ದೆಹಲಿ ಚುನಾವಣೆ: ಮತಗಟ್ಟೆ ಬಳಿ ಆಪ್​ ಕಾರ್ಯಕರ್ತನಿಗೆ ಹೊಡೆಯಲು ಹೋದ ಮಾಜಿ ಶಾಸಕಿ ಅಲ್ಕಾ ಲಂಬಾ; ವಿಡಿಯೋ ವೈರಲ್​

ನವದೆಹಲಿ: ಆಪ್​ ಮಾಜಿ ಶಾಸಕಿ, ಈ ಚುನಾವಣೆಯ ಕಾಂಗ್ರೆಸ್​ ಅಭ್ಯರ್ಥಿ ಅಲ್ಕಾ ಲಂಬಾ ಅವರು ಆಮ್ ಆದ್ಮಿ ಪಕ್ಷದ ಕಾರ್ಯಕರ್ತನೋರ್ವನಿಗೆ ಮತಗಟ್ಟೆಯ ಎದುರು ಹೊಡೆಯಲು ಪ್ರಯತ್ನಿಸಿದ್ದಾರೆ.

ಮಜ್ನು ಕಾ ತಿಲ್ಲಾದ ಮತಗಟ್ಟೆಯ ಬಳಿ ಆಪ್​ ಕಾರ್ಯಕರ್ತ ಅಲ್ಕಾ ಅವರ ಮಗನ ಬಗ್ಗೆ ಟೀಕೆ ಮಾಡಿದ್ದೇ ಇದಕ್ಕೆ ಕಾರಣ ಎನ್ನಲಾಗಿದ್ದು ಈ ಘಟನೆಯ ವಿಡಿಯೋ ವೈರಲ್ ಆಗಿದೆ.

ಅಲ್ಕಾ ಕಾರ್ಯಕರ್ತನಿಗೆ ಹೊಡೆಯಲು ಕೈ ಎತ್ತಿ ಬೀಸುತ್ತಾರೆ. ಆದರೆ ಆತ ತಲೆ ಬಗ್ಗಿಸಿದ್ದರಿಂದ ಹೊಡೆತ ಬೀಳಲಿಲ್ಲ. ಅಲ್ಲಿಯೇ ಇದ್ದ ಪೊಲೀಸ್ ಅಧಿಕಾರಿ ಮಧ್ಯಪ್ರವೇಶ ಮಾಡುವುದನ್ನು ವಿಡಿಯೋದಲ್ಲಿ ನೋಡಬಹುದು.

ಅಲ್ಕಾ ಲಂಬಾ ಆಪ್​ ಕಾರ್ಯಕರ್ತನ ವಿರುದ್ಧ ದೂರು ನೀಡಿದ್ದು ಎಫ್​ಐಆರ್​ ದಾಖಲಿಸಲು ಕೇಳಿಕೊಂಡಿದ್ದಾರೆ. ಅಲ್ಲದೆ ಪೊಲೀಸರ ಎದುರು ಕಣ್ಣೀರು ಹಾಕಿದ್ದಾರೆ.

ತನ್ನ ಮಗನ ಬಗ್ಗೆ ಅವಹೇಳನಕಾರಿಯಾಗಿ ಆತನ ಮಾತನಾಡಿದ್ದಾನೆ ಎಂದು ಅಲ್ಕಾ ಪೊಲೀಸರಿಗೆ ತಿಳಿಸಿದ್ದಾರೆ. ಆದರೆ ಆತ ಏನು ಹೇಳಿದ ಎಂಬುದು ಗೊತ್ತಾಗಲಿಲ್ಲ.

ಅಲ್ಕಾ ಲಂಬಾ ಚಾಂದನಿ ಚೌಕ್​ ವಿಧಾನಸಭಾ ಕ್ಷೇತ್ರದ ಅಭ್ಯರ್ಥಿ. ಈ ಮೊದಲು ಆಪ್​ನಲ್ಲಿಯೇ ಇದ್ದರು. ಕಳೆದ ವರ್ಷ ಆಪ್​ ತೊರೆದು ಕಾಂಗ್ರೆಸ್ ಸೇರಿದ್ದಾರೆ. (ಏಜೆನ್ಸೀಸ್​)