ಬೆಂಗಳೂರು: ಪರ್ಸಂಟೇಜ್ ಗದ್ದಲದ ಮುಜುಗರ, ಕರೊನಾ ಹೊಸ ರೂಪಾಂತರಿ ಒಮಿಕ್ರಾನ್ ಕರಿಛಾಯೆ ಬೆನ್ನಲ್ಲೇ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ದೆಹಲಿಗೆ ಹೊರಟಿರುವುದು ರಾಜ್ಯ ರಾಜಕೀಯ ವಲಯದಲ್ಲಿ ಕುತೂಹಲ ಕೆರಳಿಸಿದೆ. ಅಧಿಕೃತ ಮಾಹಿತಿ ಪ್ರಕಾರ ಸಿಎಂ ಗುರುವಾರ ಬೆಳಗ್ಗೆ 9.45ಕ್ಕೆ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ದೆಹಲಿಗೆ ಪ್ರಯಾಣ ಬೆಳೆಸುವರು. ಕೇಂದ್ರ ಸಚಿವರ ಭೇಟಿ, ಸಂಜೆ ಖಾಸಗಿ ವಾಹಿನಿಯೊಂದರ ಕಾರ್ಯಕ್ರಮದಲ್ಲಿ ಪಾಲ್ಗೊಂಡ ಬಳಿಕ ಬೊಮ್ಮಾಯಿ ಕರ್ನಾಟಕ ಭವನದಲ್ಲಿ ವಾಸ್ತವ್ಯ ಹೂಡಲಿದ್ದಾರೆ. ಶುಕ್ರವಾರದ ಕಾರ್ಯಕ್ರಮ ಪಟ್ಟಿ ಹಾಗೂ ರಾಜ್ಯಕ್ಕೆ ಹಿಂತಿರುಗುವುದನ್ನು ಮುಕ್ತವಾಗಿಡಲಾಗಿದೆ. ಕಳೆದ ಬಾರಿ ದೆಹಲಿ ಪ್ರವಾಸಕ್ಕೆ ಮುನ್ನ ಬಿಟ್ಕಾಯಿನ್ ಹಗರಣದ ಆರೋಪ-ಪ್ರತ್ಯಾರೋಪ, ಆಂತರಿಕವಾಗಿ ತೀವ್ರ ಚರ್ಚೆ, ಸಂಶಯದ ಬಿಸಿಗಾಳಿ ಯಿತ್ತು. ಈ ಬಾರಿ ಶೇ.40 ಪರ್ಸಂಟೇಜ್, ಲಂಚದ ಮೂರುಪಟ್ಟು ಹೆಚ್ಚಳದ ದೂರು ಸಿಎಂ ಬೊಮ್ಮಾಯಿಗೆ ಫಜೀತಿ ತಂದೊಡ್ಡಿದೆ.
