ಶಿವು (ಶರತ್) ರಂಗಭೂಮಿ ಕಲಾವಿದ. ರಂಗತಂಡದಲ್ಲಿ ಮುಂಚೂಣಿಯಲ್ಲಿರುವ ಪ್ರತಿಭಾವಂತ. ಆತನ ಅಭಿನಯಕ್ಕೆ ಮನಸೋಲುವ ಗೆಳೆಯರು ಧಾರಾವಾಹಿ ಇಲ್ಲವೇ ಸಿನಿಮಾಗಳಲ್ಲಿ ನಟಿಸುವಂತೆ ತಿಳಿಸುತ್ತಾರೆ. ಹಿನ್ನೆಲೆ ಇರದ ಕಾರಣ ಶಿವು ಸುಮ್ಮನಾಗುತ್ತಾನೆ. ಆದರೆ, ಒಂದು ದಿನ ರಂಗನಿರ್ದೇಶಕರು ಆತನ ನಟನೆ ಕಂಡು ಬೆಂಗಳೂರಿಗೆ ತೆರಳಿ ಅಲ್ಲಿ ಸಿನಿಮಾ ನಿರ್ದೇಶಕನನ್ನು ಭೇಟಿಯಾಗುವಂತೆ ತಿಳಿಸುತ್ತಾರೆ. ಹೀರೋ ಆಗುವ ಆಸೆ ಹೊತ್ತು ಬೆಂಗಳೂರಿಗೆ ಬರುವ ಶಿವುಗೆ ಸಿಗುವುದು ಅವಮಾನ ಮತ್ತು ನಿರಾಸೆ. ಬಳಿಕ ಆತ ಸಿನಿಮಾದಿಂದ ದೂರವಾಗಿ ಜೀವನಕ್ಕಾಗಿ ಆಟೋ ಚಾಲಕನಾಗುತ್ತಾನೆ. ಹಾಗಾದರೆ, ಸಿನಿಮಾ ಹೀರೋ ಆಗಬೇಕೆಂಬ ಶಿವು ಕನಸು ಅಷ್ಟಕ್ಕೆ ನಿಲ್ಲುತ್ತದೆಯೇ? ಆತನ ಜೀವನದಲ್ಲಿ ಏನಾದರೂ ತಿರುವು ಸಿಗುತ್ತದೆಯೇ? ಆಟೋ ಡ್ರೈವರ್ ಶಿವು ಹೇಗೆ ‘ದೊಡ್ಮನ್ಸ’ ಆಗುತ್ತಾನೆ ಎಂಬುದೇ ಚಿತ್ರದ ಮುಂದುವರಿದ ಕಥೆ. ಮೊದಲು ಆಟೋ ಚಾಲಕನ ಜೀವನ ತೋರಿಸಿದ್ದು, ಈ ಹಿನ್ನೆಲೆಯಲ್ಲಿ ಸಿನಿಮಾ ಕನಸಿನ ಚಿತ್ರಣ ನೀಡಲಾಗಿದೆ. ಶರತ್ ಕೃಷ್ಣಗೆ ನಟನೆ ಜತೆಗೆ ನಿರ್ದೇಶನದ ಜವಾಬ್ದಾರಿ ಭಾರವಾಗಿದೆ ಅನಿಸುತ್ತದೆ. ದೃಶ್ಯಗಳು ದೀರ್ಘವಾಗಿದ್ದು, ಹೀರೋಯಿಸಂಗೆ ಹೆಚ್ಚು ಆದ್ಯತೆ ನೀಡಿದಂತಿದೆ. ಹಾಡು, ಹರಟೆಗೆ ಕತ್ತರಿ ಹಾಕಿ ಆಟೋ ಚಾಲಕನ ಸಿನಿಮಾ ಜರ್ನಿಯನ್ನು ಇನ್ನಷ್ಟು ಆಪ್ತವಾಗಿ ಸೆರೆಹಿಡಿಯುವ ಅವಕಾಶವಿತ್ತು. ಶರತ್ ಕೃಷ್ಣ ಚೆನ್ನಾಗಿ ಅಭಿನಯಿಸಿದರೂ, ಡಾನ್ಸ್, ಸಾಹಸ ದೃಶ್ಯಗಳಿಗೆ ಇನ್ನಷ್ಟು ತಯಾರಿ ಬೇಕಿತ್ತು. ರೇಷ್ಮಾ ಲಿಂಗರಾಜಪ್ಪ ಸರಳ ನಟನೆ ಮೂಲಕ ಗಮನ ಸೆಳೆಯುತ್ತಾರೆ. ಹುಲಿ ಕಾರ್ತಿಕ್ ನಗಿಸುತ್ತಾರೆ. ಹೊಸ ಕಲಾವಿದರು ಕೊಟ್ಟ ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ್ದಾರೆ. ಆನಂದ್ ಇಳಯರಾಜ ಕ್ಯಾಮರಾ ವರ್ಕ್ ಚೆನ್ನಾಗಿ ಮೂಡಿಬಂದಿದೆ.
