ಮತಾಂತರ ತಡೆಗೆ ಸುಗ್ರೀವಾಸ್ತ್ರ

| ರುದ್ರಣ್ಣ ಹರ್ತಿಕೋಟೆ ಬೆಂಗಳೂರು

ಲವ್ ಜಿಹಾದ್ ಹಾಗೂ ಅದರ ಮೂಲಕ ಉಗ್ರ ಸಂಘಟನೆಗಳನ್ನು ಬಲಪಡಿಸುವಂತಹ ಕೃತ್ಯಗಳನ್ನು ತಡೆಯುವ ನಿಟ್ಟಿನಲ್ಲಿ ಸುಗ್ರೀವಾಜ್ಞೆ ಮೂಲಕ ಮತಾಂತರ ನಿಷೇಧವನ್ನು ಜಾರಿಗೆ ತರಲು ರಾಜ್ಯ ಸರ್ಕಾರ ತೀರ್ಮಾನಿಸಿದೆ.

ಉತ್ತರ ಪ್ರದೇಶ ಸರ್ಕಾರ ಈಗಾಗಲೇ ಸುಗ್ರೀವಾಜ್ಞೆ ಮೂಲಕ ಕಾನೂನು ಜಾರಿ ಮಾಡಿ ಮೊದಲ ಪ್ರಕರಣ ದಾಖಲಿಸಿದೆ. ಆದರೆ ರಾಜ್ಯದಲ್ಲಿ ಯಾವುದೇ ಸಿದ್ಧತೆ ಆರಂಭವಾಗದಿರುವ ಹಿನ್ನೆಲೆಯಲ್ಲಿ ವಿಧಾನಮಂಡಲ ಅಧಿವೇಶನ ಮುಗಿದ ಕೂಡಲೇ ಸುಗ್ರೀವಾಜ್ಞೆ ಮೂಲಕವೇ ಜಾರಿಗೆ ತರಲಾಗುತ್ತದೆ.

ರಾಜ್ಯದಲ್ಲಿ 2019ರಲ್ಲೇ ಲವ್ ಜಿಹಾದ್ ಸದ್ದು ಮಾಡಿತ್ತು. ಕರ್ನಾಟಕ ಹಾಗೂ ಕೇರಳದಲ್ಲಿ ಸಾವಿರಾರು ಲವ್ ಜಿಹಾದ್ ಪ್ರಕರಣಗಳು ನಡೆದಿವೆ. ಅದರ ಮೂಲಕ ಭಯೋತ್ಪಾದನೆ ಚಟುವಟಿಕೆಗಳಿಗೆ ಕುಮ್ಮಕ್ಕು ನೀಡಲಾಗಿದೆ ಎಂಬ ದೂರುಗಳೂ ಇವೆ. ಆಗಿನಿಂದಲೂ ರಾಜ್ಯದಲ್ಲಿ ಬಲವಂತದ ಮತಾಂತರ ನಿಷೇಧದ ಒತ್ತಡಗಳಿವೆ.

ಶುರುವಾಗದ ಸಿದ್ಧತೆ: ಉತ್ತರ ಪ್ರದೇಶ ಹಾಗೂ ಹರಿಯಾಣ ಸರ್ಕಾರಗಳು ಲವ್ ಜಿಹಾದ್ ನಿಷೇಧಕ್ಕಾಗಿ ಕಾಯ್ದೆ ತರುವ ಬಗ್ಗೆ ಪ್ರಸ್ತಾಪ ಮಾಡಿದ ಸಂದರ್ಭದಲ್ಲೇ ರಾಜ್ಯದ ಬಿಜೆಪಿ ಮುಖಂಡರು ಇಲ್ಲಿಯೂ ಲವ್ ಜಿಹಾದ್ ನಿಷೇಧಿಸುವ ಮಾತನಾಡಿದ್ದರು. ಮಂಗಳೂರಿನಲ್ಲಿ ನಡೆದ ಬಿಜೆಪಿ ರಾಜ್ಯ ಕಾರ್ಯಕಾರಿಣಿಯಲ್ಲಿಯೂ ಮುಖ್ಯಮಂತ್ರಿ ಯಡಿಯೂರಪ್ಪ ಕಾನೂನು ತರುವ ಘೋಷಣೆ ಹೊರಡಿಸಿದ್ದರು. ಆದರೆ ನಂತರ ಸಂಬಂಧಪಟ್ಟ ಇಲಾಖೆಗೆ ಸರ್ಕಾರದ ಕಡೆಯಿಂದ ವಿಧೇಯಕ ಸಿದ್ಧಪಡಿಸುವುದಕ್ಕೆ ಯಾವುದೇ ಸೂಚನೆ ಹೋಗಿಲ್ಲ. ವಿಧಾನಮಂಡಲ ಅಧಿವೇಶನ ಡಿ.7ರಂದು ಆರಂಭವಾಗಲಿದೆ. ಅಧಿವೇಶನದಲ್ಲಿ ವಿಧೇಯಕ ಮಂಡಿಸಲು ಸರ್ಕಾರ ಸಿದ್ಧವಾಗಿಲ್ಲ. ಆದ್ದರಿಂದಲೇ ಅಧಿವೇಶನ ಮುಗಿದ ನಂತರ ಸುಗ್ರೀವಾಜ್ಞೆ ಮೂಲಕ ಜಾರಿ ಮಾಡಿ ಆರು ತಿಂಗಳೊಳಗೆ ನಡೆಯಲಿರುವ ವಿಧಾನಮಂಡಲದ ಜಂಟಿ ಅಥವಾ ಬಜೆಟ್ ಅಧಿವೇಶನದಲ್ಲಿ ವಿಧೇಯಕ ಮಂಡಿಸಿ ಕಾನೂನು ಜಾರಿಗೆ ನಿರ್ಧರಿಸಲಾಗಿದೆ.

