Hemanth Rao Interview ; ಗಾಂಧಿನಗರದ ವ್ಯವಸ್ಥೆ ಬದಲಾಗಿ, ಥಿಯೇಟರ್​ಗಾಗಿ ಸಿನಿಮಾ ಮಾಡಬೇಕು

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

"ಗೋಧಿಬಣ್ಣ ಸಾಧಾರಣ ಮೈಕಟ್ಟು', "ಕವಲುದಾರಿ', "ಸಪ್ತಸಾಗರದಾಚೆ ಎಲ್ಲೋ' ಚಿತ್ರಗಳನ್ನು ನಿರ್ದೇಶಿಸಿರುವ, ಬಾಲಿವುಡ್​ನ "ಅಂಧಾಧುನ್​' ಸಿನಿಮಾಗೆ ಅತ್ಯುತ್ತಮ ಚಿತ್ರಕಥೆ ರಾಷ್ಟ್ರಪ್ರಶಸ್ತಿ ಪಡೆದಿರುವ ಹೆಗ್ಗಳಿಕೆ ಹೇಮಂತ್​ ರಾವ್​ಗೆ ಸಲ್ಲುತ್ತದೆ. ನಿರ್ದೇಶನದ ಜತೆಗೆ ನಿರ್ಮಾಣದಲ್ಲೂ ತೊಡಗಿಸಿಕೊಂಡಿರುವ ಹೇಮಂತ್​, ಇದೀಗ ತಮ್ಮ ತಾಯಿಯ ನೆನಪಿನಲ್ಲಿ "ದಾಕ್ಷಾಯಿಣಿ ಟಾಕೀಸ್​' ಬ್ಯಾನರ್​ ಪ್ರಾರಂಭಿಸಿದ್ದಾರೆ. ಅದರಡಿಯಲ್ಲಿ ನಿರ್ಮಿಸಿರುವ ಮೊದಲ ಸಿನಿಮಾ "ಅಜ್ಞಾತವಾಸಿ'. "ಗುಳ್ಟೂ', "ಪೌಡರ್​' ಖ್ಯಾತಿಯ ಜನಾರ್ಧನ್​ ಚಿಕ್ಕಣ್ಣ ಈ ಚಿತ್ರಕ್ಕೆ ಆ್ಯಕ್ಷನ್​-ಕಟ್​ ಹೇಳಿದ್ದು, ರಂಗಾಯಣ ರು, ಪಾವನಾ ಗೌಡ, ಸಿದ್ದು ಮೂಲಿಮನಿ, ರವಿಶಂಕರ್​, ಶರತ್​ ಲೋಹಿತಾಶ್ವ ಪ್ರಮುಖ ತಾರಾಗಣದಲ್ಲಿದ್ದಾರೆ.

ಚಿತ್ರದ ಬಗ್ಗೆ ಹೇಮಂತ್​, "1997ರಲ್ಲಿ ಮಲೆನಾಡಿನಲ್ಲಿ ನಡೆಯುವ ಮರ್ಡರ್​ ಮಿಸ್ಟರಿ ಕಥೆಯಿದು. ಸಸ್ಪೆನ್ಸ್​ ಥ್ರಿಲ್ಲರ್​, ಮರ್ಡರ್​ ಮಿಸ್ಟರಿ ತುಂಬ ಕಷ್ಟದ ಜಾನರ್​. ಚಿತ್ರಕಥೆಯ ಮೂಲಕ ಜನರನ್ನು ಬೋರ್​ ಆಗದಂತೆ, ಕೊನೆಯವರೆಗೆ ನೋಡಿಸಿಕೊಂಡು ಹೋಗಬೇಕು. ಆ ಹೊಸತನ ಈ ಚಿತ್ರದಲ್ಲಿದೆ' ಎಂದು ಮಾಹಿತಿ ನೀಡುತ್ತಾರೆ.

