ರಾಜ್ಯ ವಿಧಾನಸಭೆಗೆ ಚುನಾವಣೆ ನಡೆಯಲು ಈಗ ಕೇವಲ ಒಂದು ವರ್ಷ. ಎಲ್ಲ ಪ್ರಮುಖ ರಾಜಕೀಯ ಪಕ್ಷಗಳು ಈಗಿನಿಂದಲೇ ತಂತ್ರಗಾರಿಕೆಯನ್ನು ಹೆಣೆಯುತ್ತಿದ್ದು, ಗೆಲುವಿನ ಸೂತ್ರಗಳ ಶೋಧದಲ್ಲಿ ತೊಡಗಿವೆ. ಹೀಗಿರುವಾಗ ಆಡಳಿತಾರೂಢ ರಾಜ್ಯ ಬಿಜೆಪಿ ಸರ್ಕಾರ ಹಲವು ವಿವಾದಗಳಲ್ಲಿ ಸಿಲುಕೊಂಡಿರುವುದು ಪ್ರತಿಪಕ್ಷಗಳಿಗೆ ಪ್ರಬಲ ಅಸ್ತ್ರವಾಗಿ ಸಿಕ್ಕಂತಾಗಿದೆ. ಕಮಿಷನ್ (ಭ್ರಷ್ಟಾಚಾರ) ವಿವಾದ ಪ್ರಕರಣಕ್ಕೆ ಸಂಬಂಧಿಸಿ ಕೆ.ಎಸ್.ಈಶ್ವರಪ್ಪ ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಿಯಾಗಿದೆ. ಅದರ ಬೆನ್ನಲ್ಲೇ ಪಿಎಸ್ಐ ಹುದ್ದೆಗಳ ನೇಮಕಾತಿ ಹಗರಣ ಹೊಸ ತಿರುವುಗಳನ್ನು ಪಡೆಯುತ್ತ, ವಿವಿಧ ಜಾಲಗಳ ಮುಖವಾಡವನ್ನು ಅನಾವರಣಗೊಳಿಸುತ್ತಿದೆ. ಸಹಾಯಕ ಪ್ರಾಧ್ಯಾಪಕರ ನೇಮಕಾತಿ ಪರೀೆ ಬಗ್ಗೆಯೂ ಅಪಸ್ವರ ಎದ್ದಿದೆ. ಇಷ್ಟು ಮಾತ್ರವಲ್ಲ, ರಾಜ್ಯ ಸರ್ಕಾರದ ವಿವಿಧ ಇಲಾಖೆಗಳ ಯಾವುದೇ ನೇಮಕಾತಿಗಳು ಗೊಂದಲ, ಅವ್ಯವಹಾರಗಳಿಂದ ಹೊರತಾಗಿಲ್ಲ ಎಂಬುದು ವಿಪರ್ಯಾಸದ ಸಂಗತಿ. ಇದಲ್ಲದೆ, ಸಚಿವ ಸ್ಥಾನಕ್ಕಾಗಿ ಲಾಬಿ, ಹಲವು ಸಚಿವರು, ಶಾಸಕರ ನಿಷ್ಕ್ರಿಯತೆ ಸೇರಿದಂತೆ ಹಲವು ಸಮಸ್ಯೆಗಳು ಆಳುವ ಪಕ್ಷ$ವನ್ನು ಕಾಡುತ್ತಿವೆ. ಚುನಾವಣೆಗೆ ಸಜ್ಜಾಗಲು ಉತ್ಸಾಹದಲ್ಲಿ ಹೊರಟವರಿಗೆ ಈ ಎಲ್ಲ ಪ್ರತಿಕೂಲ ಬೆಳವಣಿಗೆಗಳು ಅಡ್ಡಿಯಾಗಿ ಪರಿಣಮಿಸಿರುವುದಂತೂ ಹೌದು.