ಅಧ್ಯಯನ ಆಗಬೇಕಿದೆ: ರಾಜ್ಯದಲ್ಲಿ ಮತಾಂತರ ನಿಷೇಧ ಕಾನೂನು ಜಾರಿಯಾಗದಿರುವುದಕ್ಕೆ ಉತ್ತರ ಪ್ರದೇಶದ ಸುಗ್ರೀವಾಜ್ಞೆ ಅಧ್ಯಯನ ನಡೆಯದಿರುವುದು, ಹರಿಯಾಣದಲ್ಲಿನ ಸಿದ್ಧತೆ ಬಗ್ಗೆ ಮಾಹಿತಿ ಪಡೆಯುವಲ್ಲಿ ಅಧಿಕಾರಿಗಳ ನಿರ್ಲಕ್ಷ್ಯವೇ ಕಾರಣವೆನ್ನಲಾಗಿದೆ. ಉತ್ತರ ಪ್ರದೇಶದ ಸುಗ್ರೀವಾಜ್ಞೆ ಪ್ರತಿಯನ್ನು ಇನ್ನೂ ತರಿಸಿಕೊಂಡಿಲ್ಲ ಎಂದು ಸರ್ಕಾರದ ಉನ್ನತ ಮೂಲಗಳು ಖಚಿತಪಡಿಸಿವೆ.

ವಿಧಾನಮಂಡಲ ಅಧಿವೇಶನ ಮುಗಿದ ಕೂಡಲೇ ಉತ್ತರ ಪ್ರದೇಶದ ಸುಗ್ರೀವಾಜ್ಞೆಯನ್ನು ತರಿಸಿ ಅಲ್ಲಿಗಿಂತ ಒಂದಷ್ಟು ಭಿನ್ನವಾಗಿ ಕಾಯ್ದೆ ರೂಪಿಸುವ ಬಗ್ಗೆ ಸರ್ಕಾರ ತೀರ್ವನಿಸಿದೆ. ಹರಿಯಾಣ ಸರ್ಕಾರ ರಚಿಸಿರುವ ತಜ್ಞರ ಸಮಿತಿಯ ತೀರ್ವನಗಳ ಬಗ್ಗೆಯೂ ಮಾಹಿತಿ ಪಡೆಯಲಾಗುತ್ತದೆ.

ತಿಂಗಳಲ್ಲಿ ಜಾರಿ: ಅಧಿವೇಶನ ಮುಗಿದ ಒಂದು ತಿಂಗಳೊಳಗಾಗಿ ಸುಗ್ರೀವಾಜ್ಞೆ ಜಾರಿಗೆ ಸರ್ಕಾರ ಚಿಂತನೆ ನಡೆಸಿದೆ.

ಉ.ಪ್ರದಲ್ಲಿ ಆಗಿದ್ದೇನು?

