ರಸ್ತೆ ಮಧ್ಯೆ ಮನಬಂದಂತೆ ಡ್ಯಾನ್ಸ್​; ಪೊಲೀಸ್ ಅಧಿಕಾರಿಯ ಪತ್ನಿ ಬಂಧನ | Police

Police | ಕೈಯಲ್ಲಿ ಮೊಬೈಲ್​ ಒಂದಿದ್ದರೆ ಸಾಕು, ಜನರು ಎಲ್ಲಿ ಬೇಕಾದರೂ, ಯಾವ ಸಂದರ್ಭದಲ್ಲಾದರೂ ರೀಲ್ಸ್​ ಮಾಡೋದನ್ನ ಮಾತ್ರ ನಿಲ್ಲಿಸಲ್ಲ. ಅಂದಹಾಗೆ ಇಲ್ಲೊಬ್ಬ ಪೊಲೀಸ್​ ಅಧಿಕಾರಿಯ ಪತ್ನಿ ವಾಹನಗಳು ಓಡಾಡುವಂತಹ ರಸ್ತೆ ಮಧ್ಯೆ ನಿಂತು ಡ್ಯಾನ್ಸ್​ ಮಾಡಿ, ಕೊನೆಗೆ ಪೊಲೀಸರ ಕೈಗೆ ಸಿಕ್ಕಿ ಬಿದ್ದಿದ್ದಾಳೆ.

ಇನ್ನೂ ಈಕೆಯನ್ನ ಚಂಡೀಗಢ ಪೊಲೀಸ್ ಅಧಿಕಾರಿಯ ಪತ್ನಿ ಜ್ಯೋತಿ ಎಂದು ಗುರುತಿಸಲಾಗಿದೆ. ಈಕೆ ಡ್ಯಾನ್ಸ್​ ಮಾಡುತ್ತಿದ್ದ ದೃಶ್ಯವನ್ನು ಆಕೆಯ ಸಹೋದರಿ ಪೂಜಾ ಎಂಬುವವರು ಸೆರೆ ಹಿಡಿದಿದ್ದಾರೆ. ಇವರ ಈ ಹುಚ್ಚಾಟದಿಂದಾಗಿ ರಸ್ತೆ ಮಧ್ಯೆ ಕೆಲ ಕಾಲ ಟ್ರಾಫಿಕ್​ ಜಾಮ್​ ಉಂಟಾಗಿ ವಾಹನ ಸವಾರರು ಪರದಾಡಿದ್ದಾರೆ. ಇನ್ನೂ ರಸ್ತೆಯ ಜೀಬ್ರಾ ಕ್ರಾಸಿಂಗ್ ಮುಂದೆ ಆಕೆ ಡ್ಯಾನ್ಸ್​ ಮಾಡುತ್ತಿರೋದು ವೀಡಿಯೊದಲ್ಲಿ ಸ್ಪಷ್ಟವಾಗಿ ತಿಳಿಯುತ್ತದೆ. ನಂತರ ಇವರಿಬ್ಬರ ನಡವಳಿಕೆಯಿಂದಾಗಿ ಬೇಸರಗೊಂಡ ಸಾರ್ವಜನಿಕರು ಪೊಲೀಸರಿಗೆ ಲಿಖಿತ ದೂರು ನೀಡಿದ್ದಾರೆ. ಅವರು ನೀಡಿದ ದೂರಿನನ್ವಯ ಡ್ಯಾನ್ಸ್​ ಮಾಡುತ್ತಿದ್ದ ಜ್ಯೋತಿ ಹಾಗೂ ವಿಡಿಯೋವನ್ನು ಸೆರೆಹಿಡಿದಿದ್ದ ಸಹೋದರಿ ಪೂಜಾರನ್ನು ಬಂಧಿಸಿದ ಪೊಲೀಸರು ​ ಠಾಣೆಗೆ ಕರೆದೊಯ್ದಿದ್ದಾರೆ.

ಈ ದೃಶ್ಯವನ್ನು ಚಂಡೀಗಢ ಸೆಕ್ಟರ್-20 ರ ಗುರುದ್ವಾರ ಚೌಕ್‌ನಲ್ಲಿ ಸೆರೆ ಹಿಡಿಯಲಾಗಿದೆ. ಈ ಸಂದರ್ಭದಲ್ಲಿ ರಸ್ತೆಯಲ್ಲಿ ಬರುತ್ತಿದ್ದ ವಾಹನಗಳ ಸಂಚಾರಕ್ಕೆ ಸಮಸ್ಯೆ ಉಂಟಾಗಿ ವಾಹನ ಸವಾರರು ಬೇಸರದಲ್ಲೆ ರಸ್ತೆ ಮಧ್ಯೆ ನಿಂತಿದ್ದಾರೆ. ಇನ್ನೂ ಈ ವಿಡಿಯೋ ಎಲ್ಲೆಡೆ ವೈರಲ್​ ಆಗುತ್ತಿದ್ದಂತೆ ಇಬ್ಬರನ್ನೂ ಬಂಧಿಸಿ, ಹೆಚ್ಚಿನ ವಿಚಾರಣೆ ನಡೆಸಲಾಗಿದ್ದು, ಕೊನೆಗೆ ಪೊಲೀಸ್​ ಠಾಣೆಯಲ್ಲಿ ವಿಚಾರಣೆ ಎದುರಿಸಿದ ಬಳಿಕ ಇಬ್ಬರೂ ಜಾಮೀನು ಪಡೆದು ವಾಪಸ್ ಆಗಿದ್ದಾರೆ.

ಈ ವಿಡಿಯೋವನ್ನು ಮಾರ್ಚ್ 20 ರಂದು ಸೆರೆಹಿಡಿದು ನಂತರ ರೀಲ್​ಅನ್ನು ಸಾಮಾಜಿಕ ಮಾಧ್ಯಮದಲ್ಲಿ ಅಪ್‌ಲೋಡ್ ಮಾಡಲಾಗಿದೆ. ಇಬ್ಬರೂ ಮಹಿಳೆಯರನ್ನ ಪೊಲೀಸರು ವಿಚಾರಣೆ ನಡೆಸಿದಾಗ ಆ ದಿನ  ಆಂಜನೇಯಸ್ವಾಮಿ ದೇವಸ್ಥಾನಕ್ಕೆ ಹೋಗಿ ಪೂಜೆ ಸಲ್ಲಿಸಿ ನಂತರ ವಾಪಸ್ ಬರುತ್ತಿದ್ದೆವು ಎಂದಿದ್ದಾರೆ.