ಭಾರತೀಯ ಸಂಸ್ಥೆ ತಯಾರಿಸಿದ ಸಿರಪ್‌ನಿಂದ 18 ಮಕ್ಕಳು ಸಾವನ್ನಪ್ಪಿದ್ದಾರೆ ಎಂದ ಉಜ್ಬೇಕಿಸ್ತಾನ್..!

ಉಜ್ಬೇಕಿಸ್ತಾನ: ಉಜ್ಬೇಕಿಸ್ತಾನದ ಆರೋಗ್ಯ ಸಚಿವಾಲಯ ಮಂಗಳವಾರ, ತೀವ್ರವಾದ ಉಸಿರಾಟದ ಕಾಯಿಲೆಯಿಂದ ಬಳಲುತ್ತಿರುವ 18 ಮಕ್ಕಳು, ಭಾರತೀಯ ಸಂಸ್ಥೆ ಮೇರಿಯನ್ ಬಯೋಟೆಕ್ ತಯಾರಿಸಿದ ಡಾಕ್ -1 ಮ್ಯಾಕ್ಸ್ ಎಂಬ ಕೆಮ್ಮಿನ ಸಿರಪ್ ಅನ್ನು ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸುವುದರಿಂದ ಸಾವನ್ನಪ್ಪಿದ್ದಾರೆ ಎಂದು ಹೇಳಿದೆ. ಇತ್ತೀಚೆಗೆ ಗಾಂಬಿಯಾ ದೇಶದಲ್ಲಿ ಹರಿಯಾಣ ಮೂಲದ ಮೇಡನ್​ ಫಾರ್ಮಾ ತಯಾರಿಸಿದ್ದ ಸಿರಪ್​ನಿಂದಾಗಿ 63ಕ್ಕೂ ಹೆಚ್ಚು ಮಕ್ಕಳು ಸಾವನ್ನಪ್ಪಿದ್ದರು.

ಭಾರತದ ಆರೋಗ್ಯ ಸಚಿವಾಲಯದ ಅಧಿಕಾರಿಗಳು ಉಜ್ಬೇಕಿಸ್ತಾನ್‌ನಿಂದ ಬಂದ ವರದಿಯ ಬಗ್ಗೆ ಮಾಹಿತಿ ಇದೆ ಎಂದು ಹೇಳಿದ್ದು ಯಾವುದೇ ರೀತಿಯ ಪ್ರತಿಕ್ರಿಯೆ ನೀಡಲು ನಿರಾಕರಿಸಿದ್ದಾರೆ.

"ಇಲ್ಲಿಯವರೆಗೆ, ತೀವ್ರವಾದ ಉಸಿರಾಟದ ಕಾಯಿಲೆ ಇರುವ 21 ಮಕ್ಕಳಲ್ಲಿ 18 ಡಾಕ್ -1 ಮ್ಯಾಕ್ಸ್ ಸಿರಪ್ ತೆಗೆದುಕೊಂಡ ಕಾರಣ ಸಾವನ್ನಪ್ಪಿದ್ದಾರೆ. ಸತ್ತ ಮಕ್ಕಳು 2-7 ದಿನಗಳವರೆಗೆ ಮನೆಯಲ್ಲಿ 2.5 ರಿಂದ 5ಮಿ.ಲಿ ಔಷಧವನ್ನು ದಿನಕ್ಕೆ 3-4 ಬಾರಿ ಸೇವಿಸಿದ್ದಾರೆ ಎಂದು ಕಂಡುಬಂದಿದೆ. ಅದಲ್ಲದೇ ವೈದ್ಯರ ಪ್ರಿಸ್ಕ್ರಿಪ್ಷನ್ ಇಲ್ಲದೆ ಸಾವನ್ನಪ್ಪಿರುವ ಎಲ್ಲಾ ಮಕ್ಕಳು ಔಷಧವನ್ನು ಸೇವಿಸಿದ್ದಾರೆ. ಔಷಧದ ಮುಖ್ಯ ಅಂಶವು ಪ್ಯಾರಸಿಟಮಾಲ್ ಆಗಿರುವುದರಿಂದ, ಔಷಧಾಲಯ ಮಾರಾಟಗಾರರ ಶಿಫಾರಸಿನ ಮೇರೆಗೆ ಡಾಕ್ -1 ಮ್ಯಾಕ್ಸ್ ಸಿರಪ್ ಅನ್ನು ತಪ್ಪಾಗಿ ಬಳಸಲಾಗಿದ್ದು ಇದು ರೋಗಿಗಳ ಸ್ಥಿತಿ ಹದಗೆಡಲು ಕಾರಣವಾಗಿದೆ.

ಪ್ರಾಥಮಿಕ ಪ್ರಯೋಗಾಲಯ ಅಧ್ಯಯನಗಳು ಡಾಕ್-1 ಮ್ಯಾಕ್ಸ್ ಸಿರಪ್‌ನ ಈ ಸರಣಿಯು ಎಥಿಲೀನ್ ಗ್ಲೈಕೋಲ್ ಅನ್ನು ಹೊಂದಿದೆ ಎಂದು ತೋರಿಸಲಾಗಿದೆ. ಈ ವಸ್ತುವು ವಿಷಕಾರಿಯಾಗಿದ್ದು ರೋಗಿಯ ಆರೋಗ್ಯದಲ್ಲಿ ಗಂಭೀರ ಬದಲಾವಣೆಗಳನ್ನು ಉಂಟುಮಾಡಬಹುದು. ಇದರಿಂದಾಗಿ ವಾಂತಿ, ಮೂರ್ಛೆ, ಸೆಳೆತ, ಉಂಟಾಗಿ ಕಡೆಗೆ ಪ್ರಾಣವೂ ಹೋಗಬಹುದು.

"ಡಾಕ್ -1 ಮ್ಯಾಕ್ಸ್‌ನ ಮಾತ್ರೆಗಳು ಮತ್ತು ಸಿರಪ್‌ಗಳನ್ನು ದೇಶದ ಎಲ್ಲಾ ಔಷಧಾಲಯಗಳಲ್ಲಿ ನಿಗದಿತ ರೀತಿಯಲ್ಲಿ ಮಾರಾಟದಿಂದ ಹಿಂತೆಗೆದುಕೊಳ್ಳಲಾಗುತ್ತದೆ" ಎಂದು ಉಜ್ಬೇಕಿಸ್ತಾನ್‌ನ ಆರೋಗ್ಯ ಸಚಿವಾಲಯ ಹೇಳಿಕೆ ನೀಡಿದೆ. (ಏಜೆನ್ಸೀಸ್​)

https://www.vijayavani.net/twitter-tweet-viral/

https://www.vijayavani.net/tunisha-sharma-property/