ಒತ್ತುವರಿ ತೆರವುಗೊಳಿಸಿ, ಸ್ವಚ್ಛತೆ ಕಾಪಾಡಿ

ಕೋಲಾರ: ನಗರದ ವಿವಿಧೆಡೆ ಗುರುವಾರ ಪ್ರದಣೆ ಮಾಡಿದ ಜಿಲ್ಲಾಧಿಕಾರಿ ಡಾ.ಎಂ.ಆರ್​.ರವಿ ಅವರು ಕಸದ ರಾಶಿ, ಗುಂಡಿಗಳನ್ನು ಕಂಡು ಅಧಿಕಾರಿಗಳನ್ನು ತರಾಟೆಗೆ ತೆಗೆದುಕೊಂಡರು.

ಬಸ್​ ನಿಲ್ದಾಣ, ಕ್ಲಾಕ್​ ಟವರ್​, ಎಂಜಿ ರಸ್ತೆ, ಟೇಕಲ್​ ರಸ್ತೆ, ನಗರ ಸಮೀಪದ ಹೆದ್ದಾರಿ ರಸ್ತೆ, ಬೈರೇಗೌಡ ನಗರ, ಆರ್​ಟಿಒ ಕಚೇರಿ, ಎಸ್​ಎನ್​ಆರ್​ ವೃತ್ತಕ್ಕೆ ಭೇಟಿ ನೀಡಿ ಸ್ವಚ್ಛತೆ, ಫುಟ್ ಪಾಥ್​ ತೆರವು ಮಾಡುವಂತೆ ಸೂಚಿಸಿದರು.

ಆಸ್ಪತ್ರೆಯ ಸಮೀಪ ಫುಟ್ ಪಾಥ್​ ಮೇಲಿನ ಹೋಟಲ್​ಗಳು ಸ್ವಚ್ಛತೆ ಕಾಪಾಡಬೇಕು, ಎಳನೀರು ಮಾರಾಟ ಮಾಡುವವರು ವ್ಯಾಪಾರ ಮುಗಿದ ನಂತರ ತ್ಯಾಜ್ಯವನ್ನು ತೆಗೆದುಕೊಂಡು ಹೋಗಬೇಕು. ಸ್ಥಳದಲ್ಲೇ ಬಿಟ್ಟರೆ ದಂಡ ಪಾವತಿ ಮಾಡಬೇಕಾಗುತ್ತದೆ ಎಂದು ಎಚ್ಚರಿಕೆ ನೀಡಿದರು.

ಮಾಂಸದ ಅಂಗಡಿಗಳವರು ತ್ಯಾಜ್ಯವನ್ನು ಎಲ್ಲಂದರಲ್ಲಿ ಬಿಸಾಡಬಾರದು, ಆರೋಗ್ಯ ನಿರೀಕ್ಷರು ಈ ಬಗ್ಗೆ ನಿಗಾವಹಿಸಿ ನಿಯಮ ಪಾಲನೆ ಮಾಡದ ಅಂಗಡಿ ಮಾಲೀಕರಿಗೆ ನೋಟಿಸ್​ ಕೊಟ್ಟು ಕ್ರಮವಹಿಸಬೇಕು. ವೈಜ್ಞಾನಿಕವಾಗಿ ತ್ಯಾಜ್ಯ ವಿಲೇವಾರಿ ಮಾಡಬೇಕು, ಅದು ಬಿಟ್ಟು ಸಾರ್ವಜನಿಕರ ಸ್ಥಳದಲ್ಲಿ ಕಸದ ರಾಶಿ ಹಾಕಿದರೆ ಅಂತಹವರ ಪರವಾನಗಿ ರದ್ದು ಮಾಡಬೇಕು ಎಂದು ಆರೋಗ್ಯ ನಿರೀಕ್ಷಕರಿಗೆ ಸೂಚಿಸಿದರು.

ವಾಣಿಜ್ಯ ಅಂಗಡಿಗಳವರು ಫುಟ್ ಪಾಥ್​ ಮೇಲೆ ಅಂಗಡಿ ಸಾಮಾಗ್ರಿಗಳನ್ನು, ಜಾಹೀರಾತು ಲಕ ಇಟ್ಟುಕೊಳ್ಳುತ್ತಾರೆ. ಇದು ಸಾರ್ವಜನಿಕರ ಓಡಾಟಕ್ಕೆ, ವಾಹನ ನಿಲುಗಡೆಗೆ ಅಡಚಣೆಯಾಗುತ್ತದೆ. ಅವರು ಫುಟ್ ಪಾಥ್​ ಮೇಲೆ ಏನೂ ಇಡದಂತೆ ಎಚ್ಚರಿಕೆ ನೀಡಬೇಕು ಎಂದು ಸಲಹೆ ನೀಡಿದರು.

ನಗರದಲ್ಲಿ ಅಳವಡಿಸಲಾಗಿರುವ ಫ್ಲೆಕ್ಸ್​, ಬ್ಯಾನರ್​ ತೆರವು ಮಾಡಬೇಕು, ಎಂಜಿ ರಸ್ತೆಯಲ್ಲಿ ಫುಟ್ ಪಾಥ್​ ಒತ್ತುವರಿಯಾಗಿದ್ದು, ಸಾರ್ವಜನಿಕರು ರಸ್ತೆಯಲ್ಲಿ ಓಡಾಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಆದ್ದರಿಂದ ನಗರಸಭೆ, ಪೊಲೀಸ್​ ಅಧಿಕಾರಿಗಳು ಜಂಟಿಯಾಗಿ ಕಾರ್ಯಾಚರಣೆ ನಡೆಸಿ ಫುಟ್ ಪಾಥ್ ತೆರವು ಮಾಡಬೇಕು, ಅದೇ ರೀತಿ ಕಾಳಮ್ಮ ಗುಡಿ ರಸ್ತೆಯಲ್ಲೂ ಈ ಕೆಲಸ ಆಗಬೇಕು ಎಂದು ಜಿಲ್ಲಾಧಿಕಾರಿ ಡಾ.ಎಂ.ಆರ್​.ರವಿ ತಿಳಿಸಿದರು.

ಕಾಲಮಿತಿಯೊಳಗೆ ಕೆಲಸ

ನಗರ ಪ್ರದಣೆ ಸಂದರ್ಭದಲ್ಲಿ ಜಿಲ್ಲಾಧಿಕಾರಿ ಅವರು ಕೆಲ ಸಲಹೆ ಸೂಚನೆಗಳನ್ನು ನೀಡಿದ್ದು, ಕಾಲಮಿತಿಯೊಳಗೆ ಕಾರ್ಯಗತಗೊಳಿಸಲಾಗುವುದು ಎಂದು ನಗರಸಭೆ ಪೌರಾಯುಕ್ತ ಪ್ರಸಾದ್​ ಹೇಳಿದರು. ಮಂಗಳವಾರ ಕಾಳಮ್ಮ ಗುಡಿ ರಸ್ತೆ ತೆರವು ಮಾಡಲು ಕ್ರಮವಹಿಸಲಾಗಿದ್ದು, ಪೊಲೀಸ್​ ಅಧಿಕಾರಿಗಳೊಂದಿಗೆ ಚರ್ಚಿಸಲಾಗಿದೆ. ಇನ್ನು ಮುಂದೆ ಪ್ರತಿ 15 ದಿನಕ್ಕೊಮ್ಮೆ ಪ್ರಮುಖ ರಸ್ತೆಗಳನ್ನು ಆಯ್ಕೆ ಮಾಡಿಕೊಂಡು ಒತ್ತುವರಿ ತೆರವು ಮಾಡಲಾಗುವುದು, ಆ ಮೂಲಕ ಸಾರ್ಜನಿಕರ ಸುಮಗ ಸಂಚಾರಕ್ಕೆ ಅನುವು ಮಾಡಿಕೊಡಲಾಗುವುದು. ಕೋಲಾರಮ್ಮ ರಸ್ತೆ, ಸೋಮೇಶ್ವರ ದೇವಾಲಯಗಳಿಗೆ ಭಕ್ತರು ಹೋಗಲು ಸಮರ್ಪಕ ರಸ್ತೆ ವ್ಯವಸ್ಥೆಯಿಲ್ಲ. ಆದ್ದರಿಂದ ಭಕ್ತಾಧಿಗಳು ಕುಳಿತುಕೊಳ್ಳಲು ವ್ಯವಸ್ಥೆ, ಕೋರ್ಟ್​ ವೃತ್ತದಲ್ಲಿ ದ್ವಾರ ಬಾಗಿಲು ನಿರ್ಮಾಣ, ಪಾರ್ಕಿಂಗ್​ ವ್ಯವಸ್ಥೆ ಮಾಡಲಾಗುವುದು ಎಂದು ಹೇಳಿದರು.