ಇಚ್ಛಾಪ್ರಕಾರದ ಮದುವೆ, ಮತಾಂತರದಲ್ಲಿ ಹಸ್ತಕ್ಷೇಪ ಸಲ್ಲ : ಕಲ್ಕತ್ತ ಹೈಕೋರ್ಟ್

ಕೋಲ್ಕತ: ವಯಸ್ಕ ಯುವತಿ ಅನ್ಯಧರ್ವಿುಯ ಪುರುಷನನ್ನು ತನ್ನಿಚ್ಛೆಯಂತೆ ಮದುವೆಯಾಗಿ, ಮತಾಂತರಗೊಂಡಿದ್ದರೆ ಆ ವಿಚಾರದಲ್ಲಿ ಯಾರೊಬ್ಬರ ಹಸ್ತಕ್ಷೇಪಕ್ಕೂ ಅವಕಾಶ ಇಲ್ಲ ಎಂದು ಕಲ್ಕತ್ತ್ತ ಹೈಕೋರ್ಟ್ ತೀರ್ಪು ನೀಡಿದೆ. ಪ್ರಭಾವ ಬಳಸಿ 19 ವಯಸ್ಸಿನ ಮಗಳನ್ನು ಮದುವೆ ಮಾಡಿಕೊಂಡು, ಮತಾಂತರ ಮಾಡಲಾಗಿದೆ ಎಂದು ತಂದೆಯೊಬ್ಬರು ಹೈಕೋರ್ಟ್​ಗೆ ಅರ್ಜಿ ಸಲ್ಲಿಸಿದ್ದರು.

ಮ್ಯಾಜಿಸ್ಟ್ರೇಟ್ ಕೋರ್ಟ್​ನಲ್ಲಿ ಆಕೆ, ‘ತನ್ನಿಚ್ಛೆಯಂತೆ ಮದುವೆಯಾಗಿದ್ದೇನೆ’ ಎಂದು ಹೇಳಿಕೆ ನೀಡಿದ್ದರೂ, ಬಿಗಿಯಾದ ಸನ್ನಿವೇಶದ ಒತ್ತಡಕ್ಕೆ ಸಿಲುಕಿ ಆಕೆ ಹಾಗೆ ಹೇಳಿಕೆ ನೀಡಿದ್ದಾಳೆಂದು ತಂದೆ ಆಪಾದಿಸಿದ್ದರು. ಈ ಬಗ್ಗೆ ವಿಚಾರಣೆ ನಡೆಸಿದ ನ್ಯಾಯಪೀಠ ತನ್ನಿಷ್ಟದಂತೆ ಮದುವೆ, ಮತಾಂತರಗೊಂಡು ಹೆತ್ತವರ ಬಳಿ ವಾಪಸಾಗುವುದಿಲ್ಲ ಎಂಬ ಯುವತಿಯನ್ನು ನಾವು ತಡೆಯಲಾಗದು ಎಂದು ಅರ್ಜಿದಾರರಿಗೆ ತಿಳಿಸಿತು.

ಹಾಗಿದ್ದರೂ ತಂದೆಯ ಅನುಮಾನಗಳನ್ನು ಬಗೆಹರಿಸಲು ಯುವತಿಗೆ ಪಬ್ಲಿಕ್ ಪ್ರಾಸಿಕ್ಯೂಟರ್​ರನ್ನು ಭೇಟಿ ಮಾಡಿ ಹೇಳಿಕೆ ನೀಡುವಂತೆ ಹೈಕೋರ್ಟ್ ಸೂಚಿಸಿದೆ.

ಕ್ಷಣ ಕ್ಷಣದ ಸುದ್ದಿಗಳ ಅಪ್ಡೇಟ್ಸ್​ಗಾಗಿ ನಮ್ಮ ಫೇಸ್​ಬುಕ್​ ಪುಟ ಲೈಕ್ ಮಾಡಿ ಮತ್ತು ಫಾಲೋ ಮಾಡಿ..

https://www.vijayavani.net/cabinet-approves-revised-dth-guidelines-license-for-20-years-100-pc-fdi/