ಸದನಕ್ಕೆ ತಪ್ಪು ಮಾಹಿತಿ; ಕೇಂದ್ರ ಗೃಹ ಸಚಿವ ಅಮಿತ್​ ಷಾ ವಿರುದ್ಧ ಹಕ್ಕುಚ್ಯುತಿ ನೋಟಿಸ್​

ನವದೆಹಲಿ: 2008ರಲ್ಲಿ ಮಹಾರಾಷ್ಟ್ರ ಮೂಲದ ರೈತ ಮಹಿಳೆ ಕಲಾವತಿ ಬಂಡೂರ್​ಕರ್​ರನ್ನು​ ಸಂಸದ ರಾಹುಲ್​ ಗಾಂಧಿ ಭೇಟಿ ಮಾಡಿರುವ ಕುರಿತು ಕೇಂದ್ರ ಗೃಹ ಸಚಿವ ಅಮಿತ್​ ಷಾ ಸದನಕ್ಕೆ ತಪ್ಪು ಮಾಹಿತಿ ನೀಡಿದ್ದಾರೆ ಎಂದು ಆರೋಪಿಸಿ ಕಾಂಗ್ರೆಸ್​ ಸದಸ್ಯರು ಹಕ್ಕುಚ್ಯುತಿ ನೋಟಿಸ್​ ನೀಡಿದ್ದಾರೆ.

ಲೋಕಸಭೆಯಲ್ಲಿ ಕಾಂಗ್ರೆಸ್​ ಪಕ್ಷದ ಮುಖ್ಯ ಸಚೇತಕ ಮಾಣಿಕಂ ಟ್ಯಾಗೋರ್​ ಸ್ಪೀಕರ್​ ಓಂ ಬಿರ್ಲಾರಿಗೆ ಹಕ್ಕುಚ್ಯುತಿ ನೋಟಿಸ್​ ಸಲ್ಲಿಸಿದ್ದು, ಈ ಕುರಿತು ಟ್ವೀಟ್​ ಮಾಡಿ ತಿಳಿಸಿದ್ದಾರೆ.

ಕೇಂದ್ರ ಸರ್ಕಾರದ ವಿರುದ್ಧ ವಿಪಕ್ಷಗಳು ಮಂಡಿಸಿರುವ ಅವಿಶ್ವಾಸ ನಿರ್ಣಯವನ್ನು ಉದ್ದೇಶಿಸಿ ಮಾತನಾಡಿದ ಅಮಿತ್​ ಷಾ ರಾಜಕೀಯವಾಗಿ ರಾಹುಲ್​ ಗಾಂಧಿಯನ್ನು ಬೆಳೆಸುವ ನಿಟ್ಟಿನಲ್ಲಿ ಕಾಂಗ್ರೆಸ್​ ಎದುರಿಸಿದ 13 ವೈಫಲ್ಯಗಳನ್ನು ಪಟ್ಟಿ ಮಾಡಿ ಹೇಳುತ್ತಿದ್ದರು. ಮಹಾರಾಷ್ಟ್ರದ ರೈತ ಮಹಿಳೆ ಕಲಾವತಿರನ್ನು ರಾಹುಲ್​ ಗಾಂಧಿ ಭೇಟಿಯಾಗಿದ್ದ ವಿಚಾರವನ್ನೂ ಪ್ರಸ್ತಾಪಿಸಿ ಕುಟುಕಿದ್ದರು.

ಇದನ್ನೂ ಓದಿ: ಸತ್ತ ವ್ಯಕ್ತಿಯ ಪತ್ನಿ ತಾನೇ ಎಂದು ಪಿಂಚಣಿ ಪಡೆಯುತ್ತಿದ್ದ ಮಗಳು ಅಂದರ್​​

ಕಲಾವತಿ ಅವರಿಗೆ ಮನೆ ಕಟ್ಟಿಸಿ ಕೊಟ್ಟಿದ್ದು, ಮೋದಿ ಸರ್ಕಾರ. ವಿವಿಧ ಸರ್ಕಾರಿ ಯೋಜನೆಗಳ ಲಾಭವನ್ನೂ ಅವರು ನಮ್ಮ ಆಡಳಿತದಲ್ಲಿ ಪಡೆದುಕೊಂಡಿದ್ದಾರೆ ಎಂದು ಅಮಿತ್​ ಷಾ ತಮ್ಮ ಭಾಷಣದಲ್ಲಿ ಹೇಳಿದ್ದರು. ಮಹಾರಾಷ್ಟ್ರದ ವಿದರ್ಭದಲ್ಲಿ ಕೃಷಿ ಬಿಕ್ಕಟ್ಟಿನಿಂದ ಕಲಾವತಿ ಅವರ ಪತಿ 2008ರಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದರು. ಅವರ ಮನೆಗೆ ಭೇಟಿ ನೀಡಿದ್ದ ಕಾಂಗ್ರೆಸ್​ ನಾಯಕ ರಾಗುಲ್​ ಗಾಂಧಿ ಸಾಂತ್ವ ಹೇಳಿ ಪರಿಹಾರದ ಚೆಕ್​ ವಿತರಿಸಿದ್ದರು.

ಸದನವನ್ನು ಉದ್ದೇಶಿಸಿ ಮಾತನಾಡುವ ವೇಳೆ ಅಮಿತ್​ ಷಾ ಸತ್ಯ ಹಾಗೂ ನಿಖರ ಮಾಹಿತಿಯನ್ನೂ ಮುಚ್ಚಿಡುವ ಮೂಲಕ ತಪ್ಪು ದಾರಿಗೆ ಎಳೆಯುತ್ತಿದ್ದಾರೆ. ಆದ್ದರಿಂದ ಅವರ ವಿರುದ್ಧ ಹಕ್ಕುಚ್ಯುತಿ ನೋಟಿಸ್​ ಮಂಡಿಸಲಾಗುತ್ತಿದೆ ಎಂದು ಕಾಂಗ್ರೆಸ್​ ಪಕ್ಷದ ಮುಖ್ಯ ಸಚೇತಕ ಮಾಣಿಕಂ ಟ್ಯಾಗೋರ್ ತಮ್ಮ ಟ್ವೀಟ್​ನಲ್ಲಿ ತಿಳಿಸಿದ್ದಾರೆ.

https://www.vijayavani.net/rajasthan-govt-to-launch-indira-gandhi-smartphone-yojana

https://www.vijayavani.net/sadhguru-backs-akshay-kumars-omg-2-amid-controversy