ಕರ್ನಾಟಕ ವಿಧಾನಸಭಾ ಚುನಾವಣೆಗೆ ಒಂದು ವರ್ಷಕ್ಕಿಂತ ಕಡಿಮೆ ಕಾಲಾವಧಿ ಇದೆ. ಈ ನಡುವೆ, ರಾಜಕೀಯ ಪಕ್ಷಗಳಿಗಿಂತ ಮುನ್ನ ಕಾರ್ಪೆರೇಟ್ ಕಂಪನಿ ಪ್ರತಿನಿಧಿಗಳು ಚುನಾವಣಾ ಕಾರ್ಯಾಚರಣೆ ಆರಂಭಿಸಿಬಿಟ್ಟಿದ್ದಾರೆ. ಸದ್ಯದ ಮಾಹಿತಿ ಪ್ರಕಾರ 27 ಕಂಪನಿಗಳು ರಾಜಕೀಯ ಪಕ್ಷ, ನಾಯಕರು, ಪಕ್ಷಗಳ ವಿವಿಧ ಘಟಕಗಳಲ್ಲಿ ಕೆಲಸ ಆರಂಭಿಸಿವೆ. ಎಬಿಎಂ, ಮೈಂಡ್ಶೇರ್, ರಾಜಧರ್ಮ, ವೈರಲ್ ಬಾಕ್ಸ್, ಡಿಸೈನ್ ಬಾಕ್ಸ್, ಡೇಟಾ, ಐ ಪ್ಯಾಕ್, ಸ್ಮಾರ್ಟ್ ನೇತಾ, ವರಾಹಿ ಸದ್ಯ ಚಲಾವಣೆಯಲ್ಲಿರುವ ಹೆಸರುಗಳಾಗಿವೆ. ಈ ಕಂಪನಿಗಳು ಚುನಾವಣಾಪೂರ್ವ ಸಮೀಕ್ಷೆ ಮಾಡುವ ಹೊರತಾಗಿ, ನಿರಂತರವಾಗಿ ಕ್ಷೇತ್ರಗಳ ಪರಿಸ್ಥಿತಿ ಬಗ್ಗೆ ಮಾಹಿತಿಗಳನ್ನು ಅಪ್ಡೇಟ್ ಮಾಡುವ, ತಂತ್ರಗಾರಿಕೆಯಲ್ಲಿ ಸಲಹೆ ನೀಡುವ ಜತೆಗೆ ಇಮೇಜ್ ವರ್ಧನೆ ಕಾರ್ಯದಲ್ಲೂ ತೊಡಗಿಕೊಂಡಿವೆ.
