ಕೃಷಿ ಭೂಮಿ ಇಲ್ಲ, ಹೆಚ್ಚು ನೀರಿನ ವ್ಯವಸ್ಥೆ ಇಲ್ಲ, ದೊಡ್ಡ ಬಂಡವಾಳವಿಲ್ಲ. ಆದರೆ, ಕಷ್ಟಪಟ್ಟು ದುಡಿಯಲು ಸಿದ್ಧರಿದ್ದೇವೆ ಎನ್ನುವವರಿಗೆ ಅಣಬೆ ಕೃಷಿ ಹೇಳಿ ಮಾಡಿಸಿದಂತಿದೆ. 10-20 ಸಾವಿರ ರೂ. ಬಂಡವಾಳದೊಂದಿಗೆ 20*30 ಜಾಗ ಇದ್ದರೂ ಸಾಕು ಪ್ರತಿದಿನ ಸುಮಾರು 12 ಕೆಜಿ ಅಣಬೆ ಬಿಡಿಸಿಕೊಂಡು ದಿನಕ್ಕೆ 2,400 ರೂ. ಆದಾಯ ಗಳಿಸಬಹುದು. ಸಣ್ಣ ಪ್ರಮಾಣದಲ್ಲಿ ಅಣಬೆ ಕೃಷಿ ಮಾಡಲು ಕಾರ್ವಿುಕರ ಅಗತ್ಯವಿರುವುದಿಲ್ಲ. ಮನೆಯವರೇ ಸೇರಿಕೊಂಡು ಅಣಬೆ ಕೃಷಿಯಲ್ಲಿ ತೊಡಗಬಹುದು. ಒಂದು ರೂಪಾಯಿ ಬಂಡವಾಳಕ್ಕೆ ನಾಲ್ಕು ರೂಪಾಯಿ ಲಾಭ ಕೊಡುವ ಕೃಷಿ ಅಂದ್ರೆ ಅದು ಅಣಬೆ ಕೃಷಿ. ಇದು ಯಾರೋ ಹೇಳುತ್ತಿರುವ ಮಾತಲ್ಲ. ಕೃಷಿ ತಜ್ಞರು, ರೈತರೇ ಅಣಬೆ ಕೃಷಿಯಲ್ಲಿ ಇಷ್ಟೊಂದು ಲಾಭ ಗಳಿಸಲು ಸಾಧ್ಯ ಎನ್ನುವುದನ್ನು ನಿರೂಪಿಸಿದ್ದಾರೆ. ಇನ್ನು ದೊಡ್ಡ ಪ್ರಮಾಣದಲ್ಲಿ ವಾಣಿಜ್ಯ ಅಣಬೆ ಕೃಷಿ ಮಾಡಿದರೆ ಹೆಚ್ಚು ಲಾಭ ಗಳಿಸಲು ಕೂಡ ಸಾಧ್ಯವಿದೆ. ಯೋಜಿತವಾಗಿ ಅಣಬೆ ಕೃಷಿಗೆ ಇಳಿದರೆ ತಿಂಗಳಿಗೆ 1 ಲಕ್ಷ ರೂ. ಆದಾಯ ಗಳಿಸುವುದು ಸುಲಭ ಸಾಧ್ಯ.
