13 ವರ್ಷದ ಬಾಲಕಿ ಮೇಲೆರಗಿದ ಇನ್ಸ್​ಪೆಕ್ಟರ್ ಬಂಧನ​: ತಾಯಿ ಮುಂದೆ ಪೋಲಿಸಪ್ಪನ ಕ್ರೌರ್ಯ ಬಿಚ್ಚಿಟ್ಟ ಅಪ್ರಾಪ್ತೆ!

ಚೆನ್ನೈ: ಹದಿಮೂರು ವರ್ಷದ ಬಾಲಕಿ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ ಆರೋಪದಡಿಯಲ್ಲಿ ಚೆನ್ನೈ ಪೊಲೀಸ್​ ಇನ್ಸ್​ಪೆಕ್ಟರ್​ನನ್ನು ಸೋಮವಾರ ಬಂಧಿಸಲಾಗಿದೆ. ​

ಸಿ. ಪುಗಲೆಂಧಿ ಬಂಧಿತ ಇನ್ಸ್​ಪೆಕ್ಟರ್​. ವೇಶ್ಯಾವಾಟಿಕೆ ಜಾಲದಲ್ಲಿ ಬಂಧಿಯಾಗಿದ್ದ ಮಹಿಳೆಯೊಬ್ಬಳು ನೀಡಿದ ದೂರಿನ ಅನ್ವಯ ಇನ್ಸ್​ಪೆಕ್ಟರ್​ನನ್ನು ಬಂಧಿಸಲಾಗಿದೆ. ಚೆನ್ನೈನಲ್ಲಿರುವ ಚಿಕ್ಕಮ್ಮ ಸುನಿತಾ ಬಾನು ಮನೆಯಲ್ಲಿ ಬಾಲಕಿ ವಾಸವಿದ್ದಳು. ಈ ವೇಳೆ ಆಕೆಯನ್ನು ಬಲವಂತವಾಗಿ ಜಾಲಕ್ಕೆ ನೂಕಲಾಗಿದೆ. ಸದ್ಯ ರಕ್ಷಣೆಯಾಗಿರುವ ಬಾಲಕಿ ನಡೆದ ಎಲ್ಲ ಘಟನೆಯನ್ನು ಎರಡು ತಿಂಗಳ ಬಳಿಕ ಸುನಿತಾ ಬಾನು ಮನೆಗೆ ಭೇಟಿ ನೀಡಿದ ತಾಯಿಯ ಮುಂದೆ ತೆರೆದಿಟ್ಟಾಗ ಪ್ರಕರಣ ಬೆಳಕಿಗೆ ಬಂದಿದೆ.

ಇದನ್ನೂ ಓದಿ: ‘ಎ ಸುಟೇಬಲ್ ಬಾಯ್ ವೆಬ್​ಸಿರೀಸ್​ನಲ್ಲಿ ಲವ್​ ಜಿಹಾದ್​ಗೆ ಪ್ರೇರಣೆ ನೀಡಲಾಗುತ್ತಿದೆ’; ಬಿಜೆಪಿಯಿಂದ ದೂರು

ಮಗಳ ನೋವಿನ ಕತೆ ಕೇಳಿದ ತಾಯಿ ಚೆನ್ನೈನ ವಾಸರ್​ಮನ್​ಪೇಟೆಯಲ್ಲಿರುವ ಮಹಿಳಾ ಪೊಲೀಸ್​ ಠಾಣೆಗೆ ದೂರು ನೀಡಿದ್ದರು. ತನಿಖೆ ಆರಂಭಿಸಿದ ಪೊಲೀಸರು ಮದನ್​ ಕುಮಾರ್​, ಆತನ ಪತ್ನಿ ಸುನಿತಾ ಬಾನು, ತಾಯಿ ಸೆಲ್ವಿ ಸೇರಿದಂತೆ ಮಹೇಶ್ವರಿ, ಸಂಧ್ಯಾ, ವಿಜಯ, ಕಾರ್ತಿಕ್​ ಮತ್ತು ವನಿತಾ ಎಂಬುವರು ಬಂಧಿಸಿದ್ದಾರೆ.

