ಹಾನಗಲ್, ಸಿಂಧಗಿಯತ್ತ ಹೊರಳಿದ ಕೈ ಚಿತ್ತ; ಎರಡೂ ಕ್ಷೇತ್ರ ಗೆಲ್ಲಲು ಕಾಂಗ್ರೆಸ್ ತಂತ್ರ, ಲಾಭದ ನಿರೀಕ್ಷೆಯಲ್ಲಿ ನಾಯಕರು

| ಶ್ರೀಕಾಂತ್ ಶೇಷಾದ್ರಿ ಬೆಂಗಳೂರು

ಕರೊನಾ ಮೂರನೇ ಅಲೆಯ ಆತಂಕವಿದ್ದರೂ, ಎರಡನೇ ಅಲೆ ನಿಧಾನವಾಗಿ ಇಳಿಮುಖವಾಗುತ್ತಿದ್ದಂತೆ ರಾಜಕೀಯ ಪಕ್ಷಗಳು ಮತ್ತೆ ಚುನಾವಣೆಗೆ ಗುಂಗಿಗೆ ಹೊರಳಲು ಆತುರ ಮಾಡುತ್ತಿವೆ. ಸಿಂಧಗಿ ಮತ್ತು ಹಾನಗಲ್ ವಿಧಾನಸಭಾ ಕ್ಷೇತ್ರಕ್ಕೆ ಉಪ ಚುನಾವಣೆಯನ್ನು ಎರಡು ರಾಷ್ಟ್ರೀಯ ಪಕ್ಷಗಳು ಗಂಭೀರವಾಗಿ ಪರಿಗಣಿಸಿದ್ದು, ಅದರಲ್ಲೂ ಕಾಂಗ್ರೆಸ್ ಪ್ರತಿಷ್ಠೆಯಾಗಿ ತೆಗೆದುಕೊಂಡಿದೆ.

2018ರ ಸಾರ್ವತ್ರಿಕ ಚುನಾವಣೆಯಲ್ಲಿ ಸಿಂಧಗಿ ಕ್ಷೇತ್ರದಿಂದ ಜೆಡಿಎಸ್ ಅಭ್ಯರ್ಥಿಯಾಗಿ ಗೆಲುವು ಸಾಧಿಸಿದ್ದ ಮನಗೂಳಿ ಮಲ್ಲಪ್ಪ ಚನ್ನವೀರಪ್ಪ ಅನಾರೋಗ್ಯದಿಂದ ಜ.28ರಂದು ನಿಧನರಾದರು. ಹೀಗಾಗಿ ಆ ಸ್ಥಾನಕ್ಕೆ ಮರುಚುನಾವಣೆ ಆಗಬೇಕಿದೆ. ಕ್ಷೇತ್ರವನ್ನು ಖಾಲಿ ಬಿಡುವಂತಿಲ್ಲ, ಆರು ತಿಂಗಳೊಳಗೆ ಚುನಾವಣೆ ನಡೆಸಬೇಕೆಂಬ ನಿಯಮ ಇದ್ದರೂ ಕರೊನಾ ಕಾರಣಕ್ಕೆ ಚುನಾವಣೆ ಆಯೋಗ ವಿನಾಯಿತಿ ಪಡೆದುಕೊಂಡಿದೆ. ಈಗ ಕರೊನಾ ತಗ್ಗಿರುವುದರಿಂದ ಚುನಾವಣೆ ನಡೆಸಲೇ ಬೇಕಾಗಿದೆ. ಇನ್ನು ಜೂನ್ 8ರಂದು ಹಾನಗಲ್ ಕ್ಷೇತ್ರದ ಬಿಜೆಪಿ ಶಾಸಕರಾಗಿದ್ದ ಸಿ.ಎಂ. ಉದಾಸಿ ನಿಧನರಾಗಿದ್ದು, ಅಲ್ಲಿಗೂ ಚುನಾವಣೆ ನಡೆಯಬೇಕಿದೆ.

