ನೋಡಲು ಎಂಎಸ್ಎಂಇ ಇಲಾಖೆಯದೇ ಎಂಬಂತೆ ಕಂಡ ಹಿನ್ನೆಲೆ ಯೋಗೇಶ್, ಅದರಲ್ಲಿ ಹೆಸರು, ವಿಳಾಸ, ಮೊಬೈಲ್ ನಂಬರ್, ಆಧಾರ್, ಪಾನ್ ಸೇರಿ ಎಲ್ಲ ವಿವರಗಳನ್ನು ಅಪ್ಲೋಡ್ ಮಾಡಿದ್ದಾರೆ. ನಂತರ ನೋಂದಣಿ ಶುಲ್ಕ 1,850 ರೂ. ಪಾವತಿ ಮಾಡಿದ್ದಾರೆ. ಪ್ರತಿಯಾಗಿ ಯೋಗೇಶ್ ಇ-ಮೇಲ್ಗೆ ರಸೀದಿ ಬಂದಿದ್ದು, ಪರಿಶೀಲಿಸಿದಾಗ ಖಾಸಗಿ ಕಂಪನಿ ಬ್ಯಾಂಕ್ ಖಾತೆಗೆ ವರ್ಗಾವಣೆ ಆಗಿರುವುದು ಗೊತ್ತಾಗಿದೆ. ಅನುಮಾನ ಬಂದು ಸ್ಥಿರ ದೂರವಾಣಿಗೆ ಕರೆ ಮಾಡಿದಾಗ, ‘ಎಲ್ಲ ದಾಖಲೆಗಳನ್ನು ಕೇಂದ್ರ ಸರ್ಕಾರದ ವೆಬ್ಸೈಟ್ಗೆ ಅಪ್ಲೋಡ್ ಮಾಡಿ ‘ಉದ್ಯೋಗ ಆಧಾರ್’ ಪ್ರಮಾಣ ಪತ್ರ ಕೊಡಿಸುವುದಾಗಿ ತಿಳಿಸಿದ್ದಾರೆ. ಯೋಗೇಶ್, ಕೇಂದ್ರ ಸರ್ಕಾರದ ಅಧಿಕೃತ ವೆಬ್ಸೈಟ್ ಪರಿಶೀಲಿಸಿದಾಗ ನೋಂದಣಿ ಉಚಿತ ಎಂಬುದು ಗೊತ್ತಾಗಿದೆ. ಅದಕ್ಕಾಗಿ ಸರ್ಕಾರದ ವೆಬ್ಸೈಟ್ಗೆ ಹೋಲುವಂತೆ ನಕಲಿ ಸೈಟ್ ತೆರೆದು ವಂಚನೆ ಮಾಡುತ್ತಿರುವುದಾಗಿ ಸೈಬರ್ ಠಾಣೆಗೆ ದೂರು ನೀಡಿದ್ದಾರೆ. ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.
