ನಂಬರ್ ಪ್ಲೇಟ್ ಬುಕ್ಕಿಂಗ್​ಗೆ ಕಮೀಷನ್ ವಸೂಲಿ!; ಎಚ್ಚೆಸ್ಸಾರ್ಪಿ ಹಾಕಿಸಬೇಕೋ ಬೇಡವೋ ಗೊಂದಲ; ಅರ್ಹತೆ ಇಲ್ಲದ ಕಂಪನಿಗಳಿಗೆ ಟೆಂಡರ್ ಆರೋಪ

2019 ಏ.1ಕ್ಕಿಂತ ಮುಂಚೆ ನೋಂದಣಿಯಾಗಿರುವ ವಾಹನಗಳಿಗೆ ಕಡ್ಡಾಯವಾಗಿ ಹೈಸೆಕ್ಯುರಿಟಿ ರಿಜಿಸ್ಟ್ರೇಷನ್ ಪ್ಲೇಟ್ (ಎಚ್​ಎಸ್​ಆರ್​ಪಿ) ಅಳವಡಿಸುವುದನ್ನು ಕಡ್ಡಾಯಗೊಳಿಸಿರುವ ಸಾರಿಗೆ ಇಲಾಖೆ, ನ. 17ರ ಒಳಗಾಗಿ ಬದಲಾವಣೆ ಮಾಡದಿದ್ದರೆ ದಂಡ ವಿಧಿಸುವ ಎಚ್ಚರಿಕೆ ಕೊಟ್ಟಿದೆ. ಆದರೆ, ಅರ್ಹತೆ ಇಲ್ಲದ ಕಂಪನಿಗಳಿಗೆ ನಂಬರ್ ಪ್ಲೇಟ್ ಅಳವಡಿಸುವ ಟೆಂಡರ್ ಕೊಟ್ಟಿರುವ ಆರೋಪದಲ್ಲಿ ಪ್ರಕರಣ ಹೈಕೋರ್ಟ್ ಮೆಟ್ಟಿಲೇರಿರುವ ಬೆನ್ನಲ್ಲೇ ನಂಬರ್ ಪ್ಲೇಟ್ ಹಾಕಲು ಸ್ಲಾಟ್ ಬುಕ್ಕಿಂಗ್ ಹೆಸರಲ್ಲಿ ಜನರಿಂದ ಕಮೀಷನ್ ವಸೂಲಿ ದಂಧೆ ಶುರುವಾಗಿದೆ. ನಿಯಮಾನುಸಾರ ಟೆಂಡರ್ ನಡೆಸದೆ, ಕ್ರಿಮಿನಲ್ ಹಿನ್ನೆಲೆಯುಳ್ಳ ಕೆಲ ಕಂಪನಿಗಳಿಗಷ್ಟೇ ಎಚ್​ಎಸ್​ಆರ್​ಪಿ ಅಳವಡಿಸಲು ಸಾರಿಗೆ ಇಲಾಖೆ ಅನುಮತಿ ನೀಡಿದೆ ಎಂದು ಆರೋಪಿಸಿ ಹೈಕೋರ್ಟ್​ಗೆ ಅರ್ಜಿ ಸಲ್ಲಿಕೆಯಾಗಿರುವುದರಿಂದ ವಾಹನಗಳ ಮಾಲೀಕರಲ್ಲಿ ಕೋರ್ಟ್ ಅಂತಿಮ ಆದೇಶದವರೆಗೆ ಎಚ್​ಎಸ್​ಆರ್​ಪಿ ನಂಬರ್ ಪ್ಲೇಟ್​ಗಳನ್ನು ಹಾಕಿಸಬೇಕೋ ಬೇಡವೋ ಎಂಬ ಗೊಂದಲ ಶುರುವಾಗಿದೆ. ಇದೇ ವೇಳೆ ಸಾರಿಗೆ ಇಲಾಖೆ ನಿಗದಿಪಡಿಸಿರುವ ದರಕ್ಕಿಂತ ಹೆಚ್ಚು ವಸೂಲಿ ಮಾಡುತ್ತಿರುವುದಕ್ಕೆ ಜನರಲ್ಲಿ ಆಕ್ರೋಶ ವ್ಯಕ್ತವಾಗಿದೆ.

