ಆಗ್ರಾ; ನಮ್ಮ ರಾಮ ನೇರ ಮತ್ತು ಸರಳ, ನಿಮ್ಮ ಕೃಷ್ಣ ಡೊಂಕು. ಕೃಷ್ಣನ ಭಂಗಿ, ಅವನ ನಡಿಗೆ ಮತ್ತು ಹೆಸರು ಎಲ್ಲವೂ ವಕ್ರವಾಗಿದೆ. ಕೃಷ್ಣನ ಕೊಳಲು ನಾದ ಮಕ್ಕಳ ಆಟ. ರಾಮನಂತೆ ಧನಸ್ಸು ಹಿಡಿಯುವುದು, ಕೋತಿಗಳನ್ನು ಕುಣಿಸುವುದು ಸುಲಭವಲ್ಲ ಎಂದು ದೇವರುಗಳ ಮಧ್ಯೆ ಹೋಲಿಕೆ ಮಾಡಿದ್ದ ಧಾರ್ಮಿಕ ಪ್ರಚಾರಕ ಧೀರೇಂದ್ರ ಶಾಸ್ತ್ರಿ ವಿರುದ್ಧ ವಕೀಲರೊಬ್ಬರು ಕ್ರಿಮಿನಲ್ ಮಾನನಷ್ಟ ದೂರು ದಾಖಲಿಸಿದ್ದಾರೆ.
ವಕೀಲರಿಂದ ದೂರು ದಾಖಲು
ವಕೀಲ ಅಜಯ್ ಪ್ರತಾಪ್ ಸಿಂಗ್ ಅವರು ಆಗ್ರಾ ಸಿವಿಲ್ ಕೋರ್ಟ್‌ನಲ್ಲಿ ಈ ದೂರು ದಾಖಲಿಸಿದ್ದು, ಧಾರ್ಮಿಕ ಪ್ರವಚನದ ವೇಳೆ ಶಾಸ್ತ್ರಿ ಅವರು ಶ್ರೀಕೃಷ್ಣನ ಬಗ್ಗೆ ಅವಹೇಳನಕಾರಿ ಟೀಕೆಗಳನ್ನು ಮಾಡಿದ್ದಾರೆ. ಇದು ಅವರ ವಂಶಸ್ಥರ ಧಾರ್ಮಿಕ ಭಾವನೆಗಳಿಗೆ ಹಾಗೂ ಸಾಮಾಜಿಕ ಗೌರವಕ್ಕೆ ಧಕ್ಕೆ ತಂದಿದೆ ಎಂದು ಆರೋಪಿಸಿದ್ದಾರೆ.
ಏನಂದಿದ್ರು ಧೀರೇಂದ್ರ ಶಾಸ್ತ್ರಿ?
ಮಧ್ಯಪ್ರದೇಶದ ಶಿವಪುರಿ ಜಿಲ್ಲೆಯ ಕರೇರಾದಲ್ಲಿ ನಡೆದ ರಾಮಕಥೆಯೊಂದರ ವೇಳೆ ಶಾಸ್ತ್ರಿ ಅವರು ಭಗವಾನ್ ರಾಮ ಮತ್ತು ಶ್ರೀಕೃಷ್ಣನ ದೈಹಿಕ ಭಂಗಿಗಳನ್ನು ಹೋಲಿಕೆ ಮಾಡಿ ಮಾತನಾಡಿದ್ದರು. ದೂರಿನ ಪ್ರಕಾರ, 'ಕೃಷ್ಣನನ್ನು ಅನುಸರಿಸುವವರಿಗೆ ಬೇಸರವಾಗಬಹುದು, ಆದರೆ ಕೃಷ್ಣ ತುಂಬಾ ಬಾಗಿದವನು. ಅವನು ನಿಂತಾಗಲೂ ಮೂರು ಕಡೆಗಳಲ್ಲಿ ಬಾಗುತ್ತಾನೆ' ಎಂದು ಶಾಸ್ತ್ರಿ ಹೇಳಿದ್ದರು.