ಜನ ನಮಗಿಂತ ಬುದ್ಧಿವಂತರು

"ಜನ ನನಗೆ ಸಮ ಅಥವಾ ನನಗಿಂತ ಬುದ್ಧಿವಂತರೇ ವಿನಃ ನನಗಿಂತ ಕಡಿಮೆ ಅಂತ ಯಾವತ್ತೂ ಅಂದುಕೊಂಡಿಲ್ಲ. ಕಥೆ ಚೆನ್ನಾಗಿದ್ದು, ಟ್ರೇಲರ್​ ವೀಸಿಯೇ ಸಿನಿಮಾ ನೋಡಬೇಕು ಅಂತ ಅನ್ನಿಸದರೆ, ಜನ ಆ ಚಿತ್ರ ನೋಡುತ್ತಾರೆ. ಅವರಿಗೆ ಏನು ಇಷ್ಟವಾಗುತ್ತೋ, ನನಗೂ ಅದೇ ಇಷ್ಟವಾಗುವುದು. ಸಿನಿಮಾ ಮಾಡುವಾಗ ಶ್ರಮದ ಜತೆ ಶಿಸ್ತು ಕೂಡ ಇರಬೇಕು. ಅದನ್ನು ನನ್ನ ಕರಿಯರ್​ನಲ್ಲೇ ಕಂಡುಕೊಂಡಿದ್ದೇನೆ. ಅದನ್ನೇ ನಂಬಿ ಸಿನಿಮಾ ಮಾಡುತ್ತೇನೆ' ಎಂದು ಹೇಮಂತ್​ ಹೇಳಿಕೊಳ್ಳುತ್ತಾರೆ.

ಗಾಂಧಿನಗರದ ವ್ಯವಸ್ಥೆ ಬದಲಾಗಬೇಕು

ಚಿತ್ರರಂಗಕ್ಕೆ ಬಂದ ಹೊಸತರಲ್ಲಿ "ಗೋಧಿಬಣ್ಣ ಸಾಧಾರಣ ಮೈಕಟ್ಟು' ಮಾಡಲು ಹೇಮಂತ್​ ಕೂಡ ಸಾಕಷ್ಟು ಒದ್ದಾಡಿದ್ದರಂತೆ. "ಕಥೆ ಕೇಳಲೂ ಸಹ ರೆಡಿಯಿರಲಿಲ್ಲ. ಅವರು ಸಿನಿಮಾ ಅಂದರೆ ಹೀಗೇ ಇರಬೇಕು ಅಂತ ನಂಬಿದ್ದರು. ಆದರೆ, ಜನ ಕಥೆ ನೋಡಲು ಥಿಯೇಟರ್​ಗೆ ಬರಬೇಕು ಅನ್ನೋದು ನನ್ನ ನಂಬಿಕೆ. ಆಗ ನಾನು, ರತ್​ ನಿರ್ಮಾಣ ಸಂಸ್ಥೆ ಕಟ್ಟಿ ಇಂತಹ ಕಥೆಗಳನ್ನು ಮಾಡಬೇಕು ಅಂತ ಮಾತನಾಡಿಕೊಳ್ಳುತ್ತಿದ್ದೆವು. ಶಿಸ್ತು ಇದ್ದರೆ ಸೋಲುವುದಿಲ್ಲ' ಎನ್ನುತ್ತಾರೆ ಹೇಮಂತ್​.

