ಹುತಾತ್ಮ ಯೋಧರ ಅಂತ್ಯಕ್ರಿಯೆಯನ್ನು ಸಾರ್ವಜನಿಕವಾಗಿ ನಡೆಸಿದರೆ ಇದರಿಂದ ಎಷ್ಟು ಯೋಧರು ಮೃತರಾಗಿದ್ದಾರೆ ಎಂಬುದು ಬಹಿರಂಗವಾಗುತ್ತದೆ ಎಂಬ ಕಾರಣಕ್ಕೆ ಯೋಧರ ಶವದ ಅಂತಿಮ ಯಾತ್ರೆ ನಡೆಸದಂತೆ, ಅಂತ್ಯಕ್ರಿಯೆಯಲ್ಲಿ ಕುಟುಂಬದವರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗಿಯಾಗದಂತೆ, ಶವ ಹೂಳಿದ ಗುಂಡಿಯ ಮೇಲೆ ಸಾಂಪ್ರದಾಯಿಕವಾಗಿ ಸಮಾಧಿ ನಿರ್ವಿುಸದಂತೆ, ಅಂತ್ಯಕ್ರಿಯೆಯನ್ನು ಗ್ರಾಮೀಣ ಭಾಗದ ನಿರ್ಜನ ಪ್ರದೇಶದಲ್ಲಿ ನಡೆಸುವಂತೆ ಚೀನಾದ ನಾಗರಿಕ ವ್ಯವಹಾರ ಸಚಿವಾಲಯ ಆದೇಶ ಹೊರಡಿಸಿತ್ತು ಎಂದು ಅಮೆರಿಕದ ಗುಪ್ತಚರ ಸಂಸ್ಥೆ ವರದಿ ಮಾಡಿದೆ. ಗಲ್ವಾನ್ ಘರ್ಷಣೆಯಲ್ಲಿ ಭಾರತದ 20 ಯೋಧರು ಹುತಾತ್ಮ ರಾಗಿದ್ದು, 74 ಯೋಧರು ಗಾಯಗೊಂಡಿದ್ದಾರೆ ಎಂದು ಕೇಂದ್ರ ಸರ್ಕಾರ ಮತ್ತು ಸೇನೆ ತಿಳಿಸಿವೆ. ಆದರೆ, ಚೀನಾ ಸರ್ಕಾರ ಮಾತ್ರ ಸಾವನ್ನಪ್ಪಿದ ಮತ್ತು ಗಾಯಗೊಂಡ ಯೋಧರ ನಿಖರ ಸಂಖ್ಯೆ ತಿಳಿಸಿಲ್ಲ. ಭಾರತದಲ್ಲಿ ಸಕಲ ಗೌರವ ಮೂಲಕ ಯೋಧರ ಅಂತ್ಯಕ್ರಿಯೆ ನಡೆಸಲಾಗಿದೆ. ಅವರ ಕುಟುಂಬದವರನ್ನು ಭೇಟಿಯಾದ ಸರ್ಕಾರದ ಪ್ರತಿನಿಧಿಗಳು ಸಾಂತ್ವನ ಹೇಳಿ, ಪರಿಹಾರ ಒದಗಿಸಿದ್ದಾರೆ. ನಮ್ಮಲ್ಲಿ ಇದ್ಯಾವುದೂ ಆಗಿಲ್ಲ ಎಂದು ಚೀನಾ ಯೋಧರ ಕುಟುಂಬಸ್ಥರು ಆಕ್ರೋಶ ವ್ಯಕ್ತಪಡಿಸಿದ್ದರು. ನಂತರ ಕಮ್ಯುನಿಸ್ಟ್ ಪಕ್ಷದ ಮುಖವಾಣಿ ಗ್ಲೋಬಲ್ ಟೈಮ್್ಸ ಸ್ಪಷ್ಟನೆ ನೀಡಿತ್ತು. ಭಾರತಕ್ಕಿಂತ ಕಡಿಮೆ ಸಂಖ್ಯೆಯಲ್ಲಿ ಸಾವು-ನೋವು ಉಂಟಾಗಿದೆ. ಮೃತ ಯೋಧರಿಗೆ ದೊರೆಯಬೇಕಾದ ಎಲ್ಲ ಗೌರವಗಳು ದೊರೆಯುತ್ತವೆ ಎಂದು ಹೇಳಿತ್ತು.
