Gujarat Diwali Bonus: ಗುಜರಾತ್‌ನ ಸೂರತ್‌ನಲ್ಲಿ ಜವಳಿ ಅಂಗಡಿಯ ಮಾಲೀಕರೊಬ್ಬರು ತಮ್ಮ ಬಳಿಯಿದ್ದ ಸುಮಾರು 20 ಸಿಬ್ಬಂದಿಗೆ ದೀಪಾವಳಿ ಹಬ್ಬದ ಸಂಭ್ರಮದಲ್ಲಿ ವಿಶಿಷ್ಟ ಹಾಗೂ ರಾಜಾತಿಥ್ಯದ ಶೈಲಿಯಲ್ಲಿ ಬೋನಸ್ ನೀಡಿದ್ದು, ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುವುದರೊಂದಿಗೆ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ
ಗುಜರಾತ್‌ನ ಸೂರತ್‌ನಲ್ಲಿರುವ ಮೋಟಾ ವರಾಛಾ ಪ್ರದೇಶದ ಸುದಾಮಾ ಚೌಕ್‌ನಲ್ಲಿ ವಿನೂತನ ಹಾಗೂ ಮಾದರಿ ಘಟನೆಯೊಂದು ನಡೆದಿದೆ. 'ಮಹಾದೇವ್ ಕ್ಲೋತ್ ಸೆಂಟರ್' ಜವಳಿ ಅಂಗಡಿಯ ಮಾಲೀಕ ರಾಮಸ್ವರೂಪ್ ಮುಂಡೆ ಅವರು, ತಮ್ಮ ಬಳಿ ಕೆಲಸ ಮಾಡುವ ಸಿಬ್ಬಂದಿಗೆ ಗರಿಗರಿಯಾದ ನೋಟುಗಳ ಕಂತೆಗಳನ್ನು ದೀಪಾವಳಿ ಬೋನಸ್ ಆಗಿ ನೀಡಿ ಮೆಚ್ಚುಗೆ ಗಳಿಸಿದ್ದಾರೆ
ಸಾಮಾನ್ಯವಾಗಿ ಎಲ್ಲೆಡೆ ಕವರ್‌ಗಳಲ್ಲಿ ಹಣ ನೀಡುವುದು ವಾಡಿಕೆ. ಆದರೆ ರಾಮಸ್ವರೂಪ್ ಅವರು ಬೆಳ್ಳಿಯ ಬಣ್ಣದ ಪೂಜಾ ತಟ್ಟೆಗಳಲ್ಲಿ ರೂ. 10 ರಿಂದ ರೂ. 500 ರವರೆಗಿನ ಹೊಸ ಹಾಗೂ ಗರಿಗರಿಯಾದ ನೋಟುಗಳ ಕಂತೆಗಳನ್ನು ಕಲಾತ್ಮಕವಾಗಿ ಜೋಡಿಸಿ ಇಟ್ಟಿದ್ದರು. ಪ್ರತಿಯೊಬ್ಬ ಉದ್ಯೋಗಿಗೂ ತಲಾ ರೂ. 1 ಲಕ್ಷಕ್ಕೂ ಅಧಿಕ ನಗದು ಹಣವನ್ನು ಬೋನಸ್ ರೂಪದಲ್ಲಿ ನೀಡಲಾಗಿದೆ.