ಕಾನ್ಪುರದಲ್ಲಿ 11 ಲವ್ ಜಿಹಾದ್ ಪ್ರಕರಣ ಬೆಳಕಿಗೆ ಬಂದ ತಕ್ಷಣವೇ ತನಿಖೆಯ ಜತೆಜತೆಗೆ ಕಾನೂನು ಆಯೋಗಕ್ಕೆ ಅಧ್ಯಯನ ನಡೆಸಲು ಸೂಚನೆ ನೀಡಲಾಯಿತು. ಮತಾಂತರದ ಜತೆಗೆ ಲವ್ ಜಿಹಾದ್ ತಡೆಯುವ ಬಗ್ಗೆ ಕಾನೂನು ಆಯೋಗ ನೇಪಾಳ, ಮ್ಯಾನ್ಮಾರ್, ಭೂತಾನ್, ಶ್ರೀಲಂಕಾ, ಪಾಕಿಸ್ತಾನದ ಕಾನೂನುಗಳನ್ನು ಅಧ್ಯಯನ ಮಾಡಿತು.

ಉತ್ತರ ಪ್ರದೇಶದಲ್ಲಿ ಏನಿದೆ ಶಿಕ್ಷೆ?

• ಬಲವಂತದ ಮತಾಂತರಕ್ಕೆ 1ರಿಂದ 5 ವರ್ಷ ಜೈಲು, 15 ಸಾವಿರ ರೂ. ದಂಡ, ಬಾಲಕಿ ಅಥವಾ ಪರಿಶಿಷ್ಟ ಮಹಿಳೆಯ ಮತಾಂತರಕ್ಕೆ 3 ರಿಂದ 10 ವರ್ಷ ಜೈಲು, 25 ಸಾವಿರ ರೂ. ದಂಡ
• ಸಾಮೂಹಿಕ ಮತಾಂತರ ಮಾಡುವ ಸಂಸ್ಥೆಗಳಿಗೆ 3 ರಿಂದ 10 ವರ್ಷ ಜೈಲು, 50 ಸಾವಿರ ರೂ. ದಂಡ, ಮತಾಂತರವಾಗಿ ವಿವಾಹವಾಗುವವರು 2 ತಿಂಗಳ ಮೊದಲು ಜಿಲ್ಲಾಧಿಕಾರಿಗೆ ಅರ್ಜಿ ಸಲ್ಲಿಸಿ ಅನುಮತಿ ಪಡೆಯಬೇಕು. ಇಲ್ಲದಿದ್ದರೆ ಅಂತಹ ಮದುವೆ ರದ್ದು.

ಸಮಿತಿ ರಚನೆಗೆ ಒಲವು ರಾಜ್ಯದಲ್ಲೂ ಕಾನೂನು ಆಯೋಗದಿಂದ ಸಲಹೆ ಪಡೆಯುವುದರ ಜತೆಗೆ ಸಂಪುಟ ಉಪ ಸಮಿತಿ ಹಾಗೂ ತಜ್ಞರ ಸಮಿತಿ ರಚನೆ ಮಾಡಿ ಸುಗ್ರೀವಾಜ್ಞೆ ಸಿದ್ಧಪಡಿಸಲು ಸರ್ಕಾರ ಚಿಂತನೆ ನಡೆಸಿದೆ. ರಾಜ್ಯ ಸರ್ಕಾರದ ಯೋಚನೆಗಳೇನು?

• ಒಪ್ಪಿತ ಮತಾಂತರದ ಮೂಲಕ ಮದುವೆ ಆಗುವವರಿಗೆ ಕಾನೂನಿನ ರಕ್ಷಣೆ
• ಒತ್ತಾಯದಿಂದ ಮತಾಂತರ ಮಾಡುವಂತಿಲ್ಲ
• ಮತಾಂತರದ ಮೂಲಕ ಮದುವೆಗೆ ಬಲವಂತ ಮಾಡುವಂತಿಲ್ಲ
• ಮತಾಂತರ ಆಗುವಂತೆ ಯಾವುದೇ ಆಸೆ-ಆಮಿಷ ತೋರಿಸುವಂತಿಲ್ಲ
• ಉತ್ತರ ಪ್ರದೇಶಕ್ಕಿಂತ ಹೆಚ್ಚಿನ ದಂಡ ಹಾಗೂ ಜೈಲು ಶಿಕ್ಷೆ
• ಲವ್ ಜಿಹಾದ್ ಮೂಲಕ ಮಹಿಳೆಯರ ಕಳ್ಳಸಾಗಣೆಯಾಗದಂತೆ ಎಚ್ಚರ

ತೀರ್ಪಿನ ಪರಿಶೀಲನೆ ಮದುವೆ ಸ್ವಂತ ಇಚ್ಛೆ ಎಂಬಕೋರ್ಟ್ ತೀರ್ಪು ಗಮನದಲ್ಲಿಟ್ಟುಕೊಂಡೇ ಸುಗ್ರೀವಾಜ್ಞೆ ರೂಪಿಸುವುದು ಸರ್ಕಾರದ ಉದ್ದೇಶ. ಇಲ್ಲದಿದ್ದರೆ ಯಾರಾದರೂ ನ್ಯಾಯಾಲಯಕ್ಕೆ ಹೋದಲ್ಲಿ ಸೋಲಾಗಬಹುದೆಂಬ ಆತಂಕ ಇದೆ.

