Delhi Seemapuri Building Collapse: ದೆಹಲಿಯ ನ್ಯೂ ಸೀಮಾಪುರಿಯಲ್ಲಿ ಐದು ಅಂತಸ್ತಿನ ವಸತಿ ಕಟ್ಟಡ ಕುಸಿದು ಭಾರೀ ಆತಂಕ ಸೃಷ್ಟಿಯಾಗಿದೆ. ಕಟ್ಟಡದ ಅವಶೇಷಗಳಡಿ ಹಲವರು ಸಿಲುಕಿರುವ ಶಂಕೆ ವ್ಯಕ್ತವಾಗಿದೆ. 4 ತಿಂಗಳ ಗರ್ಭಿಣಿ ಹಾಗೂ ಆಕೆಯ 4 ವರ್ಷದ ಮಗಳೂ ಅವಶೇಷಗಳಡಿ ಸಿಲುಕಿದ್ದಾರೆ ಎಂದು ಕುಟುಂಬಸ್ಥರು ತಿಳಿಸಿದ್ದಾರೆ. ಘಟನೆಯಲ್ಲಿ ಓರ್ವ ಮೃತಪಟ್ಟಿರುವುದಾಗಿ ವರದಿಯಾಗಿದೆ.
ಶಹದಾರಾ ಜಿಲ್ಲೆಯ ನ್ಯೂ ಸೀಮಾಪುರಿಯ ಇ-ಬ್ಲಾಕ್‌ನಲ್ಲಿ ಐದು ಅಂತಸ್ತಿನ ಕಟ್ಟಡ ಏಕಾಏಕಿ ಕುಸಿದುಬಿದ್ದಿದೆ. ಕಟ್ಟಡ ಕುಸಿದ ರಭಸಕ್ಕೆ ಪಕ್ಕದ ಎರಡು ಕಟ್ಟಡಗಳಿಗೂ ಹಾನಿಯಾಗಿದೆ. ವಿಷಯ ಗೊತ್ತಾಗುತ್ತಿದ್ದಂತೆ ದೆಹಲಿ ಅಗ್ನಿಶಾಮಕ ದಳ, ಎನ್‌ಡಿಆರ್‌ಎಫ್, ಪೊಲೀಸರು ಹಾಗೂ ಸ್ಥಳೀಯ ಅಧಿಕಾರಿಗಳು ಸ್ಥಳಕ್ಕೆ ಓಡಿಬಂದು ರಕ್ಷಣಾ ಕಾರ್ಯ ಶುರು ಮಾಡಿದ್ದಾರೆ.
‘ಅವಳು 4 ತಿಂಗಳ ಗರ್ಭಿಣಿ’
ಸಮೀನಾ (30) ಅವರ ಸಹೋದರಿ ಗುಲ್ಫಿಷಾ (21) ಕಟ್ಟಡದ ಅವಶೇಷಗಳಡಿ ಸಿಲುಕಿಕೊಂಡಿದ್ದಾರೆ. 4 ತಿಂಗಳ ಗರ್ಭಿಣಿಯಾಗಿರುವ ಗುಲ್ಫಿಷಾ, ಅವಶೇಷಗಳಡಿಯಿಂದಲೇ ಕರೆ ಮಾಡಿ ತಾನು ಸಿಲುಕಿಕೊಂಡಿದ್ದು ಉಸಿರಾಡಲು ಕಷ್ಟವಾಗುತ್ತಿದೆ ಎಂದು ಹೇಳಿದ್ದಾರೆ. ಅವರ 4 ವರ್ಷದ ಮಗಳು ಹಾಗೂ ಕಟ್ಟಡ ಮಾಲೀಕರ ಮಗಳೂ ಅವರ ಜೊತೆಗಿದ್ದಾರೆ ಎಂದು ಸಮೀನಾ ತಿಳಿಸಿದ್ದಾರೆ. ರಸ್ತೆಗಳು ತುಂಬಾ ಕಿರಿದಾಗಿರುವುದರಿಂದ ಈದ್ಗಾ ಆವರಣದ ಕಡೆಯಿಂದ ರಕ್ಷಣಾ ಕಾರ್ಯ ನಡೆಸಲಾಗುತ್ತಿದೆ.
ನನ್ನ ತಾಯಿ ಅವಶೇಷಗಳಡಿ ಸಿಲುಕಿದ್ದಾರೆ
ಹಸೀನಾ (42) ಅವರು ತಮ್ಮ ತಾಯಿಯೂ ಅವಶೇಷಗಳಡಿ ಸಿಲುಕಿರುವ ಆತಂಕ ವ್ಯಕ್ತಪಡಿಸಿದ್ದಾರೆ. ಕಟ್ಟಡ ಕುಸಿದಾಗ ತಮ್ಮ ತಾಯಿ ರಸ್ತೆ ದಾಟುತ್ತಿದ್ದರು. ಅವರ ತಂದೆ ಅದಕ್ಕೂ ಸ್ವಲ್ಪ ಮುಂದೆ ಹೋಗಿದ್ದರು ಎಂದು ಹಸೀನಾ ಹೇಳಿದ್ದಾರೆ.
ಪಕ್ಕದ ಕಟ್ಟಡ ಕೆಡವಿದ್ದರಿಂದಲೇ ದುರಂತ?
ಕಟ್ಟಡದ ಮಾಲೀಕರ ಸಂಬಂಧಿ ಮೊಹಮ್ಮದ್ ಅಕ್ಬರ್ (33) ಅವರ ಪ್ರಕಾರ, ನಾಲ್ಕು ಮಹಡಿಗಳಲ್ಲೂ ಕುಟುಂಬದವರೇ ವಾಸವಾಗಿದ್ದರು. ಕುಟುಂಬದ ಮೂವರು ಹಾಗೂ ಅಕ್ಕನ ಮಗಳು ಸೇರಿದಂತೆ ಹಲವರು ಅವಶೇಷಗಳಡಿ ಸಿಲುಕಿದ್ದಾರೆ ಎಂದು ತಿಳಿಸಿದ್ದಾರೆ.
