ಸೋಮವಾರ ಮುಂಜಾನೆ ಬಿಗಿ ಪೊಲೀಸ್ ಬಂದೋಬಸ್ತ್ ನಡುವೆ ಪುರಸಭಾ ಸಿಬ್ಬಂದಿ ಕಾರ್ಯಾಚರಣೆ ಪ್ರಾರಂಭಿಸುವ ಮುನ್ನವೇ ಕೆಲ ವ್ಯಾಪಾರಸ್ಥರು ಸ್ವತಃ ಅಂಗಡಿ ಖಾಲಿ ಮಾಡುವ ಮತ್ತು ತಾವೇ ತೆರವುಗೊಳಿಸಲು ಮುಂದಾದರು. ಮತ್ತೆ ಕೆಲವರು ಮಧ್ಯಾಹ್ನದವರೆಗೆ ಕಾಲಾವಕಾಶ ಕೇಳಿದರು. ತೆರವುಗೊಳಿಸುವ ವಿಷಯ ತಿಳಿದಿದ್ದ ವ್ಯಾಪಾರಸ್ಥರು ಭಾನುವಾರ ರಾತ್ರಿಯೇ ಅಂಗಡಿಯಲ್ಲಿದ್ದ ಸಾಮಾನುಗಳನ್ನು ಖಾಲಿ ಮಾಡಿದ್ದರು. ಈ ಮಧ್ಯೆ ಸಮಯಾವಕಾಶ ಕೇಳಿದ್ದ ವ್ಯಾಪಾರಸ್ಥರು ನಾವು ತೆರವುಗೊಳಿಸುವುದಿಲ್ಲ ಎಂಬ ನಿರ್ಣಯ ಹೊರಹಾಕಿದರು. ವ್ಯಾಪಾರಸ್ಥರ ನಿಲುವು ತಿಳಿದು ಪ್ರತಿ ಅಂಗಡಿಗಳನ್ನು ಒಂದೊಂದಾಗಿ ನಿಯಮಾನುಸಾರ ವಿಡಿಯೋ ಚಿತ್ರೀಕರಣ ಮಾಡಿಸುವ ಮೂಲಕ ಮುಖ್ಯಾಧಿಕಾರಿ ನೇತೃತ್ವದಲ್ಲಿ ಪ್ರತ್ಯೇಕವಾಗಿ ಎಲ್ಲ 29 ಶೆಡ್ಗಳನ್ನು ತೆರವುಗೊಳಿಸಲಾಯಿತು.