ಜೆಡಿಎಸ್ ಹಾಗೂ ಬಿಜೆಪಿ ತೆಕ್ಕೆಯಲ್ಲಿದ್ದ ಈ ಎರಡೂ ಕಡೆ ಉಪ ಚುನಾವಣೆಯಲ್ಲಿ ಕಾಂಗ್ರೆಸ್ ಧ್ವಜ ಹಾರಿಸಲೇಬೇಕೆಂದು ಪಕ್ಷದ ಮುಖಂಡರು ಸಭೆಗಳನ್ನು ನಡೆಸಿದ್ದಾರೆ. ಕ್ಷೇತ್ರದ ಚಿತ್ರಣ ಪಡೆದುಕೊಂಡಿದ್ದು, ಸಿಂಧಗಿಗೆ ಅಭ್ಯರ್ಥಿಯನ್ನೂ ಅಂತಿಮಗೊಳಿಸಿದ್ದಾರೆ. ಜೆಡಿಎಸ್ ಶಾಸಕರಾಗಿದ್ದ ಮನಗೂಳಿ ಪುತ್ರ ಅಶೋಕ್ ಮನಗೂಳಿ ಅವರನ್ನು ಪಕ್ಷಕ್ಕೆ ಸೆಳೆದುಕೊಂಡು ಟಿಕೆಟ್ ಪ್ರಕಟಿಸಿದೆ. ಅನುಕಂಪದ ಹಾಗೂ ಕಾಂಗ್ರೆಸ್ ಮತ ಸೇರಿ ಗೆಲ್ಲುವ ಲೆಕ್ಕಾಚಾರ ಕಾಂಗ್ರೆಸ್​ನದ್ದು. ಹಾನಗಲ್ ಅಭ್ಯರ್ಥಿ ಆಯ್ಕೆ ಬಗ್ಗೆಯೂ ಚರ್ಚೆ ನಡೆಸಿದೆ. ಉಪ ಚುನಾವಣೆ ಗೆಲ್ಲುವುದು ಕಷ್ಟವೇನಲ್ಲ ಎಂಬ ಅತಿಯಾದ ಆತ್ಮವಿಶ್ವಾಸದಲ್ಲೇ ಕಾಂಗ್ರೆಸ್ ಇದೆ. ಎರಡೂ ಕಡೆ ಗೆದ್ದರೆ ನಾಡಿನ ಜನರಿಗೆ ದೊಡ್ಡ ಸಂದೇಶ ಕಳಿಸಿದಂತಾಗುತ್ತದೆ, ಮುಂಬರುವ ವಿಧಾನಸಭೆ ಸಾರ್ವತ್ರಿಕ ಚುನಾವಣೆ ತಮಗೆ ಕಷ್ಟವಾಗಲ್ಲ ಎಂಬ ಆತ್ಮಸ್ಥೈರ್ಯ ಹೆಚ್ಚಿಸಿಕೊಳ್ಳಬಹುದು ಎಂಬ ಆಲೋಚನೆಯಲ್ಲಿ ಪಕ್ಷದ ನಾಯಕರಿದ್ದಾರೆ.

ಬಿಜೆಪಿಯಲ್ಲಿರುವ ಅಸಮಾಧಾನಗಳು ತಮ್ಮ ಅಭ್ಯರ್ಥಿಗಳಿಗೆ ಅನುಕೂಲಕರವಾಗಬಹುದು ಎಂದೇ ಕಾಂಗ್ರೆಸ್ ಪ್ರಮುಖರು ಭಾವಿಸಿದ್ದಾರೆ. ಮುಖ್ಯವಾಗಿ ಆಡಳಿತ ವಿರೋಧಿ ಅಲೆ ಇದೆ ಎಂದು ಬಿಂಬಿಸಲು ಈ ಎರಡು ಕ್ಷೇತ್ರದ ಉಪ ಚುನಾವಣೆ ಫಲಿತಾಂಶವನ್ನು ಅಸ್ತ್ರವಾಗಿ ಬಳಸಿಕೊಳ್ಳಲು ಕಾಂಗ್ರೆಸ್​ಗೆ ದೊಡ್ಡ ಅಸ್ತ್ರ ಇದ್ದಂತೆ ಎಂದು ರಾಜಕೀಯ ಪಂಡಿತರು ವಿಶ್ಲೇಷಿಸುತ್ತಾರೆ.

https://www.vijayavani.net/wife-only-explained-to-police-about-her-husbands-attempts-on-students/

https://www.vijayavani.net/town-muncipal-commissioner-urulu-seve-video-viral/