ರಾಜ್ಯದಲ್ಲಿ ಅಡಕೆ ಬೆಳೆಯುವ ಪ್ರದೇಶ ಗಣನೀಯವಾಗಿ ಹೆಚ್ಚಾಗಿರುವ ನಡುವೆ ಕ್ವಿಂಟಾಲ್ ರಾಶಿ ಅಡಕೆ 60 ಸಾವಿರ ರೂ. ಗಡಿ ದಾಟಿದ್ದು, ಬೆಳೆಗಾರರ ಮೊಗದಲ್ಲಿ ಮಂದಹಾಸ ಮೂಡಿಸಿದೆ. ಕಳೆದ ವರ್ಷ ಬರ ಮತ್ತು ಅತಿಯಾದ ಬಿಸಿಲಿನಿಂದ ಇಳುವರಿ ಕುಸಿತ ಕಂಡಿದ್ದು, ಬೇಡಿಕೆ ಹೆಚ್ಚಿರುವುದರಿಂದ ಬೆಲೆ ದಿಢೀರ್ ಏರಿಕೆಯಾಗಿದ್ದು ಮತ್ತಷ್ಟು ದರ ಏರಿಕೆ ಆಗುವ ನಿರೀಕ್ಷೆಯಲ್ಲಿ ಬೆಳೆಗಾರರಿದ್ದಾರೆ. ಅಡಕೆ ಪ್ರದೇಶ ರಾಜ್ಯದಲ್ಲಿ 4.76 ಲಕ್ಷ ಹೆಕ್ಟೇರ್ಗೆ ಏರಿಕೆಯಾಗಿದೆ. ಬೆಲೆ ಮೇಲೆ ಋುಣಾತ್ಮಕ ಪರಿಣಾಮ ಬೀರುವ ಆತಂಕ ಕೊಂಚ ಕಡಿಮೆ ಆಗುವಂತಹ ಸುದ್ದಿ ಅಡಕೆ ಮಾರುಕಟ್ಟೆಯಿಂದ ಹೊರಬಿದ್ದಿದೆ. ಕಳೆದ ಕೆಲ ದಿನಗಳಿಂದ ಅಡಕೆ ಬೆಲೆ ಸತತವಾಗಿ ಏರುತ್ತಿದ್ದು, ಕ್ವಿಂಟಾಲ್ ರಾಶಿ ಅಡಕೆ 60,589 ರೂ.ವರೆಗೆ ತಲುಪಿದೆ. ಶಿವಮೊಗ್ಗ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿಯಲ್ಲಿ ಸೋಮವಾರ ಸರಕು ಅಡಕೆಗೆ ಕ್ವಿಂಟಾಲ್ಗೆ 56109-91069 ರೂ., ರಾಶಿಗೆ 47889-60589 ರೂ., ಗೊರಬಲು 20009-32869 ರೂ. ಬೆಟ್ಟೆ ಅಡಕೆಗೆ 51009-58911 ರೂ. ಧಾರಣೆ ಬಂದಿದೆ.
