ಆರ್‌ಎಸ್‌ಎಸ್ ಭದ್ರಕೋಟೆ ನಾಗ್ಪುರದಲ್ಲಿ ಮೆಗಾ ರ್‍ಯಾಲಿ ಆಯೋಜಿಸಿದ ಕಾಂಗ್ರೆಸ್‌…ಒಂದೇ ಸಾಲಿನಲ್ಲಿ ಉತ್ತರಿಸಿದ ಖರ್ಗೆ

ಮಹಾರಾಷ್ಟ್ರ: ಕಾಂಗ್ರೆಸ್ ಪಕ್ಷವು ತನ್ನ 139 ನೇ ಸಂಸ್ಥಾಪನಾ ದಿನವನ್ನು ಗುರುವಾರ (ಡಿಸೆಂಬರ್ 28) ಆಚರಿಸುತ್ತಿದೆ. ಸಂಸ್ಥಾಪನಾ ದಿನವನ್ನು ವಿಶೇಷವಾಗಿಸಲು, ಮಹಾರಾಷ್ಟ್ರದ ನಾಗ್ಪುರದಲ್ಲಿ ಕಾಂಗ್ರೆಸ್ ಹೈ ತಯ್ಯಾರ್​​​​ ಹಮ್​​​​​ ರ್‍ಯಾಲಿ ಆಯೋಜಿಸುತ್ತಿದೆ.

ಮುಂದಿನ ವರ್ಷ ನಡೆಯಲಿರುವ ಲೋಕಸಭೆ ಚುನಾವಣೆ ಮೇಲೆ ಕಾಂಗ್ರೆಸ್ ಕಣ್ಣಿಟ್ಟಿದೆ. ಪಕ್ಷದ ಸಂಸ್ಥಾಪನಾ ದಿನದಂದು ನಾಗ್ಪುರದಲ್ಲಿ ಬೃಹತ್ ರ್‍ಯಾಲಿಯೊಂದಿಗೆ ಚುನಾವಣಾ ಪ್ರಚಾರವನ್ನು ಪ್ರಾರಂಭಿಸಲಾಗುತ್ತಿದೆ. ರ್‍ಯಾಲಿಗೆ ಹೈ ತಯ್ಯಾರ್​​​​ ಹಮ್​​​​​ ಎಂದು ಹೆಸರಿಸಲಾಗಿದ್ದು, ಈ ಮೂಲಕ ಜನರನ್ನು ಪಕ್ಷದೊಂದಿಗೆ ಸಂಪರ್ಕಿಸಲಾಗುವುದು. ಕಾಂಗ್ರೆಸ್ ಯಾವಾಗಲೂ ತನ್ನ ಸಿದ್ಧಾಂತವನ್ನು ಆಧರಿಸಿದ ಪಕ್ಷ ಎಂದು ಹೇಳುತ್ತದೆ. ಹಾಗೆಯೇ ಬಿಜೆಪಿ ಮತ್ತು ಆರ್‌ಎಸ್‌ಎಸ್ ಸಿದ್ಧಾಂತದೊಂದಿಗೆ ನಡೆಯುತ್ತಿರುವ ಹೋರಾಟವನ್ನು ಮುಂದುವರಿಸುತ್ತದೆ.

ಈ ರ್‍ಯಾಲಿಯನ್ನು ನಾಗ್ಪುರದಲ್ಲಿಯೇ ಆಯೋಜಿಸಿರುವ ಕುರಿತು ಕಾಂಗ್ರೆಸ್ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರನ್ನು ಮಾಧ್ಯಮದವರು ಕೇಳಿದಾಗ, ನಾವು ನಾಗ್ಪುರದಿಂದಲೇ ನಮ್ಮ ಸಿದ್ಧಾಂತದ ಸಂದೇಶವನ್ನು ನೀಡಲು ಬಯಸುತ್ತೇವೆ. ಪಕ್ಷ ತನ್ನ ಸಿದ್ಧಾಂತದಿಂದ ಎಂದಿಗೂ ಬಗ್ಗುವುದಿಲ್ಲ. ತನ್ನ ಸಿದ್ಧಾಂತದ ಪ್ರಕಾರ ಮಾತ್ರ ಮುನ್ನಡೆಯಲಿದೆ ಎಂದರು.

2024ರಲ್ಲಿ ನಡೆಯಲಿರುವ ಲೋಕಸಭೆ ಚುನಾವಣೆಗೂ ಈ ರ್‍ಯಾಲಿಗೂ ಏನು ಸಂಬಂಧ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, ‘ಎಲ್ಲದರಲ್ಲೂ ಚುನಾವಣೆ ಉದ್ದೇಶ ಇರುವುದಿಲ್ಲ, ಇದು ಸಂಭ್ರಮಾಚರಣೆ. ಆದರೆ, ಈ ಮೂಲಕ ಚುನಾವಣೆ ಗಮನದಲ್ಲಿಟ್ಟುಕೊಂಡು ಕೆಲಸ ಮಾಡುವ ಅಗತ್ಯವಿದೆ ಎಂಬ ಸಂದೇಶವನ್ನು ನಮ್ಮ ಜನತೆಗೆ ರವಾನಿಸುತ್ತೇವೆ ಎಂದರು.

ಇದೇ ಸಂದರ್ಭದಲ್ಲಿ ಮಹಾರಾಷ್ಟ್ರ ಕಾಂಗ್ರೆಸ್ ಮುಖ್ಯಸ್ಥ ನಾನಾ ಪಟೋಲೆ ಅವರು ಪಕ್ಷದ ಮೆಗಾ ರಾಲಿಯನ್ನು ದೇಶದ ಜನರಿಗೆ ಐತಿಹಾಸಿಕ ಕ್ಷಣ ಎಂದು ಬಣ್ಣಿಸಿದ್ದಾರೆ. ನಾಗ್ಪುರದಿಂದ ಬಿಜೆಪಿಯನ್ನು ಸೋಲಿಸಲು ಕಾಂಗ್ರೆಸ್ ಬದಲಾವಣೆಯ ಸಂದೇಶವನ್ನು ನೀಡಲಿದೆ ಎಂದು ಹೇಳಿದರು.
ಮುಂದಿನ ವರ್ಷ ನಡೆಯಲಿರುವ ಲೋಕಸಭೆ ಚುನಾವಣೆಗೆ ಇಲ್ಲಿಂದಲೇ ಕಾಂಗ್ರೆಸ್ ಬಣ ಸದ್ದು ಮಾಡಲಿದೆ ಎಂದು ನಾಗ್ಪುರದ ಕಾಂಗ್ರೆಸ್ ಶಾಸಕಿ ನಿತಿ ರಾವುತ್ ಹೇಳಿದ್ದಾರೆ.

ನಾಗಪುರವು ಆರ್‌ಎಸ್‌ಎಸ್‌ನ ಕೇಂದ್ರ ಕಚೇರಿ ಮಾತ್ರವಲ್ಲ, ಡಾ. ಬಿ.ಆರ್. ಅಂಬೇಡ್ಕರ್ ಬೌದ್ಧ ಧರ್ಮವನ್ನು ಅಳವಡಿಸಿಕೊಂಡ ಐತಿಹಾಸಿಕ ಸ್ಥಳ 'ದೀಕ್ಷಾಭೂಮಿ' ಕೂಡ ಹೊಂದಿದೆ.

https://www.vijayavani.net/trending-india-pakistan-people-common-search-in-2023-on-google