ಬಂದೀಖಾನೆ ಅಭಿವೃದ್ಧಿ ಮಂಡಳಿ ವಿಧೇಯಕ ಮೇಲಿನ ಚರ್ಚೆಯಲ್ಲಿ ಭಾಗವಹಿಸಿದ್ದ ಪ್ರತಿಪಕ್ಷಗಳ ಸದಸ್ಯರು, ಕಾರಾಗೃಹಗಳ ಕರ್ಮಕಾಂಡವನ್ನು ವಿಧಾನಸಭೆಯಲ್ಲಿ ಶುಕ್ರವಾರ ಎಳೆ ಎಳೆಯಾಗಿ ಬಿಚ್ಚಿಟ್ಟರು. ಲಂಚ ಸ್ವೀಕಾರದ ವಿಚಾರವಾಗಿ ಬಂದೀಖಾನೆಯ ಇಬ್ಬರು ಹಿರಿಯ ಅಧಿಕಾರಿಗಳ ಮಧ್ಯೆ ಸಂಘರ್ಷ ನಡೆದು, ತನಿಖೆಯೂ ಆಗುತ್ತದೆ. ಭ್ರಷ್ಟಾಚಾರ, ಅನೈತಿಕ- ಅವ್ಯವಹಾರಗಳಿಗೆ ಜೈಲು ಅಧಿಕಾರಿಗಳು ಮತ್ತು ಸಿಬ್ಬಂದಿ ಕುಮ್ಮಕ್ಕಿದೆ ಎಂದು ಆರೋಪಿಸಿದರು. ಪುಡಿ ರೌಡಿಗಳು ಜೈಲಿಗೆ ಹೋಗಿಬಂದ ಮೇಲೆ ದೊಡ್ಡಮಟ್ಟದ ರೌಡಿಸಂಗೆ ಸರ್ಟಿಫಿಕೇಟ್ ಪಡೆದಂತಿದೆ. ಸಾಮಾನ್ಯ ಕೈದಿಗಳನ್ನು ಗುಲಾಮರಂತೆ ನಡೆಸಿಕೊಳ್ಳುವ ಮಾಹಿತಿಯಿದ್ದು, ಜೈಲಿನ ಪರಿಸ್ಥಿತಿ ಸಮಗ್ರವಾಗಿ ಸುಧಾರಿಸುವ ತುರ್ತು ಅಗತ್ಯವಿದೆ ಎಂದು ಸರ್ಕಾರಕ್ಕೆ ಪ್ರತಿಪಕ್ಷಗಳು ಸದಸ್ಯರು ಆಗ್ರಹಿಸಿದರು. ಸುದೀರ್ಘ ಚರ್ಚೆಗೆ ಗೃಹ ಸಚಿವ ಆರಗ ಜ್ಞಾನೇಂದ್ರ ಉತ್ತರಿಸಿ, ಬಂದೀಖಾನೆ ಅಭಿವೃದ್ಧಿ ಮಂಡಳಿ ರಚನೆ ವಿಧೇಯಕದ ಮೇಲೆ ನಿರೀಕ್ಷೆಗೂ ಮೀರಿ ಸದನದಲ್ಲಿ ಚರ್ಚೆ ನಡೆದಿದ್ದು, ಕಾರಾಗೃಹಗಳಲ್ಲಿನ ನ್ಯೂನತೆ ಮೇಲೆ ಬೆಳಕು ಚೆಲ್ಲಿದೆ. ಸಲಹೆ, ಸೂಚನೆ ಹಾಗೂ ಅಭಿಪ್ರಾಯಗಳು, ಶಾಸಕರ ಕಾಳಜಿಯನ್ನು ಗಂಭೀರವಾಗಿ ಪರಿಗಣಿಸಿ ಅಧಿಕಾರಿಗಳು, ಸಿಬ್ಬಂದಿಗೆ ಕಟ್ಟೆಚ್ಚರ ನೀಡಲಾಗುವುದೆಂದು ಭರವಸೆ ನೀಡಿದರು.
