Phone in Toilet: ಶೌಚಾಲಯಕ್ಕೆ ಹೋಗುವಾಗ ಕೈಯಲ್ಲಿ ಮೊಬೈಲ್ ಇರಲೇಬೇಕು. ಕುಳಿತ ತಕ್ಷಣ ಸೋಷಿಯಲ್ ಮೀಡಿಯಾ, ರೀಲ್ಸ್ ಅಥವಾ ವಿಡಿಯೋ ನೋಡೋದು ಶುರು. ಐದು ನಿಮಿಷ ಅಂತ ಹೋಗಿ, ಅರ್ಧ ಗಂಟೆ ಕಳೆದಿದ್ದೇ ಗೊತ್ತಾಗಲ್ಲ. ಇಂದಿನ ದಿನಗಳಲ್ಲಿ ಇದು ಹಲವರ ದಿನಚರಿಯ ಭಾಗವಾಗಿದೆ.
ಆದ್ರೆ ಶೌಚಾಲಯದಲ್ಲಿ ಅಗತ್ಯಕ್ಕಿಂತ ಹೆಚ್ಚು ಹೊತ್ತು ಕುಳಿತು ಮೊಬೈಲ್ ನೋಡುವುದು ಆರೋಗ್ಯಕ್ಕೆ ಒಳ್ಳೆಯದಲ್ಲ. ಹಾಗಾದ್ರೆ ಈ ಅಭ್ಯಾಸ ಯಾಕೆ ಬರುತ್ತೆ? ಇದರಿಂದ ಆಗುವ ಸಮಸ್ಯೆಗಳೇನು? ಈ ಅಭ್ಯಾಸವನ್ನು ಹೇಗೆ ಬಿಡಬಹುದು? ಇಲ್ಲಿದೆ ಸರಳ ಮಾಹಿತಿ.
ಮೊಬೈಲ್ ನೋಡ್ತಾ ಸಮಯ ಹೋಗಿದ್ದೇ ಗೊತ್ತಾಗಲ್ಲ
ಸೋಷಿಯಲ್ ಮೀಡಿಯಾ, ರೀಲ್ಸ್ ಅಥವಾ ಗೇಮ್ನಲ್ಲಿ ತೊಡಗಿಕೊಂಡರೆ ಸಮಯದ ಅರಿವೇ ಇರುವುದಿಲ್ಲ. ಒಂದು ವಿಡಿಯೋ ಬಳಿಕ ಮತ್ತೊಂದು ಅಂತ ಸ್ಕ್ರಾಲ್ ಮಾಡುತ್ತಾ ಹೋದರೆ, ‘ಎರಡು ನಿಮಿಷ ನೋಡ್ತೀನಿ’ ಅಂತ ಶುರು ಮಾಡಿದ್ದು ಸಾಕಷ್ಟು ಹೊತ್ತಿನವರೆಗೆ ಮುಂದುವರಿಯಬಹುದು.
ಶೌಚಾಲಯವೇ ‘ಮೀ ಟೈಮ್’ ಆಗಿಬಿಟ್ಟಿದೆಯಾ?
ಮನೆ, ಆಫೀಸ್ ಕೆಲಸಗಳ ನಡುವೆ ಕೆಲವರಿಗೆ ಶೌಚಾಲಯದಲ್ಲಿ ಮಾತ್ರ ಏಕಾಂತ ಸಿಗುತ್ತದೆ. ಯಾರೂ ಡಿಸ್ಟರ್ಬ್ ಮಾಡಲ್ಲ ಅಂತ ಅಲ್ಲೇ ಮೊಬೈಲ್ ನೋಡುತ್ತಾ ರಿಲ್ಯಾಕ್ಸ್ ಆಗುವ ಅಭ್ಯಾಸ ಬೆಳೆಬಹುದು. ಸಮಸ್ಯೆ ಮೊಬೈಲ್ನಲ್ಲಲ್ಲ, ಶೌಚಾಲಯವನ್ನೇ ಮೊಬೈಲ್ ಬಳಸುವ ಜಾಗವನ್ನಾಗಿ ಮಾಡಿಕೊಳ್ಳುವುದರಲ್ಲಿ..
ಹೆಚ್ಚು ಹೊತ್ತು ಕುಳಿತುಕೊಳ್ಳುವುದು ಯಾಕೆ ಒಳ್ಳೆಯದಲ್ಲ?
ಶೌಚಾಲಯದ ಸೀಟಿನ ಮೇಲೆ ದೀರ್ಘಕಾಲ ಕುಳಿತುಕೊಳ್ಳುವುದರಿಂದ ಗುದದ್ವಾರದ ಸುತ್ತಲಿನ ರಕ್ತನಾಳಗಳ ಮೇಲೆ ಒತ್ತಡ ಹೆಚ್ಚಾಗಬಹುದು. ವಿಶೇಷವಾಗಿ ಮಲವಿಸರ್ಜನೆಗೆ ಒತ್ತಾಯ ಮಾಡುತ್ತಾ ಹೆಚ್ಚು ಹೊತ್ತು ಕುಳಿತುಕೊಳ್ಳುವ ಅಭ್ಯಾಸ ಮೂಲವ್ಯಾಧಿ ಸೇರಿದಂತೆ ಕೆಲವು ಸಮಸ್ಯೆಗಳ ಅಪಾಯವನ್ನು ಹೆಚ್ಚಿಸಬಹುದು.
