾರಣೆ ವೇಳೆ ಸಿನಿಮಾ ಚಿತ್ರೀಕರಣಕ್ಕೆ ಡಮ್ಮಿ ಗನ್‌ಗಳನ್ನು ಪೂರೈಕೆ ಮಾಡುವ ಸಾಹಿಲ್ ಗನ್ ಮಾಸ್ಟರ್ ಅಲೀಂ ಪಾಷಾ ಬಳಿ ಬಾಡಿಗೆಗೆ ಪಡೆದಿರುವುದಾಗಿ ಅರುಣ್ ಹೇಳಿಕೆ ನೀಡಿದ್ದರು.

ಇದರ ಮೇರೆಗೆ ಅಲೀಂ ಪಾಷಾಗೆ ನೋಟಿಸ್ ಜಾರಿ ಮಾಡಿರುವ ಕೊತ್ತನೂರು ಪೊಲೀಸರು, ರೀಲ್ಸ್‌ನಲ್ಲಿ ಬಳಸಿದ್ದ ಎಕೆ 47 ಗನ್‌ಗಳ ನೈಜತೆ ಪರಿಶೀಲನೆ ನಡೆಸಲು ಹಾಜರುಪಡಿಸಿ, ಈ ಸಂಬಂಧ ಯಾವ ಪ್ರಾಧಿಕಾರದಿಂದ ಅನುಮತಿ ಪಡೆದುಕೊಂಡಿದ್ದೀರ. ಜಿಎಸ್‌ಟಿ ಪಾವತಿದ ಸಟಿಫಿಕೇಟ್, ಗನ್ ಬಾಡಿಗೆ ಪಡೆದಿರುವುದಕ್ಕೆ ಬಾಡಿಗೆ ಹಣ ಪಾವತಿ ಬಗ್ಗೆ ಸಾಕ್ಷಾೃಧಾರ ಒದಗಿಸಬೇಕು. ಇದಲ್ಲದೆ, ಬಾಡಿಗೆಗೆ ಕೊಟ್ಟಿದ್ದ ಗನ್‌ಗಳು ಅಸಲಿಯೇ ಅಥವಾ ನಕಲಿಯೇ ಎಂಬುದಕ್ಕೆ ನಿಮ್ಮ ಬಳಿ ಇರುವ ಪೂರಕ ಸಾಕ್ಷಾೃಧಾರಗಳನ್ನು ವಿಚಾರಣೆಗೆ ಹಾಜರುಪಡಿಸುವಂತೆ ನೋಟಿಸ್‌ನಲ್ಲಿ ಉಲ್ಲೇಖಿಸಲಾಗಿದೆ.