ಮೆಕ್ಸಿಕೋ, ಕೆನಡಾ ಮತ್ತು ಜಪಾನ್ಗಳಿಗೆ ಹೋಲಿಸಿದರೆ ಭಾರತವು ಅಮೆರಿಕಕ್ಕೆ ಕಳುಹಿಸುವ ಸಂಪೂರ್ಣ ವಾಹನ ರಫ್ತುಗಳು ಬಹಳ ಕಡಿಮೆ. ಆದಾಗ್ಯೂ, ಅಮೆರಿಕದ ಹೊಸ ಆಮದು ಸುಂಕ ನೀತಿ ಭಾರತದ ವಾಹನ ವಲಯದ ಮೇಲೆ ಗಮನಾರ್ಹ ಪರಿಣಾಮಗಳನ್ನು ಬೀರಬಹುದು. ನಿರ್ದಿಷ್ಟವಾಗಿ ಹೇಳುವುದಾದರೆ, ಜಾಗತಿಕ ಪೂರೈಕೆ ಸರಪಳಿಗಳಲ್ಲಿ ಪ್ರಮುಖ ಪಾತ್ರವಹಿಸುತ್ತಿರುವ ಭಾರತದ ವಾಹನ ಬಿಡಿಭಾಗಗಳ ಉದ್ಯಮ, ಅಮೆರಿಕದ ಕಾರು ತಯಾರಕರಿಗೆ ಪ್ರಮುಖ ಪೂರೈಕೆದಾರರಾಗಿದೆ. ವರದಿಗಳ ಪ್ರಕಾರ, ಭಾರತವು 2023ರಲ್ಲಿ ಸುಮಾರು 1.5 ಶತಕೋಟಿ ಡಾಲರ್ ಆಟೋ ಬಿಡಿಭಾಗಗಳನ್ನು ಅಮೆರಿಕಕ್ಕೆ ರಫ್ತು ಮಾಡಿದೆ. ಆದರೆ, ಇದೀಗ ಹೊಸ ಆಮದು ಸುಂಕಗಳು ಈ ವಿಚಾರದಲ್ಲಿ ಪ್ರಮುಖ ಅಡೆತಡೆಗಳನ್ನು ಉಂಟುಮಾಡಬಹುದು. ಹೇಗೆಂದರೆ, ಸ್ವದೇಶಿ ಕಾರುಗಳಿಗೆ ಸುಂಕ ವಿನಾಯಿತಿ ಇರುವುದರಿಂದ ಅಲ್ಲಿನ ವಾಹನಗಳಿಗೆ ಬೇಡಿಕೆ ಹೆಚ್ಚಾಗಬಹುದು. ಇನ್ನು ಅಮೆರಿಕ ಮೂಲದ ವಾಹನ ತಯಾರಕರಿಗೆ ಇನ್ಪುಟ್ ವೆಚ್ಚವನ್ನು ಹೆಚ್ಚಿಸಬಹುದು ಮತ್ತು ಇದರಿಂದಾಗಿ ಭಾರತೀಯ ಬಿಡಿಭಾಗಗಳಿಗೆ ಬೇಡಿಕೆ ಕಡಿಮೆಯಾಗಬಹುದು. ಇನ್ನು ಪೂರೈಕೆದಾರರು ಲಾಭದ ವಿಚಾರದಲ್ಲಿ ಒತ್ತಡ ಎದುರಿಸಬೇಕಾಗುತ್ತದೆ. ಹೀಗಾಗಿ ಆಮದು ಸುಂಕ ಹೊಸ ತಲೆನೋವಾಗುವ ಸಾಧ್ಯತೆ ಇದೆ.
