Dorothy Telugu Release: ತಮಿಳಿನಲ್ಲಿ ಸಕ್ಸಸ್ ಕಂಡಿರುವ ಕಾರ್ತಿಕ್ ಸುಬ್ಬರಾಜ್ ನಿರ್ದೇಶನದ ‘ಡೊರೊಥಿ’ ಸಿನಿಮಾ ಇದೀಗ ತೆಲುಗು ಪ್ರೇಕ್ಷಕರ ಮುಂದೆ ಬರ್ತಿದೆ. ಕೀರ್ತಿ ಸುರೇಶ್, ಸನಂತ್ ಹಾಗೂ ರಿಷಿಕಾಂತ್ ಮುಖ್ಯ ಪಾತ್ರದಲ್ಲಿರುವ ಈ ಚಿತ್ರವನ್ನು ರಾಣಾ ದಗ್ಗುಬಾಟಿ ಅವರ ಸ್ಪಿರಿಟ್ ಮೀಡಿಯಾ ತೆಲುಗಿನಲ್ಲಿ ರಿಲೀಸ್ ಮಾಡ್ತಿದೆ.
ಸೆಪ್ಟೆಂಬರ್ 30ರಂದು ಹೈದರಾಬಾದ್‌ನಲ್ಲಿ ನಡೆದ ಟ್ರೇಲರ್ ಲಾಂಚ್ ಕಾರ್ಯಕ್ರಮದಲ್ಲಿ ರಾಣಾ ದಗ್ಗುಬಾಟಿ ಚಿತ್ರತಂಡವನ್ನು ಹಾಡಿಹೊಗಳಿದ್ದಾರೆ. ಸುಮಾರು ಒಂದು ತಿಂಗಳ ಹಿಂದೆ ಕಾರ್ತಿಕ್ ಸುಬ್ಬರಾಜ್ ತಮ್ಮನ್ನು ಸಂಪರ್ಕಿಸಿದ್ದರು. ಬಳಿಕ ಚಿತ್ರದ ಬಗ್ಗೆ ಹೆಚ್ಚಿನ ಮಾಹಿತಿ ಇಲ್ಲದೇ ಸಿನಿಮಾ ನೋಡಿದಾಗ, ಇಂಟರ್ವೆಲ್ ಹೊತ್ತಿಗೆ ಕಥೆ ಅನಿರೀಕ್ಷಿತ ತಿರುವು ಪಡೆದುಕೊಂಡಿತ್ತು ಎಂದು ರಾಣಾ ಹೇಳಿದ್ದಾರೆ.
ರಜಿನಿಕಾಂತ್ ಅವರಂತಹ ಸೂಪರ್‌ಸ್ಟಾರ್ ಜೊತೆ ಕೆಲಸ ಮಾಡಿರುವ ಕಾರ್ತಿಕ್ ಸುಬ್ಬರಾಜ್ ಇಂಥ ವಿಭಿನ್ನ ಕಥೆ ಆಯ್ಕೆ ಮಾಡಿದ್ದು ಅಚ್ಚರಿ ಮೂಡಿಸಿತು ಎಂದರು. ಸಾಮಾನ್ಯವಾಗಿ ಮುಕ್ತವಾಗಿ ಚರ್ಚೆಯಾಗದ ಹಲವು ವಿಚಾರಗಳನ್ನು ಸಿನಿಮಾ ಹೇಳುತ್ತದೆ. ಇದೇ ಕಾರಣಕ್ಕೆ ಚಿತ್ರವನ್ನು ತೆಲುಗಿನಲ್ಲಿ ಬಿಡುಗಡೆ ಮಾಡಲು ಮುಂದಾದೆ ಎಂದು ರಾಣಾ ತಿಳಿಸಿದರು.
ರಿಷಿಕಾಂತ್ ಮತ್ತು ಸನಂತ್ ಅವರ ಅಭಿನಯಕ್ಕೂ ರಾಣಾ ಮೆಚ್ಚುಗೆ ವ್ಯಕ್ತಪಡಿಸಿದರು. ಇಬ್ಬರ ನಡುವಿನ ಸ್ನೇಹ ಹಾಗೂ ಅವರ ಪಯಣ ಪ್ರೇಕ್ಷಕರನ್ನು ಭಾವನಾತ್ಮಕವಾಗಿ ಕನೆಕ್ಟ್ ಮಾಡುತ್ತದೆ ಎಂದರು.
