ವಾಣಿಜ್ಯಕ್ಕೂ ವೈರಸ್!: ಆಮದು ಪ್ರಮಾಣ ಶೇ. 28 ಇಳಿಕೆ ಸಾಧ್ಯತೆ

ನವದೆಹಲಿ: ಕರೊನಾ ವೈರಸ್​ನಿಂದಾಗಿ ಭಾರತದ ಆಮದು ಪ್ರಮಾಣ ಶೇ. 28 ಇಳಿಕೆಯಾಗಲಿದೆ ಎಂದು ಅಂದಾಜಿಸಲಾಗಿದೆ. ನಿರ್ವಣ, ಆಟೋಮೊಬೈಲ್, ರಾಸಾಯನಿಕಗಳು ಹಾಗೂ ಔಷಧ ಕ್ಷೇತ್ರ ಅತಿಹೆಚ್ಚು ತೊಂದರೆ ಅನುಭವಿಸುವ ಸಾಧ್ಯತೆಯಿದೆ. ಇಲೆಕ್ಟ್ರಿಕಲ್ ಯಂತ್ರಗಳು ಹಾಗೂ ಯಾಂತ್ರಿಕ ಉಪಕರಣಗಳು, ಜೈವಿಕ ರಾಸಾಯನಿಕ, ಪ್ಲಾಸ್ಟಿಕ್, ಆಪ್ಟಿಕಲ್ ಮತ್ತು ಸರ್ಜಿಕಲ್ ಉಪಕರಣಗಳು ಚೀನಾ ಆಮದನ್ನು ಹೆಚ್ಚಾಗಿ ಅವಲಂಬಿಸಿವೆ.

ಭಾರತ ಚೀನಾದಿಂದ ಶೇ. 40 ಇಲೆಕ್ಟ್ರಿಕಲ್ ಯಂತ್ರಗಳನ್ನು ಆಮದು ಮಾಡಿಕೊಳ್ಳುತ್ತದೆ. ಹಾಂಗ್​ಕಾಂಗ್​ನ ಆಮದನ್ನೂ ಸೇರಿ ಈ ಪ್ರಮಾಣ ಶೇ. 57 ಆಗುತ್ತದೆ. ಈ ಹಿನ್ನೆಲೆಯಲ್ಲಿ ಭಾರತದ ಅರ್ಧಕ್ಕಿಂತ ಹೆಚ್ಚಿನ ಇಲೆಕ್ಟ್ರಿಕಲ್ ಯಂತ್ರಗಳ ಆಮದು ತೊಂದರೆಗೆ ಸಿಲುಕಲಿದೆ. ಚೀನಾದಿಂದ ಮೂರನೇ ಒಂದು ಭಾಗದಷ್ಟು ಮಷಿನರಿಗಳು ಮತ್ತು ಯಾಂತ್ರಿಕ ಉಪಕರಣಗಳನ್ನು ಭಾರತ ಆಮದು ಮಾಡಿಕೊಳ್ಳುತ್ತಿದೆ. ಒಂದು ವೇಳೆ ಸುದೀರ್ಘ ಅವಧಿಗೆ ನಿಷೇಧ ಹೇರಿದರೆ ಶೇ. 30ರಿಂದ 40 ಯಂತ್ರೋಪಕರಣಗಳ ಆಮದು ಸಂಕಷ್ಟಕ್ಕೆ ಈಡಾಗಲಿದೆ. ಬಿಕ್ಕಟ್ಟು ನಾಲ್ಕು ತಿಂಗಳು ಮುಂದುವರಿದರೆ ದೇಶೀಯ ಔಷಧ ತಯಾರಿಕೆ ಕಂಪನಿಗಳು ದುಷ್ಪರಿಣಾಮ ಎದುರಿಸಬೇಕಾಗುತ್ತದೆ. ಕಚ್ಚಾ ಸಾಮಗ್ರಿ ಆಕ್ಟಿವ್ ಫಾರ್ವಸ್ಯುಟಿಕಲ್ ಇನ್​ಗ್ರೇಡಿಯಂಟ್ಸ್ (ಎಪಿಐ) ಚೀನಾದಿಂದಲೇ ಆಮದು ಮಾಡಿಕೊಳ್ಳಲಾಗುತ್ತದೆ. ಕ್ರಿಮಿನಾಶಕಗಳು, ರೋಗನಿರೋಧಕಗಳು, ವಿಟಾಮಿನ್, ಡಯಾಬಿಟಿಸ್-ನಿರೋಧಕ ಔಷಧಗಳಲ್ಲಿ ಬಳಸುವ ಕೆಲವು ಎಪಿಐಗಳಿಗೆ ಚೀನಾವನ್ನೇ ಅವಲಂಬಿಸಬೇಕಿದೆ.