ಪೂರ್ವ ಲಡಾಖ್ ಗಡಿಯಲ್ಲಿ ಉದ್ಧಟತನ ತೋರಿದ ಚೀನಾದ ವಿರುದ್ಧ ಭಾರತ ಬೇರೆ ಬೇರೆ ಬಗೆಯಲ್ಲಿ ಪ್ರತೀಕಾರಾತ್ಮಕ ಕ್ರಮಗಳನ್ನು ಕೈಗೊಂಡಿದ್ದು ಗೊತ್ತೇ ಇದೆ. ಸೇನೆ ನಿಯೋಜನೆಯಲ್ಲಿ ಆಕ್ರಮಕ ತಂತ್ರಗಾರಿಕೆ, ರಾಜತಾಂತ್ರಿಕ ಮಾರ್ಗದ ಬಳಕೆ, ವ್ಯಾಪಾರ ವ್ಯವಹಾರದಲ್ಲಿ ಎದಿರೇಟು... ಈ ಮುಂತಾದ ಕ್ರಮಗಳು ಇದರಲ್ಲಿ ಸೇರಿದ್ದವು. ಭಾರತದಲ್ಲಿ ಭರ್ಜರಿ ವ್ಯವಹಾರ ನಡೆಸುತ್ತಿದ್ದ ಚೀನಾ ಮೂಲದ ಕೆಲವು ಆಪ್ಗಳನ್ನು ನಿಷೇಧಿಸುವುದು ಈ ಕಾರ್ಯತಂತ್ರದ ಭಾಗವಾಗಿತ್ತು. ಈ ಪೈಕಿ ಕೆಲವು ಆಪ್ಗಳು ಗ್ರಾಹಕರ ವೈಯಕ್ತಿಕ ಮಾಹಿತಿಯನ್ನೂ ರಹಸ್ಯವಾಗಿ ಸಂಗ್ರಹಿಸುತ್ತಿದ್ದ ಶಂಕೆಯೂ ವ್ಯಕ್ತವಾಗಿತ್ತು. ಹೀಗಾಗಿ ದೇಶದ ಭದ್ರತೆ ಮತ್ತು ಸುರಕ್ಷತೆ ದೃಷ್ಟಿಯಿಂದ ಕೇಂದ್ರದ ಮಾಹಿತಿ ಮತ್ತು ತಂತ್ರಜ್ಞಾನ ಸಚಿವಾಲಯವು ಐಟಿ ಕಾಯ್ದೆ 69ಎ ಸೆಕ್ಷನ್ ಅಡಿಯಲ್ಲಿ ಚೀನಾದ 267 ಆಪ್ಗಳನ್ನು ನಿಷೇಧಿಸುವ ಆದೇಶ ಹೊರಡಿಸಿತು. ಚೀನಾ ಈ ಕ್ರಮವನ್ನು ವಿರೋಧಿಸಿದರೂ ಭಾರತ ಹೆಜ್ಜೆ ಹಿಂದಿಡಲಿಲ್ಲ. ಆರಂಭದಲ್ಲಿ ಈ ನಿಷೇಧ ಪರಿಣಾಮಕಾರಿ ಎಂಬಂತೆ ಕಂಡರೂ, ಈಗ ಮತ್ತೆ ಕ್ರಮೇಣ ಚೀನಾ ಆಪ್ಗಳ ಹಾವಳಿ ಹೆಚ್ಚಿದೆ ಎಂದು ವರದಿಗಳು ತಿಳಿಸುತ್ತವೆ. ಆದರೆ ಈಗ ಅವುಗಳ ಕಾರ್ಯತಂತ್ರ ಬದಲಾಗಿದ್ದು, ಮೂಲ ಕಂಪನಿಯ ಹೆಸರು ಮರೆಮಾಚಿ ಅಥವಾ ಸರಿಯಾಗಿ ಮಾಹಿತಿ ನೀಡದೆ, ಹೊಸ ಹೆಸರಿನಲ್ಲಿ ಕಾರ್ಯಾಚರಣೆ ನಡೆಸುತ್ತಿವೆ. ಇವುಗಳಲ್ಲಿ ಹೆಚ್ಚಿನವು ಮಾಧ್ಯಮ ಮತ್ತು ಮನರಂಜನೆಗೆ ಸಂಬಂಧಿಸಿದವಾಗಿದ್ದು, ಈ ಮೂಲಕ ಹೆಚ್ಚಿನ ಗ್ರಾಹಕರನ್ನು ಹೊಂದಬಹುದು ಎಂಬುದು ಅವುಗಳ ಲೆಕ್ಕಾಚಾರ ಎನ್ನಲಾಗಿದೆ.