ಎಲ್ಲ ಚಿತ್ರರಂಗಗಳದ್ದೂ ಇದೇ ಸಮಸ್ಯೆ

ಒಟಿಟಿಗಳು ಸಿನಿಮಾ ಖರೀದಿಸುತ್ತಿಲ್ಲ ಎಂಬ ದೂರುಗಳ ಬಗ್ಗೆ ಹೇಮಂತ್​, "ಕನ್ನಡ ಮಾತ್ರವಲ್ಲ ತೆಲುಗು, ತಮಿಳು, ಮಲಯಾಳಂಗಳಲ್ಲೂ ಇದೇ ಸಮಸ್ಯೆ. ಸಿನಿಮಾ ಥಿಯೇಟರ್​ನಲ್ಲಿ ದುಡಿದರೆ ಅದನ್ನು ಒಟಿಟಿಯಲ್ಲೂ ಖರೀದಿಸುತ್ತಾರೆ. ಇಲ್ಲದಿದ್ದರೆ ಇಲ್ಲ. ಹೀಗಾಗಿ ಥಿಯೇಟರ್​ಗೋಸ್ಕರ ಸಿನಿಮಾ ಮಾಡಬೇಕು. ಮೊದಲು ಟಿವಿ ರೈಟ್ಸ್​ಗೆಂದೇ ಚಿತ್ರಗಳನ್ನು ಮಾಡುತ್ತಿದ್ದರು. ಸಿನಿಮಾ ಅನೌನ್ಸ್​ ಆಗುತ್ತಲೇ ನಿರ್ಮಾಪಕರಿಗೆ ಚೆಕ್​ ಸಿಗುತ್ತಿತ್ತು. ಸಿನಿಮಾ ಕೇವಲ ವ್ಯಾಪಾರವಾಗಿ ಚೆನ್ನಾಗಿದ್ಯಾ, ಚೆನ್ನಾಗಿಲ್ವಾ ಅಂತನೂ ಯಾರೂ ನೋಡುತ್ತಿರಲಿಲ್ಲ. ಥಿಯೇಟರ್​ನಲ್ಲೇ ದುಡಿಯುತ್ತೇವೆ ಅಂತ ಸಿನಿಮಾ ಮಾಡಿದರೆ, ಉತ್ತಮ ಕಂಟೆಂಟ್​ ನೀಡಬಹುದು' ಎಂದು ಅಭಿಪ್ರಾಯ ವ್ಯಕ್ತಪಡಿಸುತ್ತಾರೆ.

ಸದ್ಯಕ್ಕಿಲ್ಲ ಭೈರವನ ಕೊನೆ ಪಾಠ

ಹೇಮಂತ್​ ನಿರ್ದೇಶನದಲ್ಲಿ, ಶಿವರಾಜಕುಮಾರ್​ ಅಭಿನಯಿಸಲಿರುವ "ಭೈರವನ ಕೊನೆ ಪಾಠ' ಘೋಷಣೆಯಾಗಿ ಹಲವು ತಿಂಗಳೇ ಕಳೆದಿವೆ. ಆದರೆ, ಅಮೆರಿಕದಿಂದ ಚಿಕಿತ್ಸೆ ಪಡೆದು ಬಂದು ಶಿವಣ್ಣ ಇನ್ನೂ ಚೇತರಿಸಿಕೊಳ್ಳುತ್ತಿರುವ ಕಾರಣ, ಹೇಮಂತ್​ ಚಿತ್ರವನ್ನು ಮುಂದೂಡಿದ್ದಾರೆ. "ಆರೋಗ್ಯ ಎಲ್ಲಕ್ಕಿಂತ ಮುಖ್ಯ. ಶಿವಣ್ಣ ಸಂಪೂರ್ಣವಾಗಿ ಚೇತರಿಸಿಕೊಳ್ಳಬೇಕು. ಚಿತ್ರದಿಂದ ಅವರಿಗೂ ಸಮಸ್ಯೆ ಆಗಬಾರದು, ಚಿತ್ರಕ್ಕೂ ಸಮಸ್ಯೆ ಆಗಬಾರದು. ಹೀಗಾಗಿ, ಅವರು ಗುಣಮುಖರಾಗುವಷ್ಟರಲ್ಲಿ ಇನ್ನೊಂದು ಸಿನಿಮಾ ಮಾಡಲು ಯೋಚಿಸಿದ್ದೇನೆ. ಈಗಾಗಲೇ ಕಥೆಯ ಕೆಲಸ ನಡೆಯುತ್ತಿದೆ' ಎನ್ನುತ್ತಾರೆ.