ಒಂದು ಕಾಲದಲ್ಲಿ ಡಕಾಯಿತರ ಆಡುಂಬೊಲವಾಗಿದ್ದ ಮೊರೇನಾ ಜಿಲ್ಲೆಯಲ್ಲಿ ಈಗ ಒತ್ತೆಹಣಕ್ಕಾಗಿ ಎಮ್ಮೆ,ಕೋಣಗಳನ್ನು ಕಳವು ಮಾಡಲಾಗುತ್ತಿದೆ!

ಭೋಪಾಲ:ಮಧ್ಯಪ್ರದೇಶದ ಮೊರೇನಾ ಜಿಲ್ಲೆ ಒಂದು ಕಾಲದಲ್ಲಿ ಡಕಾಯಿತರ ಆಡುಂಬೊಲವಾಗಿತ್ತು. ಈಗ ಮರಳು ಮಾಫಿಯಾಕ್ಕೆ ಕುಖ್ಯಾತವಾಗಿದ್ದು, ಒತ್ತೆ ಹಣಕ್ಕಾಗಿ ಎಮ್ಮೆ, ಕೋಣಗಳ ಕಳ್ಳತನ ಹೆಚ್ಚಾಗಿದೆ!

ಈ ಕಳ್ಳತನಕ್ಕೊಂದು ವಿಶೇಷತೆ ಇದೆ. ಕಳ್ಳರು ಮೊದಲು ಎಮ್ಮೆ, ಕೋಣಗಳಿರುವ ಮನೆಗಳನ್ನು ಗುರುತಿಸುತ್ತಾರೆ. ನಂತರ ಒಬ್ಬೊಬ್ಬರಾಗಿ ಅಂತಹ ಮನೆಯ ಬಳಿ ಸೇರುತ್ತಾರೆ. ಸದ್ದಿಲ್ಲದಂತೆ ಎಮ್ಮೆ, ಕೋಣವನ್ನು ಕೊಟ್ಟಿಗೆಯಿಂದ ಬಿಡಿಸಿಕೊಂಡು ಎಸ್ಕೇಪ್ ಆಗುತ್ತಾರೆ. ಹೀಗೆ ಎಸ್ಕೇಪ್ ಆಗುವ ಸಂದರ್ಭದಲ್ಲಿ ಅವರು ನೆಲಕ್ಕೆ ಪ್ಲಾಸ್ಟಿಕ್​ ಹಾಸಿರುತ್ತಾರೆ. ಎಮ್ಮೆ, ಕೋಣಗಳ ಕಾಲಿನ ಗೊರಸಿನ ಅಚ್ಚು ನೆಲದ ಮೇಲೆ ಬೀಳದಿರಲಿ ಎಂಬ ಮುನ್ನೆಚ್ಚರಿಕೆ ಅದು.ನೆಲದ ಮೇಲೆ ಅವುಗಳ ಹೆಜ್ಜೆ ಗುರುತು ಮೂಡಿದರೆ ಪೊಲೀಸ್​ ಜಾಲಕ್ಕೆ ಸುಲಭ ತುತ್ತಾಗುವುದು ಗ್ಯಾರೆಂಟಿ ಎಂಬ ಆತಂಕವೂ ಅವರಲ್ಲಿರುವುದುಕ್ಕೆ ಇದು ಸಾಕ್ಷಿ.

ಇಷ್ಟಾದ ಬಳಿಕ ಕಳ್ಳರು ಮಧ್ಯವರ್ತಿಯೊಬ್ಬರನ್ನು ಸಂಪರ್ಕಿಸುತ್ತಾರೆ. ಆ ಪ್ರಾಣಿಯ ಮೌಲ್ಯದ ಶೇಕಡ 25ರಿಂದ 30 ಪಾಲು ಹಣವನ್ನು ಒತ್ತೆಹಣವಾಗಿ ನೀಡಬೇಕು ಎಂದು ಅವುಗಳ ಮಾಲೀಕರಿಗೆ ಈ ಮಧ್ಯವರ್ತಿ ಮೂಲಕ ಸಂದೇಶ ರವಾನಿಸುತ್ತಾರೆ.ಈ ರೀತಿಯ ಒತ್ತೆಹಣಕ್ಕೆ ಸ್ಥಳೀಯವಾಘಿ ಪನ್​ಹೈ ಎಂದು ಹೇಳುತ್ತಾರೆ.

ಜಿಲ್ಲಾ ಎಸ್​​ಪಿ ಅಸಿತ್ ಯಾದವ್ ಹೇಳುವ ಪ್ರಕಾರ, ಈ ವರ್ಷ 23 ಇಂತಹ ಪ್ರಕರಣಗಳು ನಡೆದಿದ್ದು, ಪ್ರಕರಣಗಳು ದಾಖಲಾಗಿವೆ. ಆದರೆ, ಕಳ್ಳರನ್ನು ಹಿಡಿಯುವುದು ಮಾತ್ರ ಸಾಧ್ಯವಾಗಿಲ್ಲ. ಇದಕ್ಕೆ ಮಧ್ಯವರ್ತಿಗಳ ವ್ಯವಹಾರವೇ ಕಾರಣ. ಅವರು ಸದ್ದಿಲ್ಲದೇ ಎಮ್ಮೆ, ಕೋಣಗಳನ್ನು ಕಳೆದುಕೊಂಡ ಮಾಲೀಕರೊಂದಿಗೆ ವ್ಯವಹಾರ ಕುದುರಿಸಿ ತಮ್ಮ ಕೆಲಸ ಮುಗಿಸಿಬಿಡುತ್ತಿದ್ದಾರೆ. ಚಂಬಲ್ ಪ್ರಾಂತ್ಯದ 200-300 ಕಿ.ಮೀ. ಉದ್ದದ ಪ್ರದೇಶದಲ್ಲಿ ಇದು ಸರ್ವೇ ಸಾಮಾನ್ಯ.(ಏಜೆನ್ಸೀಸ್​)