Commonwealth Games: ಬಾಕ್ಸಿಂಗ್​ನಲ್ಲಿ ಭಾರತಕ್ಕೆ ಒಟ್ಟು 10 ಪದಕಗಳು ಖಚಿತ!

ಗ್ಲಾಸ್ಗೋ: ಕಾಮನ್ವೆಲ್ತ್ ಗೇಮ್ಸ್​ನ (Commonwealth Games) ಬಾಕ್ಸಿಂಗ್​ನಲ್ಲಿ (boxing) ಭಾರತೀಯರು ಭರ್ಜರಿ ಪ್ರಾಬಲ್ಯ ಮುಂದುವರಿಸಿದ್ದು, ಜಾದುಮಣಿ ಸಿಂಗ್​, ಅಂಕುಶ್​ ಯಾದವ್​, ಸಚಿನ್​ ಸಿವಾಚ್​, ನರೇಂದರ್​ ಬೆರ್ವಾಲ್​, ಸಾ ಚೌಧರಿ, ಅರುಂಧತಿ ಚೌಧರಿ, ಜಾಸ್ಮಿನ್​ ಲಂಬೋರಿಯಾ ಸಹಿತ 7 ಬಾಕ್ಸರ್​ಗಳು ಸೆಮಿಫೈನಲ್​ ಪ್ರವೇಶಿಸಿದ್ದಾರೆ. ಇದರೊಂದಿಗೆ ಭಾರತಕ್ಕೆ 7 ಪದಕಗಳನ್ನು ಖಚಿತಪಡಿಸಿದರು. ಈ ಮುನ್ನ ಪ್ರಿಯಾ ಘಂಘಾಸ್​ (60 ಕೆಜಿ) ಮತ್ತು ಪ್ರೀತಿ ಪವಾರ್​ (54ಕೆಜಿ) ಕೂಡ ಸೆಮಿಫೈನಲ್​ಗೇರಿದ್ದರೆ, ಒಲಿಂಪಿಕ್ಸ್​ ಪದಕ ವಿಜೇತೆ ಲವ್ಲಿನಾ ಬೋಗೋರ್ಹೈನ್​ (75 ಕೆಜಿ) ಬೈ ಮೂಲಕ ನೇರವಾಗಿ ಉಪಾಂತ್ಯ ಪ್ರವೇಶಿಸಿದ್ದರು. ಇದರಿಂದ ಬಾಕ್ಸಿಂಗ್​ನಲ್ಲಿ ಭಾರತಕ್ಕೆ ಒಟ್ಟು 10 ಪದಕಗಳು ಖಚಿತವೆನಿಸಿವೆ.

ಬುಧವಾರ ನಡೆದ ಮಹಿಳೆಯರ 51 ಕೆಜಿ ವಿಭಾಗದ ಕ್ವಾರ್ಟರ್​ಫೈನಲ್​ನಲ್ಲಿ ಸಾ ಚೌಧರಿ ಉತ್ತರ ಐರ್ಲೆಂಡ್​ನ ಕೈಟ್ಲಿನ್​ ಪೆಯರ್ಸ್​ ವಿರುದ್ಧ 5-0 ಅಂತರದಿಂದ ಗೆದ್ದರೆ, ಅರುಂಧತಿ 70 ಕೆಜಿ ವಿಭಾಗದಲ್ಲಿ ನ್ಯೂಜಿಲೆಂಡ್​ನ ಮಾರ್ಗನ್​ ಹೆಂಡರ್​ಸನ್​ ವಿರುದ್ಧ 3-1ರಿಂದ ಹೋರಾಟಯುತ ಗೆಲುವು ಸಾಧಿಸಿದರು. ಜಾಸ್ಮಿನ್​ 57 ಕೆಜಿ ವಿಭಾಗದಲ್ಲಿ ಇಂಗ್ಲೆಂಡ್​ನ ಎಲಿಸ್​ ಗ್ಲೆೃನ್​ ವಿರುದ್ಧ 4-1ರಿಂದ ಗೆಲುವು ದಾಖಲಿಸಿದರು.

ಸಚಿನ್​ ಸಿವಾಚ್​ ಪುರುಷರ 60 ಕೆಜಿ ವಿಭಾಗದಲ್ಲಿ ಬೋತ್ಸವಾನದ ಟ್ರೆಷರ್​ ಮೊರೆಮಿ ವಿರುದ್ಧ 5-0ಯಿಂದ ಗೆದ್ದರೆ, ಅಂಕುಶ್​ 80 ಕೆಜಿ ವಿಭಾಗದಲ್ಲಿ ಸೀಶೆಲ್ಸ್​ನ ಜೇಡ್​ ಮಿಕಾಕ್​ ವಿರುದ್ಧ 5-0ಯಿಂದ ಜಯಿಸಿದರು. ನರೇಂದರ್​ 90+ಕೆಜಿ ವಿಭಾಗದಲ್ಲಿ ಸಮೋವಾದ ಮಿಚೆಲ್​ ಸೆಕೋ ವಿರುದ್ಧ 3-2ರಿಂದ ಹೋರಾಟಯುತ ಗೆಲುವು ದಾಖಲಿಸಿದರು. ಇದಕ್ಕೆ ಮುನ್ನ ಮಂಗಳವಾರ ರಾತ್ರಿ ನಡೆದ 55 ಕೆಜಿ ವಿಭಾಗದ ಕ್ವಾರ್ಟರ್​ಫೈನಲ್​ನಲ್ಲಿ ಜಾದುಮಣಿ ಸಿಂಗ್​ ಜಾಂಬಿಯಾದ ಎಂವೆಂಗೊ ಎಂವೇಲ್​ ವಿರುದ್ಧ 5&0ಯಿಂದ ಗೆದ್ದು ಪದಕ ಖಚಿತಪಡಿಸಿಕೊಂಡಿದ್ದರು.

ಆದರೆ 90 ಕೆಜಿ ವಿಭಾಗದಲ್ಲಿ ಕಪಿಲಾ ಪೊಖಾರಿಯಾ ಮತ್ತು ಮಹಿಳೆಯರ 65 ಕೆಜಿ ವಿಭಾಗದಲ್ಲಿ ಪರ್ವೀನ್​ ಕ್ವಾರ್ಟರ್​ಫೈನಲ್​ನಲ್ಲೇ ಸೋತು ಪದಕವಂಚಿತರಾಗಿದ್ದರು. ಕೂಟಕ್ಕೆ ತೆರಳಿದ ಭಾರತದ 14 ಬಾಕ್ಸರ್​ಗಳಲ್ಲಿ 10 ಬಾಕ್ಸರ್​ಗಳು ಪದಕದೊಂದಿಗೆ ತವರಿಗೆ ಮರಳಲಿದ್ದಾರೆ.