ಹಿಂದೆಂದಿಗಿಂತಲೂ ಭೀಕರ ರೂಪ ಪಡೆದಿದೆ ಕರೊನಾ- ಮಂಡ್ಯ ಒಂದರಲ್ಲಿಯೇ 62 ಪ್ರಕರಣ,ರಾಜ್ಯದಲ್ಲಿ 3 ಬಲಿ!

ಬೆಂಗಳೂರು: ಹೊರ ರಾಜ್ಯಗಳಿಂದ ಕರ್ನಾಟಕದ ಮೇಲೆ ನಡೆಯುತ್ತಿರುವ ಕರೊನಾ ದಾಳಿ ಹಿಂದೆಂದಿಗಿಂತಲೂ ಭೀಕರ ಸ್ವರೂಪ ಪಡೆದಿದೆ. ನಿನ್ನೆ ಸಂಜೆ 5 ಗಂಟೆಯಿಂದ ಇಂದು ಮಧ್ಯಾಹ್ನ 12 ಗಂಟೆಯವರೆಗೆ ಅಂದರೆ ಕೇವಲ ಅರ್ಧ ದಿನದಲ್ಲಿಯೇ 127 ಹೊಸ ಪ್ರಕರಣಗಳು ಪತ್ತೆಯಾಗಿವೆ.

ಒಂದೇ ದಿನದಲ್ಲಿ ಮೂವರು ವೈರಸ್​ನಿಂದ ಮೃತಪಟ್ಟಿದ್ದಾರೆ. ಈ ಪೈಕಿ ಮಂಡ್ಯ ಒಂದರಲ್ಲಿಯೇ 62 ಹೊಸ ಸೋಂಕಿತರು ಪತ್ತೆಯಾಗಿದ್ದು, ಆತಂಕವನ್ನು ಇನ್ನಷ್ಟು ಹೆಚ್ಚಿಸಿದೆ. ಇಲ್ಲಿ ಕೂಡ ಮಹಾರಾಷ್ಟ್ರದಿಂದ ಬಂದವರೇ ಸೋಂಕಿಗೆ ಗುರಿಯಾದವರು.

ಇದನ್ನೂ ಓದಿ: ಸಿಎಂ ಮೇಲೆ ನರ್ಸ್​ಗಳು ಗರಂ: ಪಶ್ಚಿಮ ಬಂಗಾಳದಲ್ಲಿ ಏರುತ್ತಲೇ ಇದೆ ರಾಜೀನಾಮೆ- ಸುಸ್ತಾದ ದೀದಿ!

ಮಹಾರಾಷ್ಟ್ರ ಹೊರತುಪಡಿಸಿದರೆ, ಗುಜರಾತ್​, ತಮಿಳುನಾಡಿನಿಂದ ಕರ್ನಾಟಕದ ವಿವಿಧ ಊರುಗಳಿಗೆ ಬಂದವರಲ್ಲಿಯೂ ಸೋಂಕು ಹೆಚ್ಚಿನ ಪ್ರಮಾಣದಲ್ಲಿ ಪತ್ತೆಯಾಗಿದೆ. ಒಟ್ಟಾರೆಯಾಗಿ ಸೋಂಕಿನ ಪ್ರಮಾಣ ರಾಜ್ಯದಲ್ಲಿ 1373ಕ್ಕೆ ಏರಿದೆ. ಈ ಪೈಕಿ 802 ಮಂದಿ ವಿವಿಧ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರೆ, 530 ಮಂದಿ ಬಿಡುಗಡೆಯಾಗಿದ್ದಾರೆ. ವೈರಸ್​ ಇದಾಗಲೇ 40 ಮಂದಿಯನ್ನು ಬಲಿ ಪಡೆದಿದೆ.

ಇಂದು ಬಳ್ಳಾರಿಯ 61 ವರ್ಷದ ವ್ಯಕ್ತಿ, ವಿಜಯಪುರದ 65 ವರ್ಷದ ವ್ಯಕ್ತಿ ಹಾಗೂ ಬೆಂಗಳೂರಿನ 54 ವರ್ಷದ ವ್ಯಕ್ತಿ ಕರೊನಾ ಸೋಂಕಿನಿಂದ ಮೃತಪಟ್ಟಿದ್ದಾರೆ.

ಇದನ್ನೂ ಓದಿ:  ಒಂದು ಲಕ್ಷ ದಾಟಿದ ಕರೊನಾ ಸೋಂಕು! ಯಾವ್ಯಾವ ರಾಜ್ಯ, ದೇಶಗಳ ಸ್ಥಿತಿ ಹೇಗಿದೆ? ಇಲ್ಲಿದೆ ಮಾಹಿತಿ

ಉಳಿದಂತೆ ನಿನ್ನೆ ಸಂಜೆಯಿಂದ ಇಲ್ಲಿಯವರೆಗೆ ದಾಖಲಾಗಿರುವ ಸೋಂಕಿನ ವಿವರ ಈ ರೀತಿ ಇದೆ:

ಮಂಡ್ಯ- 62, ದಾವಣಗೆರೆ- 19, ಶಿವಮೊಗ್ಗ- 12, ಕಲಬುರಗಿ- 11, ಬೆಂಗಳೂರು ನಗರ -6, ಉತ್ತರ ಕನ್ನಡ- 4, ಉಡುಪಿ- 4, ಹಾಸನ-3, ಚಿಕ್ಕಮಗಳೂರು-2, ಯಾದಗಿರಿ- 1, ಚಿತ್ರದುರ್ಗ- 1, ವಿಜಯಪುರ-1, ಗದಗ-1.