ಕೊರೊನಾ ವೈರಸ್​ಗೆ ತುತ್ತಾಗಿ 3 ತಿಂಗಳ ನಂತರ ವನ್ಯಜೀವಿಗಳ ತಿನ್ನುವುದನ್ನು ಬಿಟ್ಟ ಚೀನೀಯರು: ತಿಂದರೆ ಅನುಭವಿಸಬೇಕಾಗುತ್ತದೆ ಶಿಕ್ಷೆ

ವುಹಾನ್​: ಚೀನಾದಲ್ಲಿ ಕೊರೊನಾ ವೈರಸ್​ ಮನುಷ್ಯರ ಪ್ರಾಣ ತೆಗೆಯಲಾರಂಭಿಸಿ ಮೂರು ತಿಂಗಳಾದ ನಂತರ ಅಲ್ಲಿನ ಸರ್ಕಾರ ವನ್ಯಜೀವಿಗಳ ಬೇಟೆ, ಮಾರಾಟ ಮತ್ತು ಸೇವನೆಗೆ ಬ್ರೇಕ್​ ಹಾಕಿದೆ.

ವನ್ಯಜೀವಿಗಳ ಸೇವೆನಯಿಂದಲೇ ಕೊರೊನಾ ವೈರಸ್​ ಬಂದಿದೆ ಎನ್ನುವುದಕ್ಕೆ ಯಾವುದೇ ವೈಜ್ಞಾನಿಕ ಸಾಕ್ಷಿಗಳಿಲ್ಲ. ಆದರೆ ಹಾವು, ಬಾವುಲಿಗಳಂತಹ ವನ್ಯಜೀವಿಗಳನ್ನು ಮಾರುವಂತಹ ಮಾರ್ಕೆಟ್​ನ ಜನರಲ್ಲೇ ಹೆಚ್ಚಾಗಿ ವೈರಸ್​ ಕಂಡು ಬಂದಿದ್ದರಿಂದಾಗಿ, ಕಾಡು ಪ್ರಾಣಿಗಳೇ ಈ ವೈರಸ್​ಗೆ ಕಾರಣ ಎಂದು ಊಹಿಸಲಾಗಿತ್ತು. ಅದೇ ಕಾರಣದಿಂದಾಗಿ ಸರ್ಕಾರ ಈ ತುರ್ತು ನಿರ್ಧಾರವನ್ನು ತೆಗೆದುಕೊಂಡಿದೆ.

ದೇಶದಲ್ಲಿ ಯಮರೂಪಿಯಾಗಿ ಕಾಡುತ್ತಿರುವ ಕೊರೊನಾವನ್ನು ನಿಯಂತ್ರಣಕ್ಕೆ ತರಲು ಈ ನಿರ್ಧಾರ ಅನಿವಾರ್ಯ ಎಂದು ಅಲ್ಲಿನ ಸರ್ಕಾರವು ತಿಳಿಸಿದೆ. ಒಂದು ವೇಳೆ ಯಾರಾದರೂ ಬೇಟೆಯಾಡುವುದನ್ನು ಕಂಡರೆ ಅಥವಾ ಮಾರುವುದನ್ನು ಕಂಡರೆ ಅವರಿಗೆ ಶಿಕ್ಷೆ ನೀಡುವುದಾಗಿ ತಿಳಿಸಲಾಗಿದೆ. ಈ ಹಿಂದೆ ಜನವರಿ ತಿಂಗಳಿನಲ್ಲಿ ದೇಶದ ಜನರಿಗೆ ವನ್ಯಜೀವಿಗಳ ಸೇವನೆ ಮಾಡದಿರುವಂತೆ ತಿಳಿಸಲಾಗಿತ್ತು. ಆದರೆ ಇದೀಗ ಅಧಿಕೃತವಾಗಿ ಬ್ರೇಕ್​ ನೀಡಲಾಗಿದೆ. (ಏಜೆನ್ಸೀಸ್​)