ಆಶ್ರಮ ಎಂದರೇನು? ಎಲ್ಲಿ ಜ್ಞಾನವಿದೆಯೊ, ಎಲ್ಲಿ ಪ್ರೇಮವಿದೆಯೊ, ಬಂದವರಿಗೆ ತಿನ್ನಲು ಏನಾದರೂ ಕೊಟ್ಟರೆ, ನಿಮ್ಮ ಮನೆಗೆ ಬಂದವರಿಗೆ ವಿಶ್ರಾಂತಿಯ ಭಾವನೆ ಸಿಕ್ಕರೆ ಇಡೀ ಜಗತ್ತು ಆಶ್ರಮವಾಗುತ್ತದೆ. ಪ್ರಕೃತಿಯೊಡನಿದ್ದರೆ, ಕಾಡಿನಲ್ಲಿದ್ದರೆ, ಅದೆಲ್ಲವೂ ಆಶ್ರಮವೇ. ಜಗತ್ತಿನ ಪ್ರತಿಯೊಂದು ಮರವೂ ನನ್ನದೇ ತೋಟದಲ್ಲಿದೆ ಎಂದು ಭಾವಿಸಿ. ಇದು ವಾಸ್ತವ. ಆದರೆ ಕೆಲವೊಮ್ಮೆ ಇದರಿಂದ ಸಹಾಯವಾಗುತ್ತದೆ ಅನಿಸದಿದ್ದರೆ, ನಿಮ್ಮನ್ನು ಪುನಶ್ಚೇತಗೊಳಿಸಿಕೊಳ್ಳಲು ಒಂದು ಸ್ಥಳಬೇಕು ಅನಿಸಿದರೆ, ಆಗ ಆಶ್ರಮಕ್ಕೆ ಬಂದರೆ ಎಲ್ಲವೂ ಸ್ಪಷ್ಟವಾಗಿ ಅನುಭವಕ್ಕೆ ಬರುತ್ತದೆ. ನಿಮ್ಮ ಮನೆಯಲ್ಲಿ ನೀವು ಎಲ್ಲಿ ಬೇಕಾದರೂ ಇರಬಹುದು, ಆದರೆ ಅಡುಗೆಯ ವಾಸನೆಯನ್ನು ಪಡೆದುಕೊಳ್ಳಬೇಕಾದರೆ ಅಡುಗೆ ಮನೆಗೇ ಹೋಗಬೇಕು ಅಲ್ಲವೇ?. ಎಲ್ಲಿ ಬೇಕಾದರೂ ತಿನ್ನಬಹುದು. ಆದರೆ ಆ ವಾಸನೆ ಇರುವುದು ಅಡುಗೆಯ ಮನೆಯಲ್ಲಿ. ಇಷ್ಟೆಲ್ಲಾ ಮಾಡಿದರೂ ನಮ್ಮ ವಿಶ್ವಾಸ ಅಲುಗಾಡಬಹುದು. ವಿಶ್ವಾಸವು ನಿಜವಾಗಿದ್ದರೆ ಅಲುಗಾಡಲಿಬಿಡಿ. ಸತ್ಯವು ಎಂದಿಗೂ ಹೊರಟುಹೋಗುವುದಿಲ್ಲ. ವಿಶ್ವಾಸ ಸತ್ಯವಾಗಿದ್ದರೆ ಅಲುಗಾಡಲಿ. ಅದೆಂದಿಗೂ ಕಳೆದು ಹೋಗುವುದಿಲ್ಲ. ಎಷ್ಟು ಬೇಕೊ ಅಷ್ಟು ಸಂಶಯಿಸಿ. ಸಂಶಯದ ಬಗ್ಗೆ ಹೆದರಬೇಕಿಲ್ಲ. ಚಿನ್ನ ಅಪ್ಪಟವಾಗಿದ್ದರೆ, ಅದನ್ನು ಎಷ್ಟು ಉಜ್ಜಿದರೂ ಚಿನ್ನವಾಗಿಯೇ ಇರುತ್ತದೆ. ಅದು ನಕಲಿ ಅಥವಾ ಚಿನ್ನದ ಪಾಲೀಷನ್ನು ಮಾತ್ರ ಹೊಂದಿದ್ದರೆ, ಬಹಳ ಉಜ್ಜಬೇಡ ಎನ್ನುತ್ತೀರಿ. ಬಹಳ ಉಜ್ಜಿದರೆ ಚಿನ್ನ ಮಾಯವಾಗುತ್ತದೆ. ಆದರೆ ಎಷ್ಟು ಉಜ್ಜಿದರೂ ನಿಜವಾದ ಚಿನ್ನ ಮಾಯವಾಗುವುದಿಲ್ಲ. ಸಂಶಯ ಎಂದರೆ ಕೇವಲ ಪ್ರಾಣದ ಅಭಾವ. ಬಹಳ ಶಕ್ತಿಯಿದ್ದಾಗ ಸಂಶಯವೆಲ್ಲಿರುತ್ತದೆ? ಕೆಳಮಟ್ಟದ ಶಕ್ತಿಯಿಂದ ಸಂಶಯ ಉಂಟಾಗುತ್ತದೆ. ನಿಜವಾದ ವಿಶ್ವಾಸವೆಂದರೆ, ನೂರು ಸಲ ಅಲುಗಾಡಿದರೂ ಅಚಲವಾಗಿ ಉಳಿಯುವಂಥದ್ದು. ಇಡೀ ಜಗತ್ತು ಕಂಪನಗಳು ಮತ್ತು ನಮ್ಮ ಕಂಪನಗಳು ಸದಾ ಬದಲಿಸುತ್ತಿರುತ್ತವೆ, ಪ್ರತಿ ಕ್ಷಣ ಬದಲಾಯಿಸುತ್ತದೆ.
