ಬಿಜೆಪಿ ಸ್ಥಿತಿ ಕಂಡು ಲೇವಡಿ ಮಾಡಿದ ಕಾಂಗ್ರೆಸ್

ಬೆಂಗಳೂರು: ಸರ್ಕಾರದ ವಿರುದ್ಧ ಯಡಿಯೂರಪ್ಪನವರ ಕೈಯಲ್ಲಿ ಪತ್ರಿಕಾಗೋಷ್ಠಿ ಮಾಡಿಸಿದ ರಾಜ್ಯ ಬಿಜೆಪಿಗೆ ಒಬ್ಬ ವಿರೋಧ ಪಕ್ಷದ ನಾಯಕನ ಗತಿ ಇಲ್ಲದೆ ಹೋಗಿದ್ದು ಶೋಚನೀಯ ಎಂದು ಕಾಂಗ್ರೆಸ್ ಲೇವಡಿ ಮಾಡಿದೆ.

ಅಂದು ಮುಖ್ಯಮಂತ್ರಿ ಸ್ಥಾನದಲ್ಲಿ ಮುಂದುವರೆಯಲು ಬೇಡವಾಗಿದ್ದ ಬಿಎಸ್‌ವೈ ಈಗ ಪತ್ರಿಕಾಗೋಷ್ಠಿ ನಡೆಸಲು ಬೇಕಾಯಿತು. ಅಂದು ಅವರ ಕಣ್ಣೀರಿಗೆ ಬೆಲೆ ಕೊಡದ ಬಿಜೆಪಿಗೆ ಈಗ ಅವರ ಆಶ್ರಯ ಬೇಕಾಯ್ತೆ? ಈ ಆಶ್ರಯ ಕೇವಲ ಪತ್ರಿಕಾಗೋಷ್ಠಿಗೆ ಮಾತ್ರ ಸೀಮಿತವೇ? ಎಂದು ಪ್ರಶ್ನೆ ಮಾಡಿದೆ.

ಹೈಕಮಾಂಡ್ ನಾಯಕರು ಬಿಎಸ್‌ವೈರನ್ನು ಅವಮಾನಿಸಿದಾಗ ತುಟಿ ಬಿಚ್ಚದ ಬಿಜೆಪಿ ಈಗ ಸರ್ಕಾರದ ವಿರುದ್ಧ ಮಾತನಾಡಿಸಲು ಮಾತ್ರ ಅಗತ್ಯ ಬಿದ್ದರೆ? ಎಂದು ಕುಟುಕಿದೆ. ಹಾಗೆಯೇ, ನಮ್ಮ ಸರ್ಕಾರದ ವಿರುದ್ಧ ಪತ್ರಿಕಾಗೋಷ್ಠಿ ನಡೆಸಿ ಮಾತನಾಡಲು ಬಿಜೆಪಿಗೆ ನಾಯಕರಿಲ್ಲದೆ ಪದಚ್ಯುತ ನಾಯಕ ಬಿಎಸ್‌ವೈ ಅವರನ್ನು ಕರೆಸಿ ಕೂರಿಸಿದೆ ಎಂದಿದೆ.

ಇದೇ ಯಡಿಯೂರಪ್ಪನವರನ್ನು ಬಿಜೆಪಿ ಹೈಕಮಾಂಡ್ ಕೆಲವೇ ದಿನಗಳ ಹಿಂದೆ ಕರೆಸಿ ಅವಮಾನಿಸಿತ್ತು, ನಿರ್ಗಮಿತ ನಾಯಕನಿಗೆ ನಯಾಪೈಸೆ ಬೆಲೆ ಕೊಡದ ಬಿಜೆಪಿ ಈಗ ಹಳೆ ಮಾಲೀಕನ ಪಾದವೇ ಗತಿ ಎನ್ನುವಂತೆ ಯಡಿಯೂರಪ್ಪನವರ ಮೊರೆ ಹೋಗಿದೆ. ಇನ್ನು ಜೆಡಿಎಸ್ ಬಿಜೆಪಿಯ ಆಶ್ರಯದಲ್ಲಿದೆಯೋ, ಬಿಜೆಪಿ ಜೆಡಿಎಸ್ ಸೇರಿಗಿನ ಆಶ್ರಯ ಪಡೆದಿದೆಯೋ ಎಂಬ ಅನುಮಾನ ಬಿಜೆಪಿಗರಿಗೇ ಶುರುವಾಗಿದೆ ಎಂದು ಹಾಸ್ಯ ಮಾಡಿದೆ.

ವಿರೋಧ ಪಕ್ಷದ ನಾಯಕನಿಲ್ಲದೆ ಸದನದ ಒಳಗೂ ಹೊರಗೂ ಬಿಜೆಪಿ ಅಬ್ಬೇಪಾರಿಯಂತಾಗಿದೆ, ಈ ಬಗ್ಗೆ ಬಿಜೆಪಿ ಶಾಸಕರ ಗೋಳು ಮುಗಿಲು ಮುಟ್ಟಿದೆ. ಯಡಿಯೂರಪ್ಪರನ್ನೇ ದೆಹಲಿಯಲ್ಲಿ ಭೇಟಿಯಾಗದೆ ಅವಮಾನಿಸಿ ಕಳಿಸಿದೆ ಹೈಕಮಾಂಡ್, ಮೂಲೆಗುಂಪಾದ ಯಡಿಯೂರಪ್ಪರಲ್ಲಿ ಗೋಳು ಹೇಳಿಕೊಂಡರೆ ಉಪಯೋಗವಿದೆಯೇ? ಒಟ್ಟಿನಲ್ಲಿ ರಾಜ್ಯ ಬಿಜೆಪಿ ಈಗ ಮುಳುಗಿ ತಳ ಸೇರಿದ ಹಡಗು ಎಂದು ಕಾಲೆಳೆದಿದೆ.