ಮತಾಂತರ ನಿಷೇಧ ಕಾಯ್ದೆ ತಂದೇ ತರುತ್ತೇವೆ. ಅದಕ್ಕೆ ಸಾಕಷ್ಟು ಸಿದ್ಧತೆ ಅಗತ್ಯವಿರುವುದರಿಂದ ಈ ಅಧಿವೇಶನದಲ್ಲಿ ಮಸೂದೆ ತರಲಾಗುತ್ತಿಲ್ಲ. ಉತ್ತರ ಪ್ರದೇಶದ ಸುಗ್ರೀವಾಜ್ಞೆ ಮತ್ತು ಹರಿಯಾಣದಲ್ಲಿ ರಚನೆಯಾಗಿರುವ ಸಮಿತಿ ವರದಿಯನ್ನು ಪರಿಶೀಲಿಸುತ್ತೇವೆ. ಹಾಗೆಯೇ ನ್ಯಾಯಾಲಯದ ಅಭಿಪ್ರಾಯ ಏನಿದೆ ಎಂಬುದನ್ನು ಗಮನಿಸುತ್ತೇವೆ.

| ಬಸವರಾಜ ಬೊಮ್ಮಾಯಿ ಗೃಹ ಸಚಿವ

ಸಿದ್ದರಾಮಯ್ಯ ಅವರಿಗೆ ಕ್ರಾಸ್​ಬೀಡ್ ಬಗ್ಗೆ ಬಹಳ ಆಸಕ್ತಿ. ಅದು ಇಂದು ನಿನ್ನೆಯದಲ್ಲಿ ಅದು, ಇಂದಿರಾಗಾಂಧಿ ಅವರು ಯಾರನ್ನೋ ಮದುವೆಯಾಗಿದ್ದರು. ಸೋನಿಯಾ ಗಾಂಧಿ ಅವರನ್ನು ಇನ್ನು ಯಾರನ್ನೋ ಮದುವೆಯಾಗಿದ್ದರು. ಅವರದು ಇದೇ ಸಂತತಿ ತಾನೇ.

| ಕೆ.ಎಸ್.ಈಶ್ವರಪ್ಪ ಸಚಿವ

ಕಾನೂನು ಅವಕಾಶವಿಲ್ಲ: ಸರ್ಕಾರದ ವಿರುದ್ಧ ಸಿದ್ದು ಆಕ್ರೋಶ

ದೇಶದಲ್ಲಿ ಮುಸ್ಲಿಮರು, ಮೊಘಲರು 600 ವರ್ಷಗಳಿಂದ ಇದ್ದಾರೆ. ಈ ದೇಶದಲ್ಲಿ ಎಷ್ಟೋ ಸಂಬಂಧಗಳು ಬೆಳೆದಿವೆ. ಬಹಳಷ್ಟು ಜನ ಹಿಂದೂ-ಮುಸ್ಲಿಂ ಕ್ರಾಸ್ ಆಗಿ ಹುಟ್ಟಿದ್ದಾರೆ ಎಂದು ಹೇಳಿದರು. ಲವ್ ಜಿಹಾದ್ ಕಾನೂನು ಜಾರಿಗೆ ತರಲು ಅವಕಾಶವಿಲ್ಲ. ಕೋರ್ಟ್​ಗೆ ಹೋದರೆ ಅದು ವಜಾ ಆಗಲಿದೆ. ಅಲಹಾಬಾದ್ ಹಾಗೂ ಕರ್ನಾಟಕ ಹೈಕೋರ್ಟ್ ತೀರ್ಪಿನ ನಂತರವೂ ಕಾನೂನು ಮಾಡಲು ಹೊರಟಿರುವುದು ತಪ್ಪು. ಬಿಜೆಪಿ ಇದನ್ನು ರಾಜ್ಯದ ಕಲ್ಯಾಣಕ್ಕೆ ಬದಲಾಗಿ ಶಾಂತಿಭಂಗವನ್ನುಂಟು ಮಾಡಲು ಮಾಡುತ್ತಿದೆ ಎಂದರು.