ದೆಹಲಿಗೆ ಬೇಕು 1.5 ಲಕ್ಷ ಹಾಸಿಗೆಗಳು!

ನವದೆಹಲಿ: ಜುಲೈ ಅಂತ್ಯದ ವೇಳೆಗೆ ದೆಹಲಿಯಲ್ಲಿ ಕರೊನಾ ರೋಗಿಗಳಿಗೆ 1.5 ಲಕ್ಷ ಹಾಸಿಗೆ ಬೇಕಾಗಬಹುದು ಎಂದು ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ಹೇಳಿದ್ದಾರೆ.

ಲೆಫ್ಟಿನೆಂಟ್ ಗವರ್ನರ್ ಮಾಡಿರುವ ತಿದ್ದುಪಡಿಯನ್ನು ಒಪ್ಪಿರುವುದಾಗಿ ಅವರು ತಿಳಿಸಿದ್ದಾರೆ. ಜುಲೈ ಅಂತ್ಯಕ್ಕೆ 1.5 ಲಕ್ಷ ಹಾಸಿಗೆ ಬೇಕಾಗಬಹುದು. ಅದರಲ್ಲಿ ಅರ್ಧದಷ್ಟು ಎಂದರೆ 80 ಸಾವಿರ ಹಾಸಿಗೆಗಳು ಸ್ಥಳೀಯರಿಗೆ ಬೇಕಾಗುತ್ತದೆ. ಇನ್ನು ಉಳಿದ ಹಾಸಿಗೆಗಳು ಹೊರ ರಾಜ್ಯದಿಂದ ಬರುವ ರೋಗಿಗಳಿಂದ ಭರ್ತಿಯಾಗುತ್ತದೆ. ನಾವು ಎಲ್ಲದಕ್ಕೂ ಸಿದ್ಧತೆ ಮಾಡಿಕೊಳ್ಳುತ್ತಿದ್ದೇವೆ. ಕ್ರೀಡಾಂಗಣಗಳೆಲ್ಲವೂ ಕರೊನಾ ಆಸ್ಪತ್ರೆಗಳಾಗಿ ಮಾರ್ಪಾಡಾಗುತ್ತಿವೆ ಎಂದು ಅವರು ತಿಳಿಸಿದ್ದಾರೆ. ಇದು ಜಗಳ ಮಾಡುವ ಸಮಯವಲ್ಲ. ನಮ್ಮಲ್ಲೇ ಜಗಳ ಮಾಡುತ್ತಾ ಕುಳಿತರೆ ಕರೊನಾ ಜಯ ಸಾಧಿಸಿಬಿಡುತ್ತದೆ ಎಂದು ಅವರು ಹೇಳಿಕೊಂಡಿದ್ದಾರೆ. ಇದನ್ನೂ ಓದಿ: ಕೆ.ಜಿ.ಹಳ್ಳಿ ಠಾಣೆಯ ಮುಖ್ಯ ಪೇದೆ ನೇಣು ಬಿಗಿದು ಆತ್ಮಹತ್ಯೆ; ನಿಖರ ಕಾರಣ ನಿಗೂಢ

ರಾಜ್ಯಕ್ಕೆ ಅಪಾರ ಪ್ರಮಾಣದ ಹಾನಿಯುಂಟಾಗುತ್ತಿದೆ. ಆದರೆ ಇನ್ನೂ ಪರಿಸ್ಥಿತಿ ನಿಯಂತ್ರಣದಲ್ಲಿದೆ. ನಾವು ಈ ಹೋರಾಟದಲ್ಲಿ ಗೆಲ್ಲುತ್ತೇವೆ. ಅದಕ್ಕೆ ಎಲ್ಲ ರೀತಿಯ ತಯಾರಿ ನಡೆಸಿಕೊಂಡಿದ್ದೇವೆ ಎಂದು ಉಪ ಮುಖ್ಯಮಂತ್ರಿ ಮನೀಶ್ ಸಿಸೋಡಿಯಾ ತಿಳಿಸಿದ್ದಾರೆ. ಕೆಲ ದಿನಗಳ ಹಿಂದೆ ದೆಹಲಿಯ ಆಸ್ಪತ್ರೆಗಳಲ್ಲಿ 10 ಸಾವಿರ ಹಾಸಿಗೆಯನ್ನು ಸ್ಥಳೀಯರಿಗೆ ಮೀಸಲಿಡುವುದಾಗಿ ಕೇಜ್ರಿವಾಲ್ ತಿಳಿಸಿದ್ದರು. ಆದರೆ ಲೆಫ್ಟಿನೆಂಟ್ ಗವರ್ನರ್ ಮೀಸಲಾತಿ ನೀಡಲಾಗುವುದಿಲ್ಲ ಎಂದು ತಿದ್ದುಪಡಿ ಮಾಡಿದ್ದರು.

https://www.vijayavani.net/five-terrorists-gunned-down-by-security-forces-in-jammu-and-kashmirs-shopian/