ವಿಚಾರಣೆ ವೇಳೆ ತಪ್ಪೊಪ್ಪಿಕೊಂಡಿರುವ ಆರೋಪಿ ಸಂಧ್ಯಾ, ಬಾಲಕಿಯನ್ನು ರಾಜೇಂದ್ರನ್​ (44) ಎಂಬ ಗ್ರಾಹಕನ ಬಳಿ ಕಳುಹಿಸಿದ್ದೆ. ಅದೇ ಸಮಯದಲ್ಲಿ ಬಾಲಕಿಯನ್ನು ಭೇಟಿ ಮಾಡಿದ್ದ ಪುಗಲೆಂದಿ ಆಕೆಯ ಮೇಲೆ ಲೈಂಗಿಕವಾಗಿ ದೌರ್ಜನ್ಯ ಎಸಗಿದ್ದಾರೆಂದು ಸಂಧ್ಯಾ ಆರೋಪಿಸಿದ್ದಾಳೆ. ಆತಂಕಕಾರಿ ವಿಚಾರವೆಂದರೆ, ವೇಶ್ಯಾವಾಟಿಕೆ ಜಾಲಕ್ಕೆ ನೂಕುವ ಮುನ್ನ ಬಾಲಕಿ ಮೇಲೆ ಮದನ್​ ಕುಮಾರ್​ ಸಹ ಅತ್ಯಾಚಾರ ಎಸಗಿರುವುದು ಬೆಳಕಿಗೆ ಬಂದಿದೆ.

ಸಂತ್ರಸ್ತ ಬಾಲಕಿಯ ಸಹಾಯ ಪಡೆದು ಆರೋಪಿ ರಾಜೇಂದ್ರನ್​ನನ್ನು ಸಹ ಬಂಧಿಸಲಾಗಿದ್ದು, ಪೊಕ್ಸೊ ಕಾಯ್ದೆಯಡಿ ರಾಜೇಂದ್ರನ್​ ಮತ್ತು ಪುಗಲೆಂಧಿ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಅಪರಾಧ ಬಗ್ಗೆ ಪ್ರಕರಣ ಮುಚ್ಚಿಹಾಕಲು ಇನ್ಸ್​ಪೆಕ್ಟರ್​ ಪುಗಲೆಂಧಿ ಲಂಚದ ರೂಪವಾಗಿ ಬಾಲಕಿಯನ್ನು ನಿರಂತರವಾಗಿ ಬಳಸಿಕೊಂಡಿದ್ದಾನೆಂದು ರಾಜೇಂದ್ರನ್​ ತಿಳಿಸಿದ್ದಾನೆ. ಇದೇ ಜಾಲದಲ್ಲಿ ಏಜೆಂಟ್ ಆಗಿ ಕೆಲಸ ಮಾಡುತ್ತಿದ್ದ ಮತ್ತು ಗ್ರಾಹಕರ ಮನವೊಲಿಸುತ್ತಿದ್ದ 6 ಮಂದಿಯನ್ನು ಬಂಧಿಸಲಾಗಿದ್ದು, ವೇಶ್ಯಾವಾಟಿಕೆ ಜಾಲದ ಬಗ್ಗೆ ಹೆಚ್ಚಿನ ತನಿಖೆ ನಡೆಸಲು ವಿಶೇಷ ತಂಡವನ್ನು ನಿಯೋಜಿಸಲಾಗಿದೆ. ​

ಇದನ್ನೂ ಓದಿ: ಬಿಜೆಪಿ ಸರ್ಕಾರಗಳಿಗೆ ಶಾಕ್​ ಕೊಟ್ಟ ಹೈಕೋರ್ಟ್​: ಲವ್​ ಜಿಹಾದ್​ ಕುರಿತು ಹೀಗೊಂದು ತೀರ್ಪು

ಪುಗಲೆಂಧಿಗೆ ನ್ಯಾಯಾಂಗ ಬಂಧನ ವಿಧಿಸಲಾಗಿದ್ದು, ಜೈಲಿಗೆ ರವಾನಿಸಲಾಗಿದೆ. ಪುಗಲೆಂಧಿ ವಿರುದ್ಧ ಅನೇಕ ಆರೋಪಗಳು ಕೇಳಿಬಂದಿರುವುದಿಂದ ಆತನನ್ನು ಕರ್ತವ್ಯದಿಂದ ಅಮಾನತ್ತು ಮಾಡಲಾಗಿದೆ. (ಏಜೆನ್ಸೀಸ್​)

https://www.vijayavani.net/hassan-poultry-farming-veterinarian-farmer/