VIDEO| ಕನ್ನಡ ಸೇರಿ ಭಾರತದ ವಿವಿಧ 18 ಭಾಷೆಗಳಲ್ಲಿ ಹೊಸ ವರ್ಷದ ಶುಭಕೋರಿದ ವಿದ್ಯಾರ್ಥಿನಿಯರ ವಿಡಿಯೋ ವೈರಲ್​!

ನವದೆಹಲಿ: ಹೊಸ ವರ್ಷಕ್ಕೆ ಎಲ್ಲರು ಕಾಲಿಟ್ಟಾಗಿದೆ. ಪರಸ್ಪರ ಆತ್ಮೀಯವಾಗಿ ಶುಭಾಶಯಗಳನ್ನು ಹಂಚಿಕೊಂಡಾಗಿದೆ. ಅದರಲ್ಲೂ ಸಾಮಾಜಿಕ ಜಾಲತಾಣದಲ್ಲಿ ಶುಭಾಶಯಗಳ ಮಹಾಪೂರವೇ ಹರಿದಿದೆ. ಅವುಗಳಲ್ಲಿ ಒಂದು ಶುಭಾಶಯ ಜಾಲತಾಣದಲ್ಲಿ ವೈರಲ್​ ಆಗಿದೆ. ಅದರಲ್ಲಿರುವ ವಿಶೇಷತೆ ಏನೆಂದು ತಿಳಿಯುವ ಹಂಬಲವಿದ್ದರೆ ಮುಂದೆ ಓದಿ...

ದೆಹಲಿಯ ಸರ್ವೋದಯ ಕನ್ಯಾ ವಿದ್ಯಾಲಯ ಹೆಸರಿನ ಸರ್ಕಾರಿ ಶಾಲೆಯೊಂದರ ವಿದ್ಯಾರ್ಥಿನಿಯರು ಭಾರತದ ವಿವಿಧ ಭಾಷೆಗಳಲ್ಲಿ ಹೊಸ ವರ್ಷದ ಶುಭಕೋರಿರುವುದು ನೆಟ್ಟಿಗರು ಮನಸನ್ನು ಸೆಳೆದಿದೆ. ಈ ವಿಡಯೋವನ್ನು ಮನು ಗುಲಾತಿ ಎಂಬ ಶಿಕ್ಷಕಿ ತಮ್ಮ ಜಾಲತಾಣ ಖಾತೆಯಲ್ಲಿ ಜನವರಿ 1ರಂದು ಶೇರ್​ ಮಾಡಿಕೊಂಡಿದ್ದಾರೆ.

ಹಿಂದಿ ಭಾಷೆಯಿಂದ ಆರಂಭವಾಗಿ ಅಸ್ಸಾಮಿ, ಬೆಂಗಾಳಿ, ಗುಜರಾತಿ, ಕನ್ನಡ, ತೆಲುಗು, ತಮಿಳು, ನೇಪಾಳಿ, ಕಾಶ್ಮೀರಿ, ಮಲಯಾಳಂ ಸೇರಿದಂತೆ ಒಟ್ಟು 18 ಭಾಷೆಗಳಲ್ಲಿ ವಿದ್ಯಾರ್ಥಿನಿಯರು ಶುಭಕೋರಿದ್ದಾರೆ. ವಿದ್ಯಾರ್ಥಿನಿಯರಿಗೆ ಶಾಲೆಯ ಶಿಕ್ಷಕಿಯರು ಸಾಥ್​ ನೀಡಿದ್ದಾರೆ.

ಈ ಬಗ್ಗೆ ಟ್ವಿಟರ್​ನಲ್ಲಿ ಬರೆದುಕೊಂಡಿರುವ ಶಿಕ್ಷಕಿ ಮನು ಗುಲಾತಿ, ಹೆಮ್ಮೆಯ ದೆಹಲಿ ಸರ್ಕಾರಿ ಶಾಲೆಯ ವಿದ್ಯಾರ್ಥಿನಿಯರು ಭಾರತದ ವಿವಿಧ ಭಾಷೆಗಳಲ್ಲಿ ಶುಭಕೋರಿದ್ದಾರೆ. ಈ ಹೊಸ ವರ್ಷ ಎಲ್ಲರ ಬಾಳಲ್ಲಿ ನವೋಲ್ಲಾಸ ತರಲಿ ಎಂದು ಬಯಸುತ್ತೇನೆಂದು ಶುಭಹಾರೈಸಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ಸಂಚಲನ ಸೃಷ್ಟಿಸಿರುವ ವಿಡಿಯೋವನ್ನು ಈಗಾಗಲೇ 51 ಸಾವಿರಕ್ಕೂ ಹೆಚ್ಚು ಮಂದಿ ವೀಕ್ಷಣೆ ಮಾಡಿದ್ದಾರೆ. 3 ಸಾವಿರಕ್ಕೂ ಹೆಚ್ಚು ಮಂದಿ ಲೈಕ್ಸ್​ ಮಾಡಿದ್ದು, 600 ಕ್ಕೂ ಹೆಚ್ಚು ರೀಟ್ವೀಟ್​ ಮಾಡಿದ್ದಾರೆ.

ಈ ವಿಡಿಯೋ ದೆಹಲಿ ಮುಖ್ಯಮಂತ್ರಿ ಅರವಿಂದ್​ ಕೇಜ್ರಿವಾಲ್​ ಗಮನವನ್ನು ಸೆಳೆದಿದ್ದು, ಐಕ್ಯತೆಯ ಸಂದೇಶದೊಂದಿಗೆ ಹೊಸ ವರ್ಷ ಅದ್ಭುತ ಆರಂಭ ಎಂದು ಚಪ್ಪಾಳೆ ತಟ್ಟಿದ್ದಾರೆ. (ಏಜೆನ್ಸೀಸ್​)