ತಪ್ಪಿದ ಟ್ರಂಪ್ ವಿಮಾನ ಅಪಘಾತ

ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಪ್ರಯಾಣಿಸುತ್ತಿದ್ದ ಏರ್​ಫೋರ್ಸ್ ಒನ್ ವಿಮಾನದ ಸಂಭವನೀಯ ಅಪಘಾತವೊಂದು ತಪ್ಪಿದೆ.

ಮೇರಿ ಲ್ಯಾಂಡ್ ವಾಯುನೆಲೆಯಲ್ಲಿ ಭಾನುವಾರ ಸಂಜೆ 5.54ಕ್ಕೆ ವಿಮಾನ ಇಳಿದಿದ್ದು, ಈ ವೇಳೆ ಅಲ್ಲಿ ಡ್ರೋನ್ ಹಾರಾಟ ನಡೆದಿತ್ತು. ವಿಮಾನಕ್ಕೆ ಡ್ರೋನ್ ಅಪ್ಪಳಿಸುವುದು ಸ್ವಲ್ಪದರಲ್ಲೇ ತಪ್ಪಿದೆ ಎಂದು ವಾಯುನೆಲೆಯಲ್ಲಿದ್ದ ಅಧಿಕಾರಿಗಳು ತಿಳಿಸಿದ್ದಾರೆ. ಹಳದಿ ಹಾಗೂ ಕಪು್ಪ ಬಣ್ಣದಲ್ಲಿದ್ದ ಸಣ್ಣ ಸಾಧನ, ಕ್ರಾಸ್ ಆಕಾರದಲ್ಲಿತ್ತು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.

ಈ ಕುರಿತು ಮಾಹಿತಿ ಲಭ್ಯವಾಗಿದ್ದು ಪರಿಶೀಲನೆ ನಡೆಸಲಾಗುತ್ತಿದೆ ಎಂದು ಶ್ವೇತ ಭವನದ ಮಿಲಿಟರಿ ಕಚೇರಿ ಮತ್ತು ವಾಯುಪಡೆಯ ವಿಭಾಗ ಸ್ಪಷ್ಟಪಡಿಸಿದೆ. ಬಹುತೇಕ ಡ್ರೋನ್​ಗಳು ಕೆಲ ಕೆಜಿಗಳಷ್ಟು ಭಾರವಿರುತ್ತವೆ. ಜೆಟ್ ವಿಮಾನ ಉರುಳಿಸುವಷ್ಟು ಸಾಮರ್ಥ್ಯ ಅವುಗಳಿಗೆ ಇರುವುದಿಲ್ಲ. ಆದರೆ ಇದೇ ಗಾತ್ರಕ್ಕಿಂತ ಸ್ವಲ್ಪ ದೊಡ್ಡ ಹಕ್ಕಿಯಿಂದ ಹಾನಿ ಸಂಭವಿಸಬಹುದು. ಡ್ರೋನ್ ವಿಮಾನಕ್ಕಿಂತ ತುಸು ದೂರದಲ್ಲಿ ಹೋಗಿದೆ ಎಂದು ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.