ಇದಲ್ಲದೆ ಮೆಕಾನಿಕ್ ಶಾಪ್ ಅಥವಾ ರಸ್ತೆ ಬದಿ ಮಾರಾಟಗಾರರ ಬಳಿ ಹೋಗಿ ಹೊಸ ನಂಬರ್ ಅಳವಡಿಸಿಕೊಳ್ಳಲು ಅವಕಾಶ ಇಲ್ಲ. ಏನಿದ್ದರೂ ಆನ್​ಲೈನ್​ನಲ್ಲೇ ಸ್ಲಾಟ್ ಬುಕ್ ಮಾಡಿಕೊಂಡು ಅಲ್ಲೇ ಶುಲ್ಕ ಪಾವತಿಸಿ, ಆಯ್ಕೆ ಮಾಡಿಕೊಂಡ ಡೀಲರ್ ಸ್ಥಳಕ್ಕೆ ಹೋಗಿ ರಸೀದಿ ತೋರಿಸಿದರೆ ನಂಬರ್ ಪ್ಲೇಟ್ ಹಾಕಿಕೊಡುತ್ತಾರೆ. ಆದರೆ, ಬಹುತೇಕ ಜನರಿಗೆ ಆನ್​ಲೈನ್​ನಲ್ಲಿ ಸ್ಲಾಟ್ ಬುಕ್ಕಿಂಗ್ ಬರುವುದಿಲ್ಲ. ಮತ್ತೆ ಕೆಲವರಿಗೆ ಬಂದರೂ ಅಷ್ಟೆಲ್ಲ ಕಿರಿಕಿರಿ ಅನುಭವಿಸಲು ತಯಾರಿಲ್ಲ.

ಎಚ್​ಎಸ್​ಆರ್​ಪಿ ಸ್ಲಾಟ್ ಬುಕ್ಕಿಂಗ್​ಗಾಗಿಯೇ 3ನೇ ವ್ಯಕ್ತಿಗಳು/ಏಜೆನ್ಸಿಗಳು ಅಥವಾ ಸೈಬರ್ ಕೇಂದ್ರಗಳನ್ನು ಅವಲಂಬಿಸಬೇಕಾಗಿದೆ. ವಾಹನದ ವಿವರ ಹಾಗೂ ಹಣ ಕೊಟ್ಟರೆ ಅವರೇ ಸ್ಲಾಟ್ ಬುಕ್ ಮಾಡಿಕೊಡುತ್ತಾರೆ. ಆದರೆ, ಒಂದು ಕಾರು, ಒಂದು ಬೈಕ್​ಗೆ ಹೊಸದಾಗಿ ನಂಬರ್ ಪ್ಲೇಟ್ ಅಳವಡಿಸಲು ಬುಕ್ಕಿಂಗ್ ಮಾಡಲು ಫಲಕದ ಶುಲ್ಕ ಬಿಟ್ಟು ಹೆಚ್ಚುವರಿಯಾಗಿ ಕನಿಷ್ಠ 400 ರೂ.ನಿಂದ 500 ರೂ. ಕಮೀಷನ್ ಕೀಳುತ್ತಿದ್ದಾರೆ. ನಂಬರ್ ಪ್ಲೇಟ್ ಶುಲ್ಕದ ಜತೆಗೆ ಕಮೀಷನ್ ಹೊರೆಯೂ ಜನರ ಮೇಲೆ ಬೀಳುತ್ತಿದೆ.

526 ರೂ. ಹೆಚ್ಚುವರಿ ವಸೂಲಿ!: ಪ್ರಕಾಶ್ ಎಂಬುವರು ತಮ್ಮ ಕಾರು ಹಾಗೂ ಬೈಕ್​ಗೆ ಎಚ್​ಎಸ್​ಆರ್​ಪಿ ಅಳವಡಿಸಲು 3ನೇ ವ್ಯಕ್ತಿಯ ಮೂಲಕ ಯಶವಂತಪುರದ ಟ್ರೖೆಡೆಂಟ್ ಆಟೋಮೊಬೈಲ್ಸ್​ನಲ್ಲಿ ಸ್ಲಾಟ್ ಬುಕ್ ಮಾಡಿಸಿದ್ದಾರೆ. ಬುಕ್ ಮಾಡಿಕೊಟ್ಟ ವ್ಯಕ್ತಿ ಒಟ್ಟು 1800 ರೂ. ಸ್ವೀಕರಿಸಿದ್ದಾನೆ. ರಸೀದಿಯಲ್ಲಿ ಕಾರಿಗೆ 778 ರೂಪಾಯಿ 80 ಪೈಸೆ ಹಾಗೂ ಬೈಕ್ 495 ರೂಪಾಯಿ 60 ಪೈಸೆ ನಮೂದಾಗಿದೆ. ಅಂದರೆ ಹೆಚ್ಚುವರಿಯಾಗಿ 526 ರೂ. ಪಡೆಯಲಾಗಿದೆ. ಈ ಬಗ್ಗೆ ಪ್ರಶ್ನಿಸಿದರೆ ಸ್ಲಾಟ್ ಬುಕ್ಕಿಂಗ್ ಮಾಡಿಕೊಟ್ಟಿದ್ದಕ್ಕೆ ಕಮೀಷನ್ ಎಂಬ ಉತ್ತರ ಬಂದಿದೆ.

ಬದಲಾವಣೆ ಹೇಗೆ?

• Transport.karnataka.gov.in  ಅಥವಾ www.siam.inಗೆ ಭೇಟಿ ಕೊಟ್ಟು ಬುಕ್ ಎಚ್​ಎಸ್​ಆರ್​ಪಿ ಮೇಲೆ ಕ್ಲಿಕ್ ಮಾಡಬೇಕು.
• ನಿಮ್ಮ ವಾಹನ ತಯಾರಕರನ್ನು ಆಯ್ಕೆ ಮಾಡಿ ವಾಹನದ ಮೂಲ ವಿವರಗಳನ್ನು ಭರ್ತಿ ಮಾಡಬೇಕು.
• ಅನುಕೂಲಕ್ಕೆ ತಕ್ಕಂತೆ ಡೀಲರ್ ಸ್ಥಳ ಆಯ್ಕೆ ಮಾಡಿ, ಆನ್​ಲೈನ್​ನಲ್ಲಿ ಶುಲ್ಕ ಪಾವತಿಸಬೇಕು.
• ವಾಹನ ಮಾಲೀಕರ ಮೊಬೈಲ್ ಸಂಖ್ಯೆ ಒಟಿಪಿ ರವಾನೆಯಾಗುತ್ತದೆ. ದಿನಾಂಕ, ಸಮಯ ಆಯ್ಕೆ ಮಾಡಿಕೊಳ್ಳಬೇಕು.
• ವಾಹನ ಮಾಲೀಕರ ಕಚೇರಿ, ಮನೆಯನ್ನು ನಂಬರ್ ಪ್ಲೇಟ್ ಅಳವಡಿಕೆಗೆ ಆಯ್ಕೆ ಮಾಡಿಕೊಂಡರೆ ಅವರೇ ಬರುತ್ತಾರೆ.

ಸಮಸ್ಯೆಗಳೇನು?

• ಪೋರ್ಟಲ್​ಗೆ ಹೋಗಿ ಸ್ಲಾಟ್ ಬುಕ್ ಮಾಡಿಕೊಳ್ಳಲು ಬಹುತೇಕರಿಗೆ ಕಂಪ್ಯೂಟರ್ ಜ್ಞಾನ ಗೊತ್ತಿಲ್ಲ.
• 3ನೇ ವ್ಯಕ್ತಿಗಳ ಮೂಲಕ ಬುಕ್ ಮಾಡುವ ಪರಿಸ್ಥಿತಿ. ಇದರಿಂದ ವೈಯಕ್ತಿಕ ವಿವರ ದುರ್ಬಳಕೆಯಾಗುವ ಸಾಧ್ಯತೆ ಜತೆಗೆ ಹೆಚ್ಚುವರಿ ಹಣ ವಸೂಲಿ.
• ನ. 17ರವರೆಗೆ ಗಡುವು ಕೊಟ್ಟಿರುವುದರಿಂದ ಬರೀ 2 ತಿಂಗಳ ಅವಧಿಯಲ್ಲಿ ಕೋಟ್ಯಂತರ ವಾಹನಗಳ ನಂಬರ್ ಪ್ಲೇಟ್ ಬದಲಾವಣೆ ಕಷ್ಟ. ಕನಿಷ್ಟ 1 ವರ್ಷ ಅವಕಾಶ ಕೊಡಬೇಕು ಎಂಬ ಮನವಿ.
• ಕೆಲ ನಂಬರ್ ಪ್ಲೇಟ್ ತಯಾರಕರು ಹೈಕೋರ್ಟ್ ಮೆಟ್ಟಿಲೇರಿರುವುದರಿಂದ ಕೋರ್ಟ್ ಆದೇಶ ಏನಾಗುತ್ತದೆ ಎಂಬ ಗೊಂದಲದಲ್ಲಿ ವಾಹನ ಮಾಲೀಕರು.

https://www.vijayavani.net/why-women-leave-men-they-love-what-every-man-should-know

https://www.vijayavani.net/in-kundapura-a-leopard-ran-away-from-a-dog-and-fell-into-a-well