ಬ್ರಹ್ಮಪುತ್ರ ನದಿಗೆ ಚೀನಾದ ಬೃಹತ್ ಅಣೆಕಟ್ಟು; 167.8 ಬಿಲಿಯನ್ ಡಾಲರ್ ಯೋಜನೆ

ಬೀಜಿಂಗ್: ಅರುಣಾಚಲಪ್ರದೇಶದ ಗಡಿಗೆ ಸಮೀಪದ ಟಿಬೆಟ್​ನಲ್ಲಿ ಬ್ರಹ್ಮಪುತ್ರ ನದಿಗೆ ಚೀನಾ ಬೃಹತ್ ಅಣೆಕಟ್ಟು ನಿರ್ವಿುಸುತ್ತಿದ್ದು, ಜುಲೈ 20ರಂದು ನಿರ್ಮಾಣ ಆರಂಭವಾಗಿದೆ. ಬ್ರಹ್ಮಪುತ್ರ ನದಿ ಪ್ರದೇಶದಲ್ಲಿ ಚೀನಾದ ಪ್ರಧಾನಿ ಲಿ ಕಿಯಾಂಗ್ ಶನಿವಾರ ಶಂಕುಸ್ಥಾಪನೆ ನಡೆಸುವ ಮೂಲಕ ಈ ಬೃಹತ್ ಅಣೆಕಟ್ಟು ನಿರ್ವಣಕ್ಕೆ ಚಾಲನೆ ನೀಡಿದ್ದಾರೆ.

ಬ್ರಹ್ಮಪುತ್ರ ನದಿಗೆ ಚೀನಾದಲ್ಲಿ ಸ್ಥಳೀಯವಾಗಿ ಯಾರ್ಲುಂಗ್ ಜ್ಯಾಂಗ್ಬೊ ಎನ್ನಲಾಗುತ್ತಿದ್ದು, ಟಿಬೆಟ್ ಸ್ವಾಯತ್ತ ಪ್ರದೇಶದ ನ್ಯಿಂಗ್ಚಿ ಸಿಟಿಯ ಮೇನ್​ಲಿಂಗ್ ಹೈಡ್ರೋಪವರ್ ಸ್ಟೇಷನ್​ನಲ್ಲಿ ಗುದ್ದಲಿಪೂಜೆ ಕಾರ್ಯಕ್ರಮ ನಡೆಯಿತು. ಈ ಜಲವಿದ್ಯುತ್ ಯೋಜನೆಯು ಜಗತ್ತಿನ ಅತಿದೊಡ್ಡ ಮೂಲಸೌಕರ್ಯ ಯೋಜನೆಯಾಗಿದ್ದು, ಕೆಳ ನದಿಪಾತ್ರದ ದೇಶಗಳಾದ ಭಾರತ ಮತ್ತು ಬಾಂಗ್ಲಾದೇಶದಲ್ಲಿ ಕಳವಳವನ್ನು ಹುಟ್ಟುಹಾಕಿದೆ.

ಯೋಜನೆ ವೆಚ್ಚ

ಈ ಯೋಜನೆಗೆ 1.2 ಟ್ರಿಲಿಯನ್ ಯುವಾನ್ (167.8 ಬಿಲಿಯನ್ ಡಾಲರ್) ಖರ್ಚು ಮಾಡಲಾಗುತ್ತದೆ. ಭಾರತೀಯ ಕರೆನ್ಸಿ ಪ್ರಕಾರ ಸುಮಾರು 14.46 ಲಕ್ಷ ಕೋಟಿ ರೂ. ಆಗಲಿದೆ. ಈ ಯೋಜನೆಗೆ ಕಳೆದ ಡಿಸೆಂಬರ್​ನಲ್ಲಿ ಅನುಮೋದನೆ ನೀಡಲಾಗಿತ್ತು.

ಅಣೆಕಟ್ಟು ನಿರ್ಮಾಣ ಎಲ್ಲಿ?

ಬ್ರಹ್ಮಪುತ್ರ ನದಿಯು ಅರುಣಾಚಲಪ್ರದೇಶದ ನಂತರ ಬಾಂಗ್ಲಾದೇಶಕ್ಕೆ ಹರಿಯುವ ಹಿಮಾಲಯ ಪ್ರದೇಶದ ದೊಡ್ಡ ಕಮರಿಯಲ್ಲಿ ದೊಡ್ಡ ಯೂ-ಟರ್ನ್ ತೆಗೆದುಕೊಳ್ಳುವಂಥ ಸ್ಥಳದಲ್ಲಿ ಈ ಅಣೆಕಟ್ಟು ನಿರ್ವಣವಾಗಲಿದೆ. ಈ ಯೋಜನೆಯ ಸ್ಥಳವು ಭೂಕಂಪಗಳು ಸಂಭವಿಸುವ ಟೆಕ್ಟೋನಿಕ್ ಪ್ಲೇಟ್ ಗಡಿಯಲ್ಲಿ ಇರುವುದರಿಂದ ಈ ಅಣೆಕಟ್ಟು ನಿರ್ವಣವು ಭಾರಿ ತಾಂತ್ರಿಕ ಸವಾಲುಗಳನ್ನು ಒಳಗೊಂಡಿದೆ.

ಭಾರತಕ್ಕೆ ಕಳವಳ ಏಕೆ?

ಪ್ರಸ್ತುತ ನಿರ್ವಣವಾಗುತ್ತಿರುವ ಅಣೆಕಟ್ಟು ಈಗಾಗಲೇ ವಿಶ್ವದ ಅತ್ಯಂತ ಬೃಹತ್ ಎನ್ನಲಾದ ಚೀನಾದ ಅಣೆಕಟ್ಟಿಗಿಂತಲೂ ದೊಡ್ಡದಾಗಿದೆ. ಈ ಅಣೆಕಟ್ಟು ನೀರಿನ ಹರಿವನ್ನು ನಿಯಂತ್ರಿಸಲು ಚೀನಾಗೆ ಅಧಿಕಾರ ನೀಡುತ್ತದೆ. ಮಾತ್ರವಲ್ಲದೆ, ಅದರ ಗಾತ್ರ ಮತ್ತು ಪ್ರಮಾಣವು ಬೀಜಿಂಗ್ ಯುದ್ಧದ ಸಮಯದಲ್ಲಿ ಗಡಿ ಪ್ರದೇಶಗಳಿಗೆ ಹೆಚ್ಚಿನ ಪ್ರಮಾಣದ ನೀರನ್ನು ಬಿಡುಗಡೆ ಮಾಡಲು ಅನುವು ಮಾಡಿಕೊಡುತ್ತದೆ ಎಂಬ ಕಾರಣದಿಂದಾಗಿ ಭಾರತದಲ್ಲಿ ಕಳವಳಗಳು ಹುಟ್ಟಿಕೊಂಡಿವೆ. ಟಿಬೆಟ್​ನಲ್ಲೇ ಅತ್ಯಂತ ದೊಡ್ಡದು ಎನ್ನಲಾದ 1.5 ಶತಕೋಟಿ ಡಾಲರ್ ವೆಚ್ಚದಲ್ಲಿ ನಿರ್ವಣವಾದ ಝಾಮ್ ಹೈಡ್ರೋಪವರ್ ಸ್ಟೇಷನ್ 2015ರಿಂದ ಕಾರ್ಯಾಚರಣೆ ಆರಂಭಿಸಿದ್ದು, ಅದು ಕೂಡ ಭಾರತಕ್ಕೆ ಕಳವಳಕಾರಿಯಾಗಿದೆ.