ಕರೊನಾ ಸೇನಾನಿಗೆ ಸಿಎಂ ಸಲಾಂ: ನರ್ಸ್ ಸುಗಂಧಾಗೆ ಕರೆ ಮಾಡಿ ಕೃತಜ್ಞತೆ ಸಲ್ಲಿಸಿದ ಸಿಎಂ ಯಡಿಯೂರಪ್ಪ

ಬೆಳಗಾವಿ: ಕಳೆದು ಹದಿನೈದು ದಿನಗಳಿಂದ ಮನೆಗೂ ಹೋಗಲಾಗದೆ, ಪುಟ್ಟ ಮಗಳು, ಪತಿಯನ್ನು ಭೇಟಿ ಮಾಡಲಾಗದೆ, ಜಿಲ್ಲಾಸ್ಪತ್ರೆಯಲ್ಲಿದ್ದುಕೊಂಡು ಕರೊನಾ ವಿರುದ್ಧ ಸೆಣಸುತ್ತಿರುವ ನರ್ಸ್ ಸುಗಂಧಾ ಕೊರೆಪ್ಪಗೋಳ ಹಾಗೂ ವೈದ್ಯರಿಗೆ ಮುಖ್ಯಮಂತ್ರಿ ಯಡಿಯೂರಪ್ಪ ಕೃತಜ್ಞತೆ ಸಲ್ಲಿಸಿದ್ದಾರೆ.

ಅಮ್ಮ ಕಣ್ಣಿಗೆ ಕಂಡರೂ, ಹತ್ತಿರ ಹೋಗಲಾಗದೆ ಅಳುತ್ತಿದ್ದ ಕಂದಮ್ಮ ಐಶ್ವರ್ಯಾಳ ಹೃದಯ ಮಿಡಿಯುವ ಕತೆಯನ್ನು ‘ಅಮ್ಮಾ ಬಾ ಅಮ್ಮಾ’ ಎಂಬ ಶೀರ್ಷಿಕೆಯಡಿ ದಿಗ್ವಿಜಯ ನ್ಯೂಸ್ ಮಂಗಳವಾರ ಬಿತ್ತರಿಸಿತ್ತು. ವಿಜಯವಾಣಿ ಬೆಳಗಾವಿ ಆವೃತ್ತಿಯಲ್ಲೂ ಬುಧವಾರ ‘ಸಂಬಂಧವನ್ನೂ ಕಸಿದ ಕರೊನಾ’ ಎಂಬ ಶೀರ್ಷಿಕೆಯಡಿ ವಿಶೇಷ ವರದಿ ಪ್ರಕಟವಾಗಿತ್ತು.

ರಕ್ಷಣೆಗೆ ನಾವಿದ್ದೇವೆ: ದಿಗ್ವಿಜಯ ನ್ಯೂಸ್ ವರದಿಯನ್ನು ನೋಡಿದ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಬುಧವಾರ ಬೆಳಗ್ಗೆ 11 ಗಂಟೆಗೆ ಸುಗಂಧಾಗೆ ಕರೆ ಮಾಡಿದರು. ‘ಕರೊನಾ ವೈರಸ್​ನಿಂದ ಜನರನ್ನು ರಕ್ಷಿಸಲು ನಿಮ್ಮ ಮನೆ, ಮಕ್ಕಳನ್ನೂ ಲೆಕ್ಕಿಸದೆ ಹಗಲಿರುಳು ಶ್ರಮಿಸುತ್ತಿದ್ದೀರಿ. ನಿಮ್ಮ ಸಹಕಾರ ಹೀಗೆಯೇ ಇರಲಿ. ಮುಂದಿನ ದಿನಗಳಲ್ಲಿ ನಿಮಗೆಲ್ಲ ಒಳ್ಳೆಯದಾಗುತ್ತದೆ. ರಾಜ್ಯದ ವೈದ್ಯರ, ಎಲ್ಲ ನರ್ಸ್​ಗಳ ಕುಟುಂಬದ ರಕ್ಷಣೆಯ ಜವಾಬ್ದಾರಿ ಸರ್ಕಾರದ ಮೇಲಿದ್ದು, ಯಾವುದೇ ಚಿಂತೆ ಮಾಡದೆ ಸೇವೆ ಮುಂದುವರಿಸಿ. ಸಂಕಷ್ಟ ಸಂದರ್ಭದಲ್ಲಿ ಶ್ರಮಿಸುತ್ತಿರುವ ನಿಮ್ಮ ಸೇವೆಯನ್ನು ಸರ್ಕಾರ ಯಾವತ್ತೂ ಮರೆಯುವುದಿಲ್ಲ’ ಎಂದು ಹೇಳಿ ಧೈರ್ಯ ತುಂಬಿದರು.

https://www.vijayavani.net/tablighi-jamaats-maulana-saad-traced-at-religious-place-in-delhi/