ಭಾರತದ ವಿರುದ್ಧ ಡಬ್ಲ್ಯುಟಿಒಗೆ ಚೀನಾ ದೂರು

ನವದೆಹಲಿ: ಭಾರತದ ಪೊ›ಡಕ್ಷನ್ ಲಿಂಕ್ಡ್ ಇನ್ಸೆಂಟಿವ್ (ಪಿಎಲ್​ಐ) ಯೋಜನೆಯ ಕೆಲವು ಷರತ್ತುಗಳು, ಅಡ್ವಾನ್ಸ್​ಡ್ ಕೆಮಿಸ್ಟ್ರಿ ಸೆಲ್ ಬ್ಯಾಟರಿ, ಎಲೆಕ್ಟ್ರಿಕ್ ಮತ್ತು ಇತರ ವಾಹನಗಳ ತಯಾರಿಕೆಯನ್ನು ಉತ್ತೇಜಿಸುವ ನೀತಿಗಳು ಜಾಗತಿಕ ವ್ಯಾಪಾರ ನಿಯಮಗಳನ್ನು ಉಲ್ಲಂಘಿಸುತ್ತವೆ ಎಂದು ಆರೋಪಿಸಿರುವ ಚೀನಾ, ಇದಕ್ಕೆ ಸಂಬಂಧಿಸಿದಂತೆ ವಿಶ್ವ ವ್ಯಾಪಾರ ಸಂಘಟನೆಗೆ (ಡಬ್ಲ್ಯುಟಿಒ) ದೂರು ಸಲ್ಲಿಸಿದೆ.

ಈ ಕುರಿತು ಭಾರತದೊಂದಿಗೆ ತಾನು ಸಮಾಲೋಚಿಸಲು ಇಚ್ಛಿಸಿರುವುದಾಗಿ ಚೀನಾ ತಿಳಿಸಿದೆ ಎಂದು ಜಿನೀವಾ ಮೂಲದ ಡಬ್ಲ್ಯುಟಿಒ ಹೇಳಿಕೆಯಲ್ಲಿ ತಿಳಿಸಿದೆ. ಭಾರತ ಅಳವಡಿಸಿಕೊಂಡ ಕ್ರಮಗಳು ಸ್ಥಳೀಯ ಉತ್ಪನ್ನಗಳ ಬಳಕೆಗೆ ಸಂಬಂಧಿಸಿದಂತೆ ಇದ್ದರೂ ಅವುಗಳಿಂದ ಚೀನಾದ ಸರಕುಗಳ ಮಾರಾಟಕ್ಕೆ ಅನ್ಯಾಯವಾಗುತ್ತಿದೆ ಎಂದು ಚೀನಾ ಹೇಳಿದೆ. ಭಾರತದ ಈ ಕ್ರಮಗಳು ಸಬ್ಸಿಡೀಸ್ ಆಂಡ್ ಕೌಂಟರ್​ವೇಲಿಂಗ್ ಮೆಜರ್ಸ್ (ಎಸ್​ಸಿಎಂ) ಒಪ್ಪಂದ, ಜನರಲ್ ಅಗ್ರಿಮೆಂಟ್ ಆನ್ ಟಾರಿಫ್ಸ್ ಆಂಡ್ ಟ್ರೇಡ್ (ಗ್ಯಾಟ್) 1994 ಮತ್ತು ಟ್ರೇಡ್ ರಿಲೇಟೆಡ್ ಇನ್ವೆಸ್ಟ್​ಮೆಂಟ್ ಮೆಜರ್ಸ್ (ಟ್ರಿಮ್್ಸ) ಒಪ್ಪಂದಗಳನ್ನು ಉಲ್ಲಂಘಿಸುತ್ತವೆ.

ಇದರಿಂದಾಗಿ ಚೀನಾಕ್ಕೆ ನೇರವಾಗಿ ಅಥವಾ ಪರೋಕ್ಷವಾಗಿ ಸಿಗುವ ಲಾಭಗಳು ಸಿಗುವುದಿಲ್ಲ ಎಂದು ಚೀನಾ ಆರೋಪಿಸಿದೆ. ಚೀನಾ ಭಾರತದಿಂದ ಈ ಬಗ್ಗೆ ಉತ್ತರ ಪಡೆಯಲು ಉತ್ಸುಕವಾಗಿದೆ. ಪರಸ್ಪರ ಒಪ್ಪಿಗೆಯಾಗುವ ದಿನಾಂಕದಂದು ಸಮಾಲೋಚನೆಗೆ ಒಪ್ಪಿಕೊಳ್ಳಲು ಎದುರುನೋಡುತ್ತಿದೆ ಎಂದು ಡಬ್ಲ್ಯುಟಿಒ ತಿಳಿಸಿದೆ.

ಭಾರತದ ಮೂರು ನಿರ್ದಿಷ್ಟ ಕಾರ್ಯಕ್ರಮಗಳನ್ನು ತನ್ನ ದೂರಿನಲ್ಲಿ ಚೀನಾ ಉಲ್ಲೇಖಿಸಿದೆ. ಪಿಎಲ್​ಐ, ನ್ಯಾಷನಲ್ ಪೋ›ಗ್ರಾಂ ಆನ್ ಅಡ್ವಾನ್ಸ್​ಡ್ ಕೆಮಿಸ್ಟ್ರಿ ಸೆಲ್ (ಎಸಿಸಿ) ಬ್ಯಾಟರಿ ಸ್ಟೋರೇಜ್; ಆಟೋಮೊಬೈಲ್ ಮತ್ತು ಆಟೋ ಕಾಂಪೊನೆಂಟ್ ಇಂಡಸ್ಟ್ರಿಗಾಗಿ ರೂಪಿಸಿರುವ ಪಿಎಲ್​ಐ ಯೋಜನೆ; ಭಾರತದಲ್ಲಿ ಎಲೆಕ್ಟ್ರಿಕ್ ಪ್ಯಾಸೆಂಜರ್ ಕಾರುಗಳ ತಯಾರಿಕೆಯನ್ನು ಉತ್ತೇಜಿಸುವ ಯೋಜನೆ. ಸಮಾಲೋಚನೆಗೆ ಮನವಿ ಮಾಡುವುದು ಡಬ್ಲ್ಯುಟಿಒ ನಿಯಮಗಳ ಪ್ರಕಾರ ವಿವಾದ ಪರಿಹಾರ ಪ್ರಕ್ರಿಯೆಯ ಮೊದಲ ಹಂತ. ಅದು ಫಲ ನೀಡದಿದ್ದರೆ, ಪರಿಣಿತರ ಪ್ಯಾನೆಲ್ ರೂಪಿಸುವಂತೆ ಕೋರಲು ಚೀನಾಕ್ಕೆ ಅವಕಾಶವಿದೆ.

https://www.vijayavani.net/lahore-reels-under-pollution-pakistan-blames-indias-diwali-